Gakenke: Ngo ijwi ryabo ntirishobora kugurwa amafaranga mu matora ya Perezida

Abaturage bo mu bice bitandukanye by’akarere ka Gakenke baravuga ko amajwi yabo ari ikintu gifite agaciro mu kubaka igihugu bityo ngo nta muntu ushobora kubashukisha amafaranga ngo bamusinyire ko bamushyigikiye mu matora ya Perezida kandi nta cyizere bamufitiye.

Muri iki gihe abantu bifuza kuba abakandida bigenga mu matora ya Perezida wa Repubulika ateganyijwe muri Kanama uyu mwaka, barimo gusinyisha ababashyigikiye kugirango buzuze umubare w’abantu basabwa ngo bemererwe kuba abakandida.

Kimwe mu bintu bibujijwe abantu bifuza kuba abakandida bigenga mu matora ya Perezida ni ugusinyisha ababashyigikiye babanje kubaha ibiguzi kuko komisiyo y’amatora ibifata nka ruswa kuko bashobora kumusinyira atari uko bamushyigikiye ahubwo ari uko bakurikiranye indonke muri uko kubasinyira.

Ibi Umunyamabanga Nshingwabikorwa wa Komisiyo y’igihugu y’amatora Charles Munyaneza aherutse kubikomozaho mu kiganiro yahaye abanyamakuru avuga ko mu minsi ishize hari uwakoze ikosa ryo gusinyisha abantu mu gihe kitagenwe ndetse ngo akanabaha amafaranga kugirango bamusinyire.

Yagize ati: “Ubundi gusinyisha ni mu masaha y’akazi, hari uwo twari tugiye kugirana ikibazo arimo asinyisha nijoro, arimo atanga n’amafaranga ariko twamubwiye ko aba abiretse! Gusinyisha ni ibintu bikorwa kugeza saa kumi n’ebyiri kandi bikorerwa ahantu hazwi runaka, kubikora nijoro nk’ibyo twumvise ntabwo byemewe.”

Ibi kandi byanashimangiwe na Guverineri w’Intara y’Amajyaruguru Musabyimana Jean Claude avuga ko gahunda zo gusinyisha mu ntara ayoboye zabanje kugaragaramo kudakurikiza amabwiriza no gutanga ruswa.

Ati: “Icyo gihe hari abazaga bakajya mu tubari, bagasanga abaturage mu kabari babasengerera, bagasinyisha abaturage batazi impamvu basinya, barababwiraga ngo hari imishinga, ngo barashaka kubafasha, bati none nsinyira aha, bati nunsinyira nzaguha ibi n’ibi, ibyo ni byo twanze ariko ubu biri kugenda neza.”

Abaturage batuye mu Mirenge ya Kivuruga na Gakenke yo mu karere ka Gakenke twaganiriye baravuga ko basobanukiwe n’agaciro k’ijwi ryabo bakemeza ko nta muntu ushobora kubashukisha amafaranga ngo bemere kumushyigikira kandi babona ntacyo yabagezaho aramutse atowe.

Ndayambaje Lambert w’imyaka 21 avuka mu kagari Rusagara mu Murenge wa Gakenke yagize ati: “Njyewe sinatora umuntu runaka ngo ni uko yandambitse imbere amafaranga, uwo numva uri mu bwonko bwanjye niwe natora numva afite iterambere agomba kujyanaho, hari aho amafaranga akora n’aho adakora.”

Nyiransababera na we utuye mu murenge wa Gakenke yagize ati: “Njye ntabwo nayemera, hari abo nzi bafite ibyo batugezaho, ubwo rero kumva ko umuntu yampa amafaranga ahurudutse gutyo ntabwo nabyemera rwose.”

Ibyo aba baturage bo mu Murenge wa Gakenke bavuga, babihuriyeho n’abo mu murenge wa Kivuruga kuko na bo bemeza ko gutora umuntu abanje kuguha amafaranga ari ruswa.

Ndarubonye Felicien utuye mu murenge wa Kivuruga yagize ati: “Ayo mafaranga nayanga, ntabwo nayemera kuko ntabwo yangeza ku byo nagezeho ubu ngubu, abo ni abashukanyi tumaze kubamenya.”

Ntuyenabo Theogene na we utuye mu Kivuruga yagize ati: “Amafaranga nk’urubyiruko ntacyo yatumarira, turashaka amafaranga ari mu bikorwa biduteza imbere ntabwo dushaka amafaranga yo mu ntoki, umuntu uzanye amafaranga sinamutora! ni ka ruswa yaba ampaye, byaba ari nko kungura.”

Prof Kalisa Mbanda uyobora Komisiyo y’igihugu y’amatora mu Rwanda yasabye abayobozi b’inzego z’ibanze gufasha abifuza kuba abakandida bigenga ariko na bo abasaba gukora mu buryo bwubahirije amategeko.

Ati: “Abimenyekanishije nk’abashaka kuba abakandida bakwiye kumenya uko bakorana n’abayobozi, bagasaba ubufasha kandi bigakorerwa ahantu hakwiriye ntibajye muri za bare, mu maresitora,…Icyo dusaba abayobozi ni ukumva ko bariya bifuza kuba abakandida ari abanyarwanda bafite uburenganzira bwo gutora no gutorwa kandi ko kubona amasinyatire ari amategeko abisaba, iyo biri mu mabwiriza yasohotse mu igazeti ya Leta abayobozi bagomba kumenya ibyasohotse mu igazeti no mu mabwiriza ya komisiyo y’igihugu y’amatora bakabyubahiriza borohereza abashaka gusinyisha.”

Kugirango umuntu yemererwe kuba umukandida wigenga mu matora ya Perezida mu Rwanda asabwa kugira abantu 600 bamusinyiye bemeza ko bashyigikiye kandidatire ye kandi muri buri karere hagomba kubonekamo abantu batari munsi ya 12.

Ibi ashobora kubikora ku giti cye cyangwa akagira abantu yamenyekanishije bamufasha ariko bakabikorera ahantu runaka hazwi kandi bakirinda gutanga ruswa. Ntibemerewe gusanga abantu aho bari ahubwo ababashyigikiye bagomba kubasanga aho biyemeje gukorera.


Ntuyenebo Theogene, umuturage wo mu Murenge wa Kivuruga

Ndarubonye Felicien, avuga ko nta mafaranga yagura ijwi rye.

Nyiransababera utuye mu murenge wa Gakenke.

Yisangize Inshuti.

Ibitekerezo

Tanga Igitekerezo