Warning: imagejpeg(local/cache-gd2/584230f8977a0b2f5970d55dd6afaa41.jpg.tmp): failed to open stream: Disk quota exceeded in /home/makuruki/public_html/ecrire/inc/filtres_images_lib_mini.php on line 435
"Ibyo umushinjacyaha Fatou Bensouda avuga k’u Burundi ni ibikanga abana" Dr Kayumba .|. Makuruki.rw | Amakuru Asesenguye!

"Ibyo umushinjacyaha Fatou Bensouda avuga k’u Burundi ni ibikanga abana" Dr Kayumba

Dr Kayumba Christopher avuga ko ibyo Umushinjacyaha Fatou Bensouda avuga ari ibikanga abana/ Internet

Mu mpera z’ukwezi kwa Mata 2016 ni bwo umushinjacyaha mukuru w’urukiko mpuzamahanga mpanabyaha (ICC) madamu Fatou Bensouda yatangaje ko uru rukiko rugiye gutangiza iperereza ku bwicanyi n’ihohoterwa ry’uburenganzira bwa muntu bikomeje gukorerwa mu gihugu cy’u Burundi.

Ibi Bensouda yabitangaje nyuma y’urupfu rwa Gen Athanase Kararuza n’abo mu muryango we, bishwe kuwa wa mbere tariki 25 Mata 2015, ndetse na nyuma yo kubona raporo zitandukanye zivuga ku bwicanyi, iyicarubozo, ifungwa ku bantu batandukanye, gufata abagore ku ngufu n’irindi hohoterwa rishingiye ku gitsina ribangamira uburenganzira bwa muntu. Fatou Bensouda yatangaje ko bagiye gukora iperereza kuri ibi byaha ndetse n’ababa bafite uruhare muri ibi bikorwa kugira ngo babiryozwe.

Yagize ati: Abo bose bashinjwa gukora ibyaha mu bubasha rw’ubushinjacyaha bw’urukiko mpuzamahanga mpanabyaha bugomba gukurikirana buri muntu ku giti cye ukekwaho ibi byaha. Ibyaha by’ubwicanyi, gufunga abantu, iyicarubozo no gufata ku ngufu, byose bigomba kugezwa imbere y’ubutabera bwa ICC.”

Mu kiganiro Makuruki.rw yagiranye n’umusesenguzi muri Politiki mpuzamahanga akaba n’umwarimu muri Kaminuza y’u Rwanda, mu ishuri ry’itangazamakuru n’itumanaho, Dr Kayumba Christopher, asanga ibivugwa n’uyu mushinjacyaha ari ibikanga abana kubera ko ruriya rukiko rudafite ingabo cyangwa abapolisi bafata abantu mu gihe Leta y’u Burundi itabishaka, ariko na none Dr Kayumba agasanga ariya magambo ya Bensouda hari icyo yahindura ku bakora biriya byaha.

Dr Kayumba yagize ati: "Navuga ko biriya bya Fatou Bensouda ari ibikanga abana, n’ibikanga abana nta bwo ari ikintu ushobora kuvuga ko gishobora gutuma ibintu bihinduka ariko dushobora gufata mu buryo bubiri icya mbere ni uko gishobora kuzana icyo twita Psychological effect (Guhindura imitekerereze) kubakora ariya marorerwa, icya kabiri bishobora gutuma Leta ya Nkurunziza yemera gukemura ikibazo hakoreshejwe politiki."

Dr Kayumba akomeza yemeza ko nta cyizere cy’uko Fatou Bensouda yazana ubutabera mu Burundi, ibi akaba ngo abishingira ku kuba uru rukiko rwarananiwe kuburanisha abanyapolitiki bakoze ibyaha muri Kenya.

Yagize ati: "Kugira ngo ibyo bishoboke, bisaba kugira ngo na Leta ya Nkurunziza ibe ibishyigikiye kuko na rwo nta bwo rufite ingabo cyangwa Polisi zatuma biba Leta ibaye itabishaka. N’ubwo yabishaka (Bensouda) bashobora kumunaniza nk’uko muri Kenya byagenze, uribuka ko Perezida wa Kenya na Visi Perezida we babajyanye muri ruriya rukiko ariko urubanza rukananirana, Bensouda na we akavuga ko bamunanije."

Uyu mushinjacyaha mu rukiko mpuzamahanga mpanabyaha azamuye igitekerezo cyo kuvuga ko agiye gukurikirana abakoze ibyaha mu Burundi mu gihe hashize igihe kingana n’umwaka muri iki gihugu hadutse imvururu zahitanye abantu babarirwa kuri 400 abandi ibihumbi n’ibihumbi bakaba baravuye mu byabo bagahunga.

Uru rukiko kandi rwakunze kutavugwaho rumwe n’abakuru b’ibihugu byo ku mugabane wa Afurika aho bavuga ko rusa nk’urwagiyeho gukurikirana abanyapolitiki b’abanya Afurika gusa.

Hatagerejwe kureba ikizakurikira ibi byatangajwe n’umushinjacyaha mukuru wa ICC Fatou Bensouda niba bizashyirwa mu bikorwa cyangwa bigahera mu magambo.

Yisangize Inshuti.

Ibitekerezo

Tanga Igitekerezo