Leta y’u Rwanda imaze kwemera ko ishyaka ryacu rifite gahunda -Habineza

Umuyobozi w’ishyaka riharanira Demukarasi no Kurengera ibidukikije mu Rwanda, Dr Habineza Frank, ari na we uzarihagararira mu matora ya Perezida, aravuga ko kuba kandidatire ye yaremewe by’agateganyo ari kimwe mu bimenyetso bigaragaza ko na Leta y’u Rwanda imaze kubona ko ishyaka ayoboye rifite gahunda mu byo rikora.

Ibi, Frank Habineza, witegura guhatanira umwanya w’umukuru w’igihugu ku iturufu y’ishaka riharanira Demukarasi no kurengera ibidukikije [Democratic Green Party of Rwanda (DGPR)] arabivuga mu gihe ari we na Perezida Paul Kagame baherutse kwemezwa na Komisiyo y’igihugu y’amatora by’agateganyo nk’abakandida bujuje ibyangombwa byo kwiyamamariza umwanya w’umukuru w’igihugu.

Mu kugaragaza uko ishyaka ryakiriye itangazo rya Komisiyo y’Amatora ribemerera kwiyamamaza by’agateganyo yagize ati:“Byaradushimishije kuko ibintu byacu nkuko twari twabiteguye neza komisiyo y’Amatora na yo yabiheye agaciro, ni ukuvuga ko ari intambwe nziza kuba twemerewe kwiyamamaza nubwo bikiri iby’agateganyo ariko na byo turabishimira kuko uburenganzira bwacu bwarubahirijwe.”

Habineza arashimira umuyobozi w’urwego rw’igihugu rw’imiyoborere kuba aherutse kwitabira inama y’inteko rusange ya Forumu y’Amashyaka ya politiki yemewe mu Rwanda akababwira ibigomba kwitonderwa mu gihe cyo kwiyamamaza kugirango bazitware neza ndese akanabibutsa uruhare rwabo mu miyoborere myiza.

Ngo kuba Leta y’u Rwanda ndetse na Forumu y’amashyaka batagikumira ishyaka ahagarariye rya DGPR mu biganiro bigamije kunoza imiyoborere myiza bimwereka ko bamaze kumva neza impinduka n’umusanzu waryo mu miyoborere myiza y’igihugu kandi ngo ni ibyo kwishimirwa kuko atari ko byahoze.

Ibi kandi ngo aranabihera ku kuba ishyaka rye risigaye ritumirwa no biganiro bigamije kubaka igihugu nk’inama y’igihugu y’umushyikirano n’izindi nama zitangirwamo ibitekerezo byubaka igihugu ndetse kugeza ubu rikaba ryaranatanze kandidatire ikakirwa ndetse rikanemerwa by’agateganyo kwiyamamariza umwanya w’umukuru w’igihugu.

Ati: “Guverinoma y’u Rwanda yatangiye kwemera ko ishyaka ryacu rifite umusanzu ryatanga mu kubaka igihugu, baragenda babibona gahorogahoro, ni na yo mpamvu basigaye badutumira muri gahunda zimwe na zimwe nk’inama y’umushyikirano, kandi kuba na Kandidatire yacu yaremewe by’agateganyo na byo ni ikindi kimenyetso kigaragaza yuko Leta y’u Rwanda imaze kubona ko ishyaka ryacu ari ishyaka rifite gahunda kandi ryiteguye gufasha abanyarwanda."

Avuga ko intambwe Leta y’u Rwanda yateye yo guha agaciro amashyaka atavuga rumwe n’ubutegetsi na DGPR irimo ngo agire ijambo mu miyoborere ikwiye kongera icyizere mu barwanashyaka b’ishyaka DGPR n’abandi bazabashyigikira muri aya matora ya Perezida wa Repubulika yimirijwe imbere.

Ati: “Iyo ntambwe igomba kongerera icyizere abantu bacu badushyigikiye ndetse n’abandi bikabereka yuko ibyo cyera bumvaga ko bidashoboka ubu bishoboka, kuko na FPR hari byinshi tugenda turwanya kandi na yo ikabyemera ikabikosora, bivuze yuko n’amatora bishoboka ko twayatsinda kandi byose birigaragaza.”

Dr Habineza akomeza avuga ko kuba ari ku rutonde rw’agateganyo rw’abakandida bemerewe kwiyamamaza byabongereye imbaraga mu gukomeza kwitegura kugirango igihe nyiriizina cyo kwiyamamaza nikigera bazabe biteguye.

Avuga ko ishyaka rye ryamaze gushyiraho komite z’ishyaka mu turere twose uko ari 30 ubu bakaba barimo gushyiraho abazaba bahagarariye ibikorwa byo kwiyamamaza mu rwego rw’imirenge.


Frank Habineza (iburyo) mu nama y’igihugu y’umushyikirano

Yisangize Inshuti.

Ibitekerezo

Tanga Igitekerezo