Minisitiri w’Intebe Murekezi yasabye inzego zishinzwe imfungwa n’abagororwa kubyaza umusaruro amagereza

Ubwo yatangizaga inama y’ihuriro ry’inzego zishinzwe imfungwa n’abagororwa zikorera mu bihugu bya Afurika, Minisitiri w’intebe Anastase Murekezi yavuze ko amagereza akwiye kuba ahantu habyara umusaruro ushobora gutuma ingengo y’imari izi nzego zikoresha yiyongera.

Iyi nama yateranye kuva kuri uyu wa 15 Gicurasi kugeza kuwa 19 Gicurasi i Kigali muri Convention Center itangizwa ku mugaragaro na Minisitiri w’intebe w’u Rwanda Anastase Murekezi.

Iyi nama yateranye ku nshuro ya kane ikaba yahuje abayobozi b’inzego zishinzwe imfungwa n’abagororwa zo hirya no hino muri Afurika ndetse n’inzobere mu kugorora.

Mu butumwa yahatangiye, Minisitiri w’Intebe Murekezi yavuze ko hakwiye impinduka zihuse mu nzego zishinzwe imfungwa n’abagororwa zo mu bihugu bya Afurika ndetse asaba ibihugu byose, abikorera na sosiyete sivile gukorana n’inzego zishinzwe imfungwa n’abagororwa.

Yagize ati: "Iyi nama igamije guhindura no kunoza uburyo bukoreshwa mu nzego zihana ibyaha zo muri Afurika hagamijwe iterambere ry’amagereza, ibi biri mu murongo wo guharanira kwigira no kwihesha agaciro abanya-Afurika duharanira kugeraho. Ibihugu byose bya Afurika, ibigo byigenga ndetse na sosiyete sivile birasabwa gufasha inzego zishinzwe imfungwa n’abagororwa."

Minisitiri w’intebe Murekezi yanagiriye inama abitabiriye iyi nama ko bashobora gukoresha imfungwa n’abagororwa ibikorwa bitanga umusaruro ushobora gutuma ingengo y’imari inzego zishinzwe imfungwa zigenerwa yiyongera.

Ati: “Kugirango inzego zishinzwe imfungwa n’abagororwa zongere ingengo y’imari Leta izigenera, zirasabwa gukorana na Leta mu guhindura za gereza ibigo bibyara umusaruro. Ndabibutsa ko gukoresha imfungwa n’abagororwa mu bikorwa bitanga umusaruro ari ingirakamaro kuri bo, ku nzego zishinzwe imfungwa no ku bihugu muri rusange.”

Yasabye Ihuriro nyafurika ry’inzego z’imfungwa n’abagororwa ( African Correctional Services Association -ACSA) kwifatanya no gukorana n’izindi nzego mpuzamahanga zihuje inshingano maze abasaba kubyaza umusaruro iyi nama biga kuri iyi mikoranire ku buryo inzego z’imfungwa n’abagororwa zo muri Afurika zizabasha gukora kinyamwuga kandi zikabyara umusaruro mwinshi.

Yavuze ko u Rwanda mu rwego rwo kunoza imibereho y’imfungwa n’abagororwa rwibanze mu guteza imbere ibikorwa remezo ndetse no gufasha imfungwa n’abagororwa bose kubona ubwishingizi bwo kwivuza mu rwego rwo kwita ku buzima bwabo.

Yababwiye kandi ko u Rwanda ari igihgu cyahisemo kubaho mu bumwe n’ubwiyunge ndetse kikanafata umwanzuro wo gukuraho igihano cy’urupfu muri 2007 hagashyirwaho imirimo nsimbura gifungo ifitiye igihugu akamaro.

Ibi yabihereyeho asaba abitabiriye iyi nama gukorera hamwe mu gushaka ibisubizo byatuma serivise zigenewe imfungwa n’abagororwa ziba nziza.

Iyi nama iribanda ku nsanganyamatsiko yo kunoza imikorere y’inzego z’ishinzwe imfungwa n’abagororwa hagamijwe gukora kinyamwuga hakazigwa ku ngamba zo kubigeraho.

Yisangize Inshuti.

Ibitekerezo

Tanga Igitekerezo