Min Busingye yakomoje ku ifata n’ifunga ry’agateganyo ryakemanzwe n’abaharanira uburenganzira bwa muntu

Minisitiri w’ubutabera mu Rwanda Joston Busingye mu kiganiro n’abanyamakuru

Mu nama yo kumurika ishusho y’ishyirwa mu bikorwa ry’amahame y’uburenganzira bwa muntu u Rwanda rwashyiriyeho umukono i Geneve mu mpera za 2015, Minisitiri w’ubutabera mu Rwanda Joston Busingye yavuze ko kuba hari abantu basangwa mu mihanda batagira icyo bakora bagafatwa bagafungwa by’abateganyo atari uguhungabanya uburenganzira bwa muntu kuko akenshi ngo bikorwa kugirango bafashwe guhabwa ubundi burere n’andi mahirwe yo kugira icyo bimarira mu gihe kizaza.

Iyi nama yabaye kuri uyu wa 23 Kamene 2016, yari igamije kumurika ishusho y’ishyirwa mu bikorwa ry’amahame 50 y’uburenganzira bwa muntu u Rwanda rwiyemeje gushyira mu bikorwa ruyahawe n’akanama k’Umuryango w’Abibumbye gashinzwe Uburenganzira bwa Muntu, mu mpera za 2015.

Mu kiganiro yagiranye n’abanyamakuru nyuma y’iyi nama, Minisitiri w’ubutabera mu Rwanda Joston Busingye yatangaje ko ifata n’ifungwa ry’agateganyo mu Rwanda biteganywa n’amategeko kandi ko kuri ubu ayo mategeko yubahirizwa.

Yavuze kandi ko ibi bikorwa mu rwego rwo gufasha abo bantu no kubaha amahirwe yo kugira icyo bimarira mu gihe kizaza kuko aho bafungirwa (ibigo ngororamuco) ngo bahigira ubumenyi bwinshi butuma biteza imbere bakava mu muhanda no mu bikorwa bibangamira umuryango nyarwanda.

Mu ijambo rye Minisitiri Busingye yagize ati: “Ifata n’ifungwa by’agateganyo biteganywa n’amategeko kandi kugeza ubungubu arakurikizwa, hari ibigo bishinzwe rehabilitation (guhindura imico y’umuntu) y’abantu baba baragize amahirwe make yo kudakomeza amashuri cyangwa kutaba mu muryango ugasanga umuntu yabaye ikibazo kuri we ku giti cye no ku muryango nyarwanda”

Yakomeje agira ati:“Kugerageza guha uwo mwana ubundi burere, amahirwe n’ubushobozi bwo kugira icyo yimarira mu buzima bwe ni ibintu u Rwanda rudakora rwonyine, ni ibintu bikorwa n’ibihugu byinshi bishaka kugirira akamaro abaturage babyo. Uwagize amahirwe make yo kubura aho ashinga ibirenge, aho ashinga imizi ku buryo abona ikimuteza imbere iyo igihugu kimugobotse kigashaka uburyo bwo kumuteza imbere, ndatekereza ko bitagombe kuba ikibazo,.. kuvana umuntu mu muhanda,..na hariya sintekereza ko aba atari mu gifungo, buriya kurara munsi y’umuferege ntabwo ari igifungo cyoroheje, ibyiza ahubwo bizima ni uko yahabwa amahirwe yo kugira icyo amenya, kugira ubwenge yiga no kugira icyo akora”

Perezidante wa komisiyo y’uburenganzira bwa muntu mu Rwanda madame Nirere Madalene na we yavuze ko ifata n’ifunga ry’agateganyo hari amategeko abigenga ndetse ahamya ko ayo mategeko mu Rwanda yubahirizwa anavuga ko iyo bakoze igenzura bagasanga hari ibitarubahirijwe neza ngo iyi komisiyo iganira n’abo bireba bagakosora ibitagenda neza.


Perezidante wa komisiyo y’uburenganzira bwa muntu mu Rwanda madame Nirere Madalene

Ifata n’ifungwa ry’agateganyo mu Rwanda ryagiye ritungwa agatoki n’imiryango mpuzamahanga irengera uburenganzira bwa muntu bavuga ko bikorwa ku buryo bunyuranyije n’amahame mpuzamahanga y’uburenganzira bw’ikiremwa muntu, gusa u Rwanda rwo ruhamya ko abantu bajyanwa mu bigo nka Iwawa, kwa Kabuga n’ahandi bibafasha kuhigira byinshi bakiteza imbere nyuma yo kuvayo.

Amahame y’uburenganzira bwa muntu u Rwanda rwashyizeho umukono, agomba kuba yarashyizwe mu bikorwa bitarenze 2019. Muri yo harimo gushyigikira uburenganzira bw’umwana, ubw’umugore, ubw’itangazamakuru, ubwo kubona akazi, ubwo kwiga, kurya, kwivuza, gutanga ibitekerezo, kurwanya icuruzwa ry’abantu n’andi mahame menshi agenga uburenganzira bwa muntu.


Iyi nama yitabiriwe n’abanyacyubahiro batandukanye bafite imirimo ifitanye isano no kurengera uburenganzira bwa muntu.

Yisangize Inshuti.

Ibitekerezo

Tanga Igitekerezo