Leta y’u Rwanda yababajwe n’urupfu rwa Shimon Peres wayoboye Israel

Minisitiri Mushikiwabo yigeze kuganira na Shimon Peres muri Nyakanga 2014

Minisitiri w’ububanyi n’amahanga akaba n’umuvugizi wa Guverinoma y’u Rwanda Louise Mushikiwabo yagaragaje akababaro U Rwanda rutewe n’urupfu rwa Shimon Peres wigeze kuba Perezida wa Israel watabarutse.

Shimon Peres witabye Imana afite imyaka 93 y’amavuko yigeze gutorerwa kuba Minisitiri w’intebe inshuro ebyiri ndetse nyuma aza no gutorerwa kuba Perezida wayoboye Israel kugeza muri 2014.

Peres yari amaze igihe kingana n’ibyumweru bibiri arwaye bikomeye nyuma y’ikibazo gikomeye yahuye na cyo kuwa 13 Nzeli ubwo imitsi y’ubwonko yaturikaga bigatuma amaraso atembera ajya mu bwonko bikaba ari byo byamuviriyemo urupfu.

Uyu ni umwe mu baperezida bitwaye neza mu buyobozi cyane cyane ku ngingo yo gukunda amaahoro kuko yanahawe igihembo cy’amahoro cyitiriwe Nobel (Nobel Peace prize) mu 1994 kubera uruhare yagize mu biganiro bigamije kugarura amahoro hagati ya Israel na Palestine

Aho yagiye avuga ati: “abanya-Palestine ni abaturanyi ba hafi ba Israel kandi banagomba kuba inshuti zabo za hafi”

Abinyujije ku rubuga rwe rwa twitter, Minisitiri w’ububanyi n’amahanga w’u Rwanda akaba n’umuvugizi wa Guverinoma, Louise Mushikiwabo yavuze ko ababajwe n’urupfu rwa nyakwigendera Peres ndetse avuga ko yifatanyije mu kababaro n’abanya-Israel ndetse n’umuryango wa Peres.

Yanditse ati: “Nifatanyije na Israel, Umuryango n’inshuti nyinshi za Shimon Peres, umunyepolitiki ukomeye watabarutse”

Minisitiri w’intebe wa Israel Benjamin Netanyahu uherutse gusura u Rwanda na we yagaragaje agahinda gakomeye yatewe n’urupfu rwa Shimon Peres. Ati "Ntewe agahinda kenshi n’urupfu rw’uwahoze ari Perezida mwiza w’igihugu”

Barack Obama, Perezida wa Leta zunze ubumwe za Amerika na we yavuze ko atewe agahinda n’urupfu rw’uyu mugabo yise inshuti ye amushimira ko yaranzwe n’icyerekezo cy’agaciro ka muntu n’iterambere, kandi ko yari azi ko abantu bafite ubushake bashobora gutera imbere ari uko bafatanyije.


Shimon Perez yatabarutse afite imyaka 93

Peres yavutse tariki 2 Kanama 1923 akaba yapfuye kuri uyu wa 28 Nzeli 2016, Yatorewe kujya mu Nteko Ishinga Amategeko ya Israel mu 1959 ndetse aza kuba Minisitiri w’ingabo mu 1976, yatorewe kuba Minisitiri w’intebe inshuro ebyiri kandi yabaye Perezida wa cyenda wa Israel, kuva muri 2007 kugeza muri 2014.

Yisangize Inshuti.

Ibitekerezo

Tanga Igitekerezo