Emmanuel Macron, yaba ari we ugiye kuzahura umubano w’u Rwanda n’Ubufaransa?

1

Emmanuel Macron, umukandida w’ishyaka rishya mu Bufaransa, En Marche, kuri iki cyumweru yabashije gutambuka ku mwanya w’imbere mu cyiciro cya Kabiri cy’amatora y’umukuru w’igihugu giteganyijwe tariki 7 Gicurasi uyu mwaka.

Kuva Jenoside yakorewe Abatutsi yahagarikwa, umubano w’Ubufaransa n’u Rwanda wajemo agatotsi, ahanini bitewe n’uruhare rwa Leta y’Ubufaransa mu gufasha Leta yateguye ikanashyira mu bikorwa Jenoside.

Uwo mubano wakomeje kugenda ucumbagira, bihumira ku mirari mu mwaka wa 2006 ubwo umucamanza Jean Luois Brouguiere yasohoraga raporo ishinja bamwe mu bayobozi bakuru b’u Rwanda uruhare mu ihanurwa ry’indege yari itwaye Perezida Habyarimana.Icyo gihe hanashyizweho impapuro zo guta muri yombi abo bayobozi.

Icyo gihe ibihugu byombi byaciye umubano, wongera gusubukurwa muri 2009 ubwo Ubufaransa bwayoborwaga na Nicholas Sarkozy, gusa nabwo wagendaga gahoro.

Muri 2012, abacamanza b’Abafaransa, Marc Trévidic na Nathalie Poux, bakoze iperereza ku ihanurwa ry’indege ya Habyarimana, muri 2014 basoza batangaza ko ibisasu byarashe iyo ndege byarasiwe mu kigo cya gisirikare i Kanombe, ahabaga ingabo zarindaga Perezida Habyarimana.

Umubano w’u Rwanda n’u Bufaransa wongeye kuzamba bitunguranye mu Ukwakira 2016, ubwo Nathalie Poux na Jean Marc Herbau batangazaga ko bagiye kongera gukora iperereza ku ihanurwa ry’indege yaguyemo Juvenal Habyarimana na Cyprien Ntaryamira wayoboraga u Burundi.

Ibi byabaye nko kongera urusenda mu gisebe, maze tariki ya 10 Ukwakira 2016 ubwo Perezida Paul Kagame yatangizaga umwaka w’ubucamanza, avuga ko niba ibyakozwe n’Ubufaransa ari ugushaka guhangana, u Rwanda rwiteguye.

Yagize ati “Nyuma yo gukurikirana iki kibazo imyaka ibiri ikarangira ntacyo babonye bakanabura ibihamya, kuri ubu ndasoma mu bitangazamakuru ko bashaka kongera gutangira iperereza bundi bushya. nta kibazo tuzatangire njye nta kibazo mbifiteho, ariko gutangira bundi bushya bisobanuye byinshi kuri njye… Niba kongera gusubiramo iperereza kuri iki kibazo bivuze guhangana, twiteguye guhangana, nta kibazo kirimo. Mubimparire nzabyikemurira. Ntabwo bizaduhenda, iyo ari uburenganzira bwawe uharanira, ntabwo bitwara ikiguzi kinini guharanira ukuri. ”

Icyo gihe Kagame yakomoje ku kongera gufungwa kwa Ambasade z’ibihugu byombi nkuko byagenze mu 2006, maze avuga ko abantu bakwiye kubyitegura.

Macron yaba ari we mucunguzi w’umubano w’ibihugu byombi?

Kuzamuka kwa Macron utari uzwi cyane mu ruhando rwa Politike y’Ubufaransa kwatunguye benshi.Mu ntangiriro kubw’ishyaka rye ritazwi cyane na we ubwe, nta wamuhaga amahirwe yo kurenga umutaru, no kumuvugaho cyane byagiye biba gake.

Nyuma yo gutsindwa kwa Alain Juppe na Sarkozy, amaso yose yahanzwe Francois Fillon na Marine Le Pen, Macron we benshi bavugaga ko atazarenga icyiciro cya mbere cy’amatora.

Bitunguranye kuri iki Cyumweru Macron yatsindiye kugera mu cyiciro cya Kabiri, amajwi yose atangira kwisuka kuri Macron ndetse ubu niwe uhanzwe amaso ku itariki 7 Gicurasi.

Ukurikije gahunda ya Macron kuri Afurika, bigaragara ko ashishikajwe n’imibanire myiza y’igihugu cye na Afurika.

Ubwo yaganiraga na Jeunafrique mu minsi ishize, Macron yagarutse ku bikorwa bya kinyamaswa Ubufaransa bwakoreye Afurika haba mu Bukoloni na nyuma yabwo maze agira ati “Ubukoloni bwagize uruhare mu bugizi bwa nabi bwatwaye ubuzima bw’abantu.Sininjira cyane mubyo kwihana ariko sinifuza ko ayo mateka asibangana gutyo gusa, kuko kuyibuka ni byo bizadufasha kubaka ejo hazaza heza.

Aganira na Televiziyo yo muri Algeria mu minsi ishize yagize ati “Birababaje kandi ni amateka yacu ku buryo dukwiye guhura n’abo twahemukiye tukabasaba imbabazi z’ibyo bikorwa.”

Ukurikije izo mvuga za Macron, nta gushidikanya ko naramuka atsinze amatora ashobora kuzazahura umubano w’igihugu cye n’ibihugu bya Afurika n’u Rwanda rurimo.Icyakora nta wakwizera niba koko azemera gusaba imbabazi z’uruhare rwa Leta ye muri Jenoside yakorwe Abatutsi, dore ko kuzisaba bishobora no gushora icyo gihugu mu gutanga indishyi za bimwe mu byangijwe.

Dr Aggee Shyaka Mugabe, Umwarimu muri Kaminuza y’u Rwanda akaba n’umusesenguzi mu bya politiki, aherutse kubwira Ikinyamakuru The EastAfrican ko Macron ashobora kuba afite ibitekeerzo bishya ariko bigoye kumutandukanye n’ahahise he.

Yagize ati “Macron ni umusosiyalisiti (ishyaka yahozemo) ari nabo bari ku butegetsi ubwo Jenoside yakorwaga mu Rwanda, simbona rero ko yanyuranya n’abamubanjirije.”

Mu migambi ya Macron, harimo guteza imbere umugabane wa Afurika cyane cyane Afurika y’Amajyaruguru ndetse n’iyo hagati, ari naho u Rwanda rubarizwa.

Yisangize Inshuti.

Ibitekerezo 1

  1. Politique ya macro simbi nabusa gusa nkurikije naho isi irikugana biragoye ko politique ye yagira succès bitewe nuko isi yanone ikineye abanyapolitike bashyirimbere nationalisme .
    Kubwibyo marine le pen ashobora kumwanikira.

Tanga Igitekerezo