Kamonyi: Minisitiri Gatete yasabye abaturage guca ukubiri na ‘Siriduwiri’ (Amafoto)

Minisitiri w’Imari n’igenamigambi Amb. Claver Gatete asanga ibiyoboyabwenge bigira uruhare mu kwangiza ubuzima; ari nayo mpamvu yasabye abaturage kubyirinda ahubwo bagasenyera umugozi umwe bakitabira umurimo wo soko y’imibereho myiza.

Ibi Minisitiri Gatete yabitangarije abaturage b’Umurenge wa Runda, mu biganiro byamuhuje na bo nyuma y’umuganda rusange wo kuri uyu wa 29 Ukwakira 2016.

Nyuma y’uyu muganda wibanze ku gukora umuhanda werekeza ahari kubakwa ivuriro ry’amaso mu Kagari ka Muganza, Minisitiri Gatete mu mpanuro yahaye aba baturage yibukije ko ibiyobyabwenge ari bibi kandi byangiza umuntu.

Minisitiri Gatete yagize ati: ”njya numva ibiyoga by’ibikorano byitwa siriduwiri hirya no hino; kimwe n’ibindi biyobyabwenge byose ndabashishikariza kubireka no kubyirinda kuko nta kamaro kabyo ahubwo ni ibyo kutwangiza”.

Uyu muyobozi usanzwe ari imboni y’Akarere ka Kamonyi muri Guverinema y’u Rwanda, yasobanuye ko ibiyobyabwenge bituma umuntu asubira inyuma mu mibereho kuko umutungo w’ubikoresha usanga ushirira mu bintu bidafite umumaro; ndetse ntanagire umuco wo kuzigamira umuryango kuko aba yarabaye imbata y’ibi bikorwa mburamumaro.

Abitabiriye iki kiganiro na bo bemera ko ibiyobyabwenge bigira uruhare mu gusenya umuryango kuko ubikoresha nta bwenge aba agifite. Habimana Frederic wo mu Kagari ka Muganza mu Murenge wa Runda yagize ati: ” ibiyobyabwenge ntacyo bigeza ku muntu uretse kumwangiriza ubuzima no gukurura amakimbirane mu ngo”.

Uretse iyi ngingo irebana no kwirinda ibiyobyabwenge, Minisitiri w’Imari n’Igenamigambi Amb. Claver Gatete yasabye abaturage kugira umuco wo kuzigama kugira ngo bategure hakiri kare ejo heza h’imiryango yabo.

Minisitiri Gatete yavuze ko umuntu atazigama ibyo yasaguye cyangwa se kubera ko afite ubutunzi bwinshi, ahubwo ko kuzigama ari ukwigomwa ndetse buri wese mu bushobozi bwe akagira amafaranga abika akazamugoboka igihe runaka cyangwa akazafasha abamukomokaho mu buryo bunyuranye.

Ku ruhande rw’ubuyobozi bw’Akarere ka Kamonyi, Meya Aimable Udahemuka yashimiye abayobozi baje kwifatanya n’abaturage ashinzwe kuyobora muri uyu muganda usoza ukwezi k’Ukwakira, anasaba abaturage gukurikiza impanuro bagirwa kenshi n’ubuyobozi kuko bizabafasha kurushaho guharanira iterambere ryabo n’iry’igihugu muri rusange.


Umuganda waranzwe no gutunganya umuhanda wari warangiritse


Abaturage mu nama nyuma y’umuganda

Faustin NTAKIRUTIMANA

Yisangize Inshuti.

Ibitekerezo

Tanga Igitekerezo