Minisiritiri w’Iterambere mu Bwongereza yasabye ibihugu byazahajwe n’intambara kwigira ku Rwanda

Minisitiri w’ishami rishinzwe iterambere mpuzamahanga mu Bwongereza James Wharton kuri uyu wa Gatatu yasuye urwibutso rwa Jenoside yakorewe Abatutsi ruri ku Gisozi, aboneraho gusaba amahanga kwirinda amacakubiri no kurwanya icyatuma Jenoside yongera kuba aho ariho hose ku isi.

Nyuma gusobanurirwa amateka ya Jenoside yakorewe Abatutsi no kunamira inzirakarengane zishyinguye mu rwibutso rwa Jenoside ku Gisozi, Wharton yavuze ko ibyabaye mu Rwanda ari isomo ku bihugu byose byibasiwe n’intambara ndetse n’ubundi bwicanyi.

Yagize ati “Ubwiyunge si ikintu cyoroshye, bisaba kubabarira, kumva neza ibintu, ndetse n’ubutabera.Ibyo tubona mu Rwanda, ni igihamya cy’iterambere ryagezweho.Igihugu kiri gutera imbere mu bukungu no mu mibereho myiza, kubera ko kigira ku hashize mu buryo nyabwo.Hari amasomo ibindi bihugu byahuye n’imvururu ndetse n’ubwicanyi bishobora kukigiraho, wenda bitari ku rugero mu Rwanda byagezeho, ariko mu buryo butuma biga amasomo ngo nabo bitazababaho mu gihe kizaza.”

Minisitiri Wharton asobanurirwa amateka ya Jenoside yakorewe Abatutsi

Wharton yakomeje avuga ko ibyabaye mu Rwanda byatanze isomo rihagije, ariyo mpamvu bazakora uko bashoboye ngo ivangura n’urwango bitazagira ahandi biba. Ati “Tuzahora twibuka ikiguzi nyacyo cy’urwango ndetse n’ibyiza tuzagira nituramuka dukoreye hamwe.”

Wharton yageze mu Rwanda kuri uyu wa Mbere, areba ibikorwa n’imishinga Leta y’u Bwongereza yagiye iteramo inkunga u Rwanda ndetse n’aho bashobora gukomeza gufasha ngo iterambere rirambye rigerweho.

Yisangize Inshuti.

Ibitekerezo

Tanga Igitekerezo