Kuvuga ko Abanyarwanda baterwa ubwoba ngo bakore, ni ukubasuzugura-Sonia Rolland

3

Sonia Rolland, Umufaransakazi ufite inkomoko mu Rwanda yanenze abantu bagenda bavuga ko iterambere Abanyarwanda bagezeho riva ku guterwa ubwoba, avuga ko ibyo ntaho bitaniye no kuvuga ko Abanyarwanda badashoboye gutekereza cyangwa kwihitiramo icyo bakora.

Uyu mugore wabaye Nyampinga w’u Bufaransa mu mwaka wa 2000 akaba n’uwa mbere ukomoka muri Afurika wahawe iryo kamba mu Bufaransa, yabitangaje ubwo yaganiraga na Jeunafrique, mu gihe yitegura kwizihiza isabukuru y’imyaka 15 Umuryango yashinze Maisha Africa umaze ubayeho.

Tariki 19 Nzeli nibwo Maisha Africa izaba yujuje imyaka 15 ibayeho.Bimwe mu byo Sonia Rolland yishimira umuryango we wagezeho, ni ugufasha abana b’imfubyi barokotse Jenoside, bakava mu buzima bwo kwigunga kandi bubi, ubu bakaba bifashije batunze n’imiryango.

Sonia ufite nyina w’Umunyarwandakazi yagize ati “Hari byinshi twabashije guhindura.Twahereye ku byihutirwa. Umwaka wa mbere twahaye urusyo imiryango yari ihagarariwe n’abana, ngo babashe kujya basya amasaka.Bagiye banagurisha ifu ngo babashe kubona amafaranga.Twatanze kandi na moto ngo abazihawe babashe kubona akazi ndetse no kwihaza mubyo bakeneye.”

Sonia avuga ko hari n’abana Leta yubakiye inzu, gusa ngo yubatswe mu byondo.Abinyujije mu muryango we, batangiye gusana izo nzu bashyiramo sima, bubaka ibikoni n’ibindi.

Ati “Numva mfite ishema kubona abo bana bahagarariye imiryango, benshi tunangana babayeho mu buryo bwiza butandukanye n’ubwo nabasanzemo.”

Yakoze filime mbarankuru, izamura impaka...

Mu mwaka wa 2014, Sonia yatangiye gukora filimi mbarankuru ivuga ku mateka y’u Rwanda.

Yabwiye Jeunafrique ko iyo filimi yazamuye impaka, kubera Perezida Paul Kagame , ati “..na mbere yo kwandika uko izaba imeze, nakiriye abanenga benshi. Cyane cyane kuri Paul Kagame...ibivugwa ntiwabibara.Niyo mpamvu muri filime yanjye navuze cyane ku byakozwe n’abanyarwanda nishimiye. Igihugu gifite ubuyobozi bwiza ariko hari umuturage ugendera muri uwo murongo, Sintekereza ko hari uwafatiye imbunda ku bantu miliyoni icyenda ngo batere imbere.Gutekereza gutyo, ni ugusuzugura ubushobozi bw’Abanyarwanda bwo gutekereza no gukora ibyo bihitiyemo.”

Yanakomoje kandi ku mvururu ziri mu Burundi, asaba leta kurekera aho kwica urubyiruko.Kimwe no muri Repubulika Iharanira Demokarasi ya Congo, yasabye ko abayobozi bakwiye kurinda umutekano w’abaturage, banabarinda kwinjira mu mitwe yitwaje intwaro.

Sonia Rolland, yavutse mu mwaka wa 1980 kuri se w’Umufaransa na nyina w’Umunyarwandakazi, avukira mu Rwanda. Nyuma y’imyaka icyenda we n’ababyeyi be bimukiye mu Bufaransa ari naho atuye kuri ubu.Afite umuryango mu Rwanda, ndetse akunze kuhaza kenshi.Avuga ko nibura mu mwaka aza nka kabiri.

Yisangize Inshuti.

Ibitekerezo 3

Tanga Igitekerezo