Miliyari eshanu n’igice mu matora ya Perezida ya 2017

Amafaranga y’u Rwanda asaga miliyari eshanu n’igice (Rwf5.5bn) niyo Guverinoma y’u Rwanda iteganya kuzakoresha mu matora ya Perezida wa Repubulika ateganyijwe muri Kanama mu mwaka wa 2017.

Ugereranyije n’ingengo y’imari y’amatora ya 2010, aya mafaranga yaragabanyutse ariko na none yikuba kabiri ugereranyije n’ayakoreshejwe muri 2003 kuko icyo gihe yari miliyari 2.3 z’amafaranga y’u Rwanda.

Umunyamabanga Nshingwabikorwa wa Komisiyo y’Igihugu y’Amatora , Munyaneza Charles, mu kiganiro yagiranye na The New Times, yavuze ko muri aya matora hazakoreshwa ikoranabuhanga, abakorerabushake ba Komisiyo ndetse na bimwe mu bikoresho byagiye bikoreshwa mu yandi matora aheruka.

“Nko mu mwaka wa 2010, ingengo y’imari yari ihagaze muri miliyari zirindwi (Rwf7bn), ariko ntabwo dusohora amafaranga kuri buri kimwe kuko dukoresha bimwe mu bikoresho by’amatora twakoresheje mu matora y’abadepite muri 2008”.

Nkuko yakomeje abitangaza, ngo Guverinoma izatera inkunga amatora ku kigereranyo cya 95%.

Mu izina rya Komisiyo y’Igihugu y’Amatora, Munyaneza yavuze ko aya mafaranga azafasha mu myiteguro haba imbere mu gihugu ndetse no muri Diaspora, aho hateganyijwe n’amahugurwa mu nzego zitandukanye kugirango azagende neza.

Nkuko biteganyijwe ku ngengabihe, amatora azaba muri Kanama 2017 nkuko biteganywa n’itegeko Nshinga rya Repubulika y’u Rwanda.

Munyaneza yatangaje ko itariki amatora azaberaho itaratangazwa, gusa ngo igomba kumenyekana bitarenze uyu mwaka dore ko igenwa n’Iteka rya Perezida.

Abaturage basaga miliyoni 6, 6 nibo bamaze kwiyandikisha mu bazatora, bakaba bariyongereyeho miliyoni 1.4 ugereranyije n’abatoye muri 2010 mu matora ya Perezida.

Munyaneza yavuze ko abujuje imyaka yo gutora bazandikwa mu Ugushyingo uyu mwaka ndetse no muri Gicurasi umwaka utaha, lisiti ya nyuma ikazatangazwa muri Nyakanga umwaka utaha.

Yisangize Inshuti.

Ibitekerezo

Tanga Igitekerezo