GICUMBI: Bagenda ibirometero 8 bagana ku ishuri, Ushinzwe uburezi ati: ’ni yo miterere y’Akarere’

2

Bamwe mu banyeshuri biga muri G.S.Kageyo baturuka mu Centre ya Rwasama bagorwa cyane n’urugendo rwa buri munsi bakora bajya ku ishuri kuko bo bavuga ko bakoresha amasaha abiri ku munsi bajya ku ishuri n’andi abiri basubirayo.

Intera iri hagati ya Rwasama n’ishuri bigaho ugereranyije iri hagati y’ibilometero 4 na 5 abiga mu wa gatandatu w’amashuri abanza bakaba bahangenda inshuro inshuro enye ku munsi. Ubwo ni ibilometero birenga 16 bagenda.

Aba banyeshuri biga bataha abagaragaje imbogamizi ku myigire yabo ni abanyeshuri biga mu mwaka wa 6 w’amashuri abanza kuko biga guhera saa moya za mu gitondo kugeza saa kumi n’imwe z’ikigoroba.

Nk’uko babyivugira ntabwo bagorwa n’amasaha bamara mu ishuri ahubwo ngo ikibabangamira cyane ni igihe cya saa sita kuko bajya kurya mu ngo zabo bakagaruka saa sita na 45 ( 12h:45)

Mukanshimiyimana Sophie ni umwe mu banyeshuri biga kuri iki kigo akaba ataha muri Rwasama, mu mbogamizi ahura nazo yatangarije Makuruki.rw harimo amasaha menshi amara mu nzira.

Yagize ati: “Kuva mu rugo kugera ku ishuri nkoresha isaha n’igice, hari igihe imvura igwa tukiri mu rugo tugasiba cyangwa ikadusanga mu nzira tukanyagirwa, amakayi agashwanyuka.”

Iki kibazo abanyeshuri bataha muri Rwasama bagihuriyeho bose kuko imiterere yaho n’uwagira amikoro yo gutega imodoka cyangwa moto ntiyayibona kuko ni mu musozi uhanamye kandi nta n’umuhanda ugera ku ishuri.

Ababyeyi babo nabo bahangayikishijwe n’imyigire y’abana babo kuko ngo muri ibi bihe by’imvura abenshi Babura uko bagenda bakirirwa mu rugo. Mutuyeyezu Drocelle ni umubyeyi utuye muri Rwasama; ni umwe mu barerera muri G.S.Kageyo mu ngorane abana babo bahura na zo ngo urugendo rwa buri munsi rubatera umunaniro udashira.

Ati: “Buri munsi babyuka saa kumi n’imwe bakagaruka bwije, ntibaryama bahorana umunaniro, nta n’ujya ashobora gusubiramo amasomo. Ni nayo mpamvu badatsinda neza.”
Kimwe n’abandi babyeyi bafite abana biga muri iri shuri, bose bahuriza ku kuba urugendo abana babo bakora rutuma badatanga umusaruro bakabaye batanga ariko bakanavuga ko muri ibi bihe by’imvura abana benshi basiba cyangwa bagakererwa.

Ushinzwe uburezi mu karere ka Gicumbi, Nsengimana jean Damascene avuga ko imiterere y’Akarere ari yo ntandaro y’abana bakora ibirometero byinshi bajya ku mashuri.

Ubwo Makuruki.rw yamubazaga niba kwiga kure kw’abanyeshuri kutaba gufitanye isano n’amashuri make yaba ari mu karere yavuze ko akarere gafite nk’amashuri ahagije kandi ko buri Murenge ufite nibura amashuri 2.

Yagize ati: “Muri rusange mu Karere ka Gicumbi hari amashuri 124, ni amashuri ahagije ariko akarere ka Gicumbi kagizwe n’imisozi myinshi kandi miremire niyo mpamvu hababera kure.”

Akarere ka Gicumbi gafite ayabanza 43, uburezi bw’ibanze bw’imyaka 9 (9Years basic education) ni amashuri 24 naho imyaka 12 (12years basic education) ni amashuri 25 hakabamo amashuri y’igenga abanza 4 n’amashuri yisumbuye yigrnga 3.

Yisangize Inshuti.

Ibitekerezo 2

  1. Ubwose uriya muyobozi ushinzwe uburezi mu karere ibyo yavuze ngo nimiterere abona ariwo muti ? ibirometero bingana kuriya ?!!! barebe uko bakuitabaza izindinzego hubakwe andi mashuri hafi.

Tanga Igitekerezo