Iperereza ku ihanurwa ry’indege ya Habyarimana ni igikangisho -Dr Bizimana

Dr Bizimana Jean Damascène, Umunyamabanga nshingwabikorwa wa CNLG.

Umunyamabanga Nshingwabikorwa wa Komisiyo y’igihugu yo kurwanya Jenoside (CNLG) yatangaje ko kuba igihugu cy’u Bufaransa gihora mu iperereza ritarangira ku ihanurwa ry’indege yaguyemo Juvenal Habyarimana wari Perezida w’u Rwanda, ari igikangisho bwitwaza mu rwego rwo gusibanganya uruhare rwabo muri Jenoside yakorewe Abatutsi

Kuri uyu wa 11 Ukwakira, Umunyamabanga Nshingwabikorwa wa Komisiyo y’igihugu yo kurwanya Jenoside (CNLG) Dr Bizimana Jean Damascène yasohoye inyandiko ivuga ku ruhare rw’abambasaderi babiri b’u Bufaransa muri Jenoside yakorewe Abatutsi.
Abo ba ambasaderi iyi nyandiko ivugaho ni Georges Martres (wabaye Ambasaderi w’u Bufaransa mu Rwanda kuva 1989 kugeza 1993) na Jean-Michel Marlaud (wabaye Ambasaderi w’u Bufaransa mu Rwanda kuva 1993 kugeza muri Mata 1994).

Dr Bizimana yavuze ko iyi nyandiko yasoye igamije kugaragaza uruhare rw’abantu ku giti cyabo muri gushyigikira umugambi wa Jenoside n’ishyirwa mu bikorwa ryayo.

Yavuze ko ubu bushakashatsi bufite umwihariko kuko ubundi bwagiye bukorwa bwagaragazaga uruhare rw’u Bufaransa nk’igihugu ariko ntibutunge agatoki abantu ku giti cyabo.

Ubwo yaganiraga na Radiyo Rwanda kuri ubu bushakashatsi, Dr Bizimana yanagarutse ku ipererereza ku ihanurwa ry’indege yaguyemo Juvenal Habyarimana wari Perezida w’u Rwanda.

Iri Perereza u Bufaransa bwaritangiye kuva 1997 ndetse kugeza n’ubu riracyakomeje kuko abacamanza babiri b’u Bufaransa Nathalie Poux na Jean-Marc Herbau baherutse kuvuga ko bagiye kongera gutangira iperereza kuri iyi dosiye,iri perereza ngo rizashingira ku buhamya bushya bazahabwa na Kayumba Nyamwasa wigeze kuba Umugaba Mukuru w’Ingabo z’u Rwanda.

Ibi Dr Bizimana kuri we ngo abifata nk’igikangisho u Bufaransa bukunze kwitwaza bushaka kwikuraho uruhare rwabwo muri Jenoside yakorewe Abatutsi.

Yagize ati: "Kuba iri perereza ridahagarara navuga yuko ari nk’igikangisho mu by’ukuri U Bufaransa bukunze gukoresha, kuko ni ibintu byatangiye muri 1997, noneho bigeze muri 2006 niho umucamanza Jean-Louis Bruguière yasohoye impapuro avuga ko iperereza rye yarirangije"

Icyo gihe raporo y’uyu Bruguière yashinjaga bamwe mu ngabo zari iza RPA kuba mu barashe indege ya Habyarimana, Nyamara iyi Raporo yanenzwe n’impuguke mu bushakashatsi bitewe nuko uwakoze iperereza atageze aho abo icyaha cyabereye.

Ibi Dr Bizimana na byo yabigarutse agira ati: "Nyamara twakunze kugaragaza ko iryo perereza ritari ryubahirije amategeko muby’ukuri kuko atari yaranigeze abaza abo yakekagaho icyaha, ntiyigeze anagera aho icyaha cyabereye ngo akore ubucukumbuzi asohora impapuro muri ubwo buryo"


Indege yari itwaye Habyarimana yaguye aho yari atuye i Kanombe

Iyi Raporo ariko nyuma gato yaje kuvuguruzwa kuko ngo "Nyuma gato muri 2007 niho dosiye yafashwe n’abandi bacamanza babiri basimbuye Bruguière aribo Marc Trévidic na Nathalie Poux bo bakomeza ubucukumbuzi ndetse muri 2010 baza mu Rwanda bazana n’impuguke zitandukanye, zirimo impuguke mu bumenyi bw’indege, impuguke mu bumenyi bw’ikirere,....noneho bakora igenzura bareba aho indege yaguye."

"...bashaka amakuru mu bantu bose bashoboraga kubona mu bice byose bya Kigali baza gusohora Raporo mu kwezi kwa mbere muri 2012 igaragaza ko amasasu yahanuye indege yari itwaye Perezida Habyarimana n’abo bari bari kumwe yarasiwe mu kigo cya gisirikare cya Kanombe."

Dr Bizimana ati:"Icyari gitegerejwe rero ni uko abacamanza bashingira kuri ubwo bushakashatsi no kuri iyo raporo yakozwe n’impuguke noneho bakerekana koko abagize uruhare mu guhanura iyo ndege, ni ukuvuga abari bacunze aho amasasu yahagurukiye"

Dr Bizimana yavuze ko uyu mucamaza (Marc Trévidic ) muri 2014 yatangaje ko ankete yayisoje noneho amenyesha abari baratanze ikirego barimo imiryango y’abaguye mu ndege cyane cyane abazungu b’Abafaransa n’umugore wa Habyarimana abamenyeshaka ko bafite igihe cy’amezi atatu yo kugira icyo bavuga kuri iyo dosiye no ku myanzuro yatanzwe n’impuguke.

Gusa ngo habura iminsi ibiri ngo hafatwe umwanzuro, nibwo ngo habonetse undi mutangabuhamwa. Ibintu Dr Bizimana afata nk’ibitangaje, ati: "Ariko icyaje gutangaza ni uko habura iminsi ibiri gusa ngo ayo mezi atatu arangire umucamanza afate icyemezo havumbutse umuntu ngo w’umutangabuhamya udasanzwe witwa Emille Gafirita atanzwe n’umugabo witwa Pierre Pean"

Uyu Pierre Pean, Dr Bizimana yavuze ko ari umunyamakuru w’umufaransa ukunze gusohora inyandiko zihakana zikanapfobya Jenoside yakorewe abatutsi ndetse akanagaragara mu bikorwa byo gusebya Leta y’u Rwanda.

Nyuma yuko uyu Pierre Pean amaze kuzana uyu yita umutangabuhamya mushya iperereza ryabaye nkaho rihagaze ari byo byatumye Marc Trévidic adasoza dosiye yari yatangiye.

Kuri ubu, Marc Trévidic wari watangiye iyi dosiye afatanyje na Natalie Poux ngo yahawe indi mirimo ari byo byatumye iyi dosiye ihabwa Poux n’undi mucamaza witwa Jean-Marc Herbau.

Perezida Kagame mu ijambo yavuze kuwa 10 Ukwakira 2016, yagarutse ku kongera gusubiramo iri perereza avuga ko niba kongera gusubiramo iperereza kuri iki kibazo bivuze guhangana, ngo u Rwanda rwiteguye guhangana.

Yagize ati "Niba kongera gusubiramo iperereza kuri iki kibazo bivuze guhangana, twiteguye guhangana, nta kibazo kirimo. Ntabwo bizaduhenda,...”

Yisangize Inshuti.

Ibitekerezo

Tanga Igitekerezo