Gitifu w’Akarere ka Gicumbi yeguye, njyanama yamwemeje itabizi

1

Byiringiro Fidele wari Gitifu w’Akarere ka Gicumbi/Photo. Gicumbi Distr

Byiringiro Fidele wari Umunyamabanga Nshingwabikorwa w’Akarere ka Gicumbi yeguye ku mirimo ye ku mpamvu avuga ko ari ize bwite.

Meya w’Akarere ka Gicumbi yemereye Ikinyamakuru Izuba Rirashe ko bakiriye ibaruwa ye isaba guhagarika akazi kugira ngo abashe gukomeza amasomo y’icyiciro cya gatatu cya Kaminuza.

Uyu muyobozi uvuga ko yeguye ku mpamvu ze bwite, bivugwa ko yakunze kugaragaza imikorere idahwitse mu mitangire y’amasoko ya Leta muri ako Karere.

Nyamara mu kiganiro Makuruki yagiranye na Bizimana Jean Baptiste, Perezida w’inama njyanama y’Akarere ari nayo imwemeza yavuze ko nta busabe cyangwa andi makuru ajyanye n’iyegura rya Byiringiro barakira.

Yagize ati “Nanjye nabyumvanye abajyanama babimbaza. Kugeza ubu nta makuru mfite kuko ubundi executive iyo yeguye yandikira inama njyanama, kugeza ubu nka perezida nta rwandiko ndabona. Ubwo rero nta kintu narenzaho uretse kumva ibikuru gusa.Hari abantu bagiye bantelefona babimbwira ariko nta rwandiko nari nabona.Ubundi executive ashyirwaho n’inama njyanama iyo yeguye ubundi agomba kwandikira inama njyanama.Ubwo rero wenda ahari nuko ntageze ku Karere uyu munsi.”

“Meya ntacyo arambwira, gitifu ubwe nta bwo yigeze antelefona ambwira ko ashaka kwegura, rwose nta kintu mbiziho kandi ntimugirengo ni bya bindi byo gukwepa nuko nguko rwose.”

Bizimana abajijwe niba hari imikorere mibi njyanama yajyaga ibona kuri Byiringiro yagize ati “Kugeza ubu njyanama nta kintu yamunengaga rwose, ntacyo tumunenga.”

Makuruki yagerageje kuvugana na Mudaheranwa Juvenal uyobora Gicumbi ariko asubiza avuga ko ari mu nama.

Yisangize Inshuti.

Ibitekerezo 1

Tanga Igitekerezo