Inama Tito Rutaremara agira abatavuga rumwe na leta y’u Rwanda bari mu mahanga

1

Senateri Tito Rutaremara aragira abanyapolitiki batavuga rumwe na Leta y’u Rwanda kuza mu gihugu kuhakorera politiki kugirango niba bifuza n’imyanya runaka mu buyobozi biyamamaze bayitorerwe.

Yabitangaje kuri uyu wa Mbere mu kiganiro Kimisiyo ishinzwe politiki muri Sena yagiranye n’itangazamakuru ku mahame remezo atandatu agize Itegeko Nshinga u Rwanda rugenderaho.

Muri icyo kiganiro,abanyamakuru bagarutse ku ihame ryo gusangira ubutegetsi nta bwikanyize, babaza niba nta kibazo bishobora gutera mu gihe ubutegetsi busangirwa n’amashyaka yemewe imbere mu gihugu, nyamara ugasanga hanze y’u Rwanda hari amashyaka menshi n’abanyapolitiki bavuka buri munsi bavuga ko batavuga rumwe na Leta y’u Rwanda.

Senateri Tito Rutaremara yavuze ko abanyapolitiki bari hanze bakwiye gutaha niba bashaka gutanga ibitekerezo byabo mu kubaka igihugu ndetse no guhatanira imyanya y’ubuyobozi.

Ati “Abo hanze nibaze kwiyamamaza mu gihugu, none se nibiyamamariza hanze bazajya batorwa na ba Macron cyangwa?Ni ukuza mu gihugu, itegeko ntiribabuza.Ni ukuza bakiyamamariza mu gihugu bagatorwa , ndibuka ko na Twagiramungu yavuye hanze araza ariyamamaza aratorwa, n’abandi bafite ubwo burenganzira igihe bubahirije amategeko.”

Yakomeje avuga ko Leta y’u Rwanda ntacyo yabikoraho igihe atari bo ubwabo bafashe umwanzuro wo gutaha.

Yavuze ko ushaka kuza gukorera politiki mu gihugu nta wamubujije igihe ntacyo ashinjwa.

Ati “Birashoboka ko waza ukaba uhari, cya gihe amategeko ateganya ukiyamamaza ugatsinda amatora. Ariko nta kundi wabigira, ntiwavuga uti nimwiyamamarize hanze , mutorerwe no hanze, mutegekere no hanze.Niwiyamamariza hanze ubwo uzategekera no hanze.Turabasaba nibaze mu Rwanda, niba ari uwibye bamubaze amafaranga yibye, niba ari uwakoze Jenoside bamubaze icyatumye ayikora, niba ntacyo yakoze ari muzima, agaruke.”

Hanze y’u Rwanda habarizwa amashyaka menshi amwe yashinzwe n’abahoze mu Rwanda bagahunga.

Victoire Ingabire Umuhoza niwe waje mu Rwanda mu mwaka wa 2010 avuga ko aje gukora politiki, ahageze akora ibikorwa n’amagambo yatumye ubutabera bumukurikirana bumukatira gufungwa imyaka 15 kubera ibyaha byo kugambanira igihugu agamije ku kivutsa umudendezo ndetse no gupfobya Jenoside yakorewe Abatutsi.

Undi uheruka kugerageza kuza mu Rwanda avuga ko aje gukora politiki ni Padiri Thomas Nahimana, icyakora inshuro zose yavugaga ko araza mu Rwanda ntiyahageze, agashinja Leta kubuza indege zose kumuzana, nyamara yo ikabihakana ivuga ko niba afite ibyangombwa nta cyamubuza.

Hari kandi Phillipe Mpayimana wabaga mu Bufaransa waje kwiyamamariza umwanya wa Perezida ndetse na Mbanda Jean Daniel waje avuga ko aje kwiyamamaza yagera mu gihugu agahindura umuvuno.

Yisangize Inshuti.

Ibitekerezo 1

  1. Niko Tito we mubyukuri ufite imyaka ingahe?uravahe urajyahe ?wizeye iki ku isi ?twagufatagaho ukuri nka Muzehe wacu none ukuri ukwimye agaciro .ugahesheje ikinyoma ukabasha ukavugako padiri nahimana abeshya ko atigeze ahaguruka aza kwiyamamaza . mugihe ibimenyetso bigaragara urwanda rumwangira kabiri kose! Byari kurutwa Niko wari guceceka nkuko nabandi bicecekeye bararumira.

Tanga Igitekerezo