MYICT na NYC bongeye gutunga urutoki ikigo cy’igihugu gishinzwe amakoperative

Minisiteri y’Urubyiruko ndetse n’Inama y’Igihugu y’Urubyiruko bongeye gushyira mu majwi ikigo cy’Igihugu gishinzwe guteza imbere amakoperative (RCA) kutita ku rubyiruko bigatuma imihigo yarwo idindira.

Kuwa gatanu tariki ya 24 Nzeri 2016, ni bwo imihigo y’urubyiruko yashyizwe ahagaragara aho akarere ka Kamonyi kaje ku mwanya wa mbere n’amanota 80.2% na ho Rulindo iherekeza utundi n’amanota 62.4%. Muri rusange imihigo y’urubyiruko y’umwaka wa 2015-2016, yashyizwe mu bikorwa ku kigero cya 70.1%.

Mu mihigo y’urubyiruko y’umwaka wa 2015-2016 bari biyemeje ko mu turere 30 hagomba gushingwa impuzamakoperative y’urubyiruko imwe mu karere, ariko hashingwa agera ku icyenda bituma uturere twinshi tugira umutuku muri uwo muhigo.

Benshi mu bo twagiye tuganira bananiwe kwesa uwo muhigo bavuga ko bagiye batanga ibyangombwa bikenewe ariko ntibasubizwe cyangwa bagasubizwa amazi yarenze inkombe.

Ibi kandi bishimangirwa na Uwanyirigira Clarisse, umuhuzabikorwa w’Inama y’Igihugu y’Urubyiruko wavuze ko basaba iki kigo kubafasha kuko urwego ayoboye rubona ko akenshi bipfira muri iki kigo aho yita ‘Hejuru”

Yagize ati: “Turasaba RCA kugirango idufashe kuko ahenshi dukora impuzamakoperative ntibigende neza byagera hejuru bigapfa, turasaba kugirango batwegere kugirango za mpuzamakoperative dushaka tuzigereho”.

JPEG - 157.6 kb
Uwanyirigira Clarisse, umuhuzabikorwa w’Inama y’Igihugu y’Urubyiruko

Umunyamabanga Uhoraho muri Ministeri y’Urubyiruko n’Ikoranabuhanga, Rosemary Mbabazi, yavuze ko bibabaje kuba mu bijyanye n’ubukungu hari umutuku kandi ikivugo cy’Inkomezamihigo kibamo iterambere ry’Africa.

Yavuze ko ubukungu ariryo shingiro rya byose ariko ariho bakoze nabi babona 66% kandi u Rwanda rushaka kwigira. Byatumye asaba ubufatanye n’amakoperative.

Yagize ati : “Nashimishijwe nuko hari umukozi wa RCA hano, turashaka ubufatanye budasanzwe mu nzego z’ibanze, Amakoperative kugirango biriya bintu byo kubona ibyangombwa byihute ntibimare amezi atandatu, ntibimare umwaka..bikihutishwa ku buryo ukwishyirahamwe kw’amakoperative byihutishwe”

JPEG - 116.6 kb
Umunyamabanga Uhoraho muri Ministeri y’Urubyiruko n’Ikoranabuhanga, Rosemary Mbabazi,

Uyu muyobozi avuga ko urubyiruko rufite imbaraga nyinshi ariko bibabaje kuba bagenda badindizwa n’izindi nzego zishinzwe kubunganira mu bikorwa bitandukanye harimo nk’abashinzwe umuco ku karere, abayobozi b’inzego z’ibanze n’abandi.

Si ubwa mbere iki kigo gishyizwe mu majwi ku kurenza ingohe urubyiruko kuko tariki 27 Kamena, nabwo Perezida Kagame yabwiwe iki kibazo cy’uko urubyiruko rwangiwe gushinga amakoperative aho umunyeshuri yagize ati “Iyo twatse ibyangombwa batubwira ko nta koperative y’urubyiruko gusa yemewe”

Uwari umuyobozi wa RCA, Damien Mugabo, yasubije Umukuru w’Igihugu ko koko ariko bimeze kuko haramutse hashinzwe koperative y’abana cyangwa urubyiruko, ugejeje ku myaka 31 itamwemerera kwitwa urubyiruko bivuze ko yahita ayivamo.

Gusa Perezida Kagame yavuze ko ntacyo byaba bitwaye ndetse avuga ko hari ikintu yicuza ati: “Ubwo ureba nkubwira ibi nanjye ndimo ndigaya, kubona byarabaye gutya twese tureba, tukabikurekera ukabigira utyo, ntabwo ari ikibazo cyawe wenyine natwe turagifite.”

Yisangize Inshuti.

Ibitekerezo

Tanga Igitekerezo