Gahunda ya 12+ Ni Nyampinga yageze kuki mu myaka ibiri imaze mu Rwanda?

2

Hashize imyaka ibiri mu Rwanda hatangiye gahunda yiswe 12+ Ni Nyampinga igamije guteza imbere no kubaka ubushobozi bw’umwangavu. Kuri ubu abanyarwanda barashima impinduka iyi gahunda yagejeje ku bangavu n’imiryango yabo.

Kuri uyu wa 29 Ukwakira 2016, Madamu Jeannette Kagame, umufasha wa Nyakubahwa Perezida Kagame yatangije umwaka wa gatatu wa gahunda yiswe cumi na kabiri guteranya Ni Nyampinga (12+Ni Nyampinga Program).

Ni gahunda igenewe kwigisha abana b’abakobwa bari hagati y’imyaka 10 na 12 inyigisho zitandukanye zirimo ubuzima bw’imyororokere, kwihangira imirimo, kwizigamira, gukora uturimo dutandukanye tubyara inyungu, imibanire, imiyoborere n’ibindi.

Gahunda y’ubumenyi butandukanye bugenerwa aba bana b’abakobwa, irebererwa na Ministeri y’Ubuzima, igaterwa inkunga n’ikigega cy’iterambere cy’Abongereza (DFID), Girl Effect Rwanda, Caritas Rwanda na World Relief mu ishyirwa mu bikorwa ryayo.

Hari kandi abandi bafatanyabikorwa barimo umuryango wa Imbuto Foundation Madamu Jeannette Kagame akaba ari we uwubereye umuyobozi w’ikirenga.

Hari kandi abana b’abakobwa b’abafashamyumvire (Mentors) ndetse n’Abahuzabikorwa b’Uturere (District Supervisors) bafasha mu guha ubumenyi aba bana.

Iyi gahunda ya 12+ ikorera mu turere 10 tw’u Rwanda, ari two Rulindo, Gicumbi, Gakenke, Musanze, Burera, Nyabihu, Ngororero, Rutsiro, Karongi na Rubavu.

Umwaka wa gatatu wa 12+ Ni Nyampinga watangirijwe mu Kagari ka Bugaragara, Umurenge wa Shyorongi, mu Karere ka Rulindo mu ntara y’amajyaruguru.


Madamu Jeannette Kagame na Minisitiri w’ubuzima Dr Diane Gashumba
batangiza umwaka wa gatatu wa 12+

Mu buhamya bwatangiwe muri uyu muhango wabanjirijwe n’umuganda wo gutera ibiti mu mu Rwunge rw’Amashuri rwa Shyorongi, bwagaragaje ko iyi gahunda ya 12+ Ni Nyampinga yahinduye byinshi mu buzima bw’abana b’abakobwa b’abangavu ndetse no mu buzima bw’imiryango yabo muri rusange.

Agaruka ku byagenzweho n’iyi gahunda mu ncamake, Madamu Jeannette Kagame yagize ati: "Mu Rwanda hose mu myaka ibiri (2) ishize abana b’abakobwa
ibihumbi mirongo itanu na bibiri (52,000), bamaze gukora urugendo rwa Ni Nyampinga (12+program) kandi bungukiyemo byinshi bitandukanye bijyanye n’ubuzima bwabo, imibanire n’abandi ndetse no kwiteza imbere mu bukungu."

Yakomeje agira ati: "Umwaka ushize abana 80% bitabiriye iyi gahunda, bagaragaje ko bakoze akarima k’igikoni iwabo, bakanagira n’uruhare mu kugira
inama imiryango yabo, ku bijyanye n’imirire myiza. 63% bayobotse umuco wo kuzigama naho 21 % bari bamaze gufunguza za Konti, mu gihe 61% bafite ibikorwa bito bibazanira inyungu."

Vestine Nyiramahirwe wo mu karere ka Musanze, wiga mu mwaka wa mbere w’amashuri y’uburezi bw’ibanze, yatangiye akarima k’igikoni mu bumenyi yakuye muri gahunda ya 12+ NiNyampinga, none ubu umuryango we ugemurira imboga hoteli ikomeye muri ako Karere, kandi ntacyo byahungabanyije ku myigire y’uwo mwana.

Uretse aba bana bavuga imyato ibyiza by’iyi gahunda, Ababyeyi batandukanye na bo bagiye batanga ubuhamya bavuga ko ubumenyi abana babo bakura muri Ni Nyampinga ari ntagereranywa kandi ko buhindura ubuzima bw’umuryango wose.

Kubera ibyiza iyi gahunda imaze kugeza kuri aba bangavu, Madamu Jeannette Kagame yavuze ko hakwiye kurebwa uburyo igera no kuri basaza babo.

Ati: "Hakenewe kandi kureba uko na basaza b’aba bana bagenerwa iyi gahunda. Ubwo Ministeri yazaturebera niba byashoboka, maze
abana bose bakure bafite intego n’imyumvire imwe kandi
isobanutse."

Madamu Jeannette Kagame yibukije abana ko “Kugira intego y’ubuzima bitangira kare”, kandi ko ababyeyi babifuriza kuzavamo abana bafite icyerekezo, bakazavamo ababyeyi n’abayobozi bazima.

Mu Rwanda hose hari ahantu 490 hiswe ‘Uruhongore’, hakaba ari ho abo bana bahurira buri mpera z’icyumweru, bagafashwa n’abakobwa bagera 1603 bahuguriwe kuba abafashamyumvire bagahabwa ubumenyi mu gihe cy’amezi 10.

Madamu Jeannette Kagame mu muganda wo gutera ibiti mu Rwunge rw’Amashuri rwa Shyorongi

Mukatwizeyimana Alphonsine atanga ubuhamya ku kamaro ka gahunda ya 12+

Amina Merci avuga uburyo gahunda ya 12+ yayungukiyemo ubumenyi bwamufashije gutangiza imishinga iciriritse y’ubuhinzi bw’imboga n’ubworozi bw’amatungo magufi

Yisangize Inshuti.

Ibitekerezo 2

  1. Tubashimiye amakuru mwaduhaye ariko twabasabaga kujya mushyiraho nibukorwa byanyu bya buri munsi!
    urugero nkibikorwa byabari byingendoshuri!
    Murakoze!

  2. Tubashimiye amakuru mwaduhaye ariko twabasabaga kujya mushyiraho nibukorwa byanyu bya buri munsi!
    urugero nkibikorwa byabari byingendoshuri!
    Murakoze!

Tanga Igitekerezo