“Ariya matora ya Amerika yadusigiye isomo” Min Mushikiwabo

Minisitiri w’ububanyi n’amahanga w’u Rwanda Louise Mushikiwabo yavuze ko amatora ya Perezida Zunze Ubumwe za Amerika yasigiye isomo abayobozi bo muri Afurika ryo guha agaciro ibyifuzo by’abaturage babo.

Kuri uyu wa Kabiri muri Amerika nibwo habaye amatora ya Perezida, yegukanwa n’umunyemari Donald Trump utarahabwaga amahirwe cyane ugereranyije na Hillary Clinton bari bahanganye.

Mu kiganiro n’abanyamakuru kuri uyu wa Kane, Minisitiri Mushikiwabo yavuze ko ibyabaye muri Amerika ari isomo rikomeye ku bayobozi ba Afurika badaha agaciro ibyifuzo by’abaturage bayoboye.

Yagize ati “Twebwe nk’u Rwanda n’ibindi bihugu byinshi ariko njyewe navugira u Rwanda, nuko ariya matora ya Amerika adufitiye isomo ry’uko abanyapolitike bagomba gutega amatwi abaturage.Ibyo nicyo kintu gikomeye ."

Yongeyeho ati" Ushobora kuba umunyapolitiki, ukajya mu kazi ugakorana n’abandi banyapolitike ariko ni ngombwa ko dusubiza amaso hariya mu nzego z’ibanze tukareba icyo abaturage bifuza.”

Yakomeje avuga ko muri Amerika nibamara gushyiraho guverinoma nshya imyanya yose ifite abayobozi, ngo u Rwanda ruzifuza kumenyana nabo kugira ngo umubano w’ibihugu byombi ukomeze kuba mwiza.

Kuri uyu wa Gatatu ubwo Trump yamaraga gutangazwa nk’uwatsinze amatora, Perezida Paul Kagame yaramushimiye, anavuga ko yizeye ko umubano w’ibihugu byombi uzakomeza.

Yagize ati "Ndagushimiye Donald Trump ku ntsinzi wabonye kandi neza.Twizeye gukomeza umubano mwiza na Leta Zunze Ubumwe za Amerika ndetse n’ubuyobozi bushya."

Minisitiri Mushikiwabo yavuze ko banakoresheje inzira zo kwandika , U Rwanda rubinyujije muri Minisiteri y’Ububanyi n’amahanga rwifuriza imirimo myiza Donald Trump watowe.

Yisangize Inshuti.

Ibitekerezo

Tanga Igitekerezo