"Abanyarwanda turashaka kwiyobora, ntabwo bizaza nk’impano"Perezida Kagame

Perezida Talon (ibumoso) na Perezida Kagame mu kiganiro n’abanyamakuru

Perezida wa Benin Patrice Talon, uri mu ruzinduko mu Rwanda na Perezida Kagame bavuze ko mu bihugu bitandukanye abantu aribo bishyiriraho Itegeko Nshinga bagendeye ku bizabagirira akamaro, batarebeye kubyo abandi bakoze cyangwa ibyo bababwira.

Ni mu kiganiro Perezida wa Repubulika Paul Kagame ndetse na Perezida Patrice Talon bagiranye n’itangazamakuru kuri uyu wa 31 Kanama 2016, ku migendekere y’urugendo rw’uyu mukuru w’Igihugu rwatangiye kuwa 29 kugeza kuri 31 Kanama 2016.

Ibi Perezida Kagame na Perezida Talon babishingiye ku kibazo bari babajijwe n’umunyamakuru wa RFI, wabajije agendeye ko Perezida Talon yavuze ko ashaka ko mu gihugu cye bazajya bayobora manda imwe, mu gihe mu Rwanda abaturage batoye ko Itegeko Nshinga rivugururwa Perezida Kagame akongera akayobora Abanyarwanda.

Mu magambo macye ndetse yasubiyemo kabiri, Perezida Talon yavuze ko ubwoko bwa muntu,uko ibihe biha ibindi, hashingiwe ku mateka,ndetse n’uko ibintu bimeze, abaturage aribo bashyiraho amategeko bazagenderaho.

Yagize ati “Mu mibereho ya muntu, abantu nibo bashyiraho ibibabereye kuko ibifitiye akamaro Benin sibyo bifitiye akamaro u Bushinwa, Libiya bakabikora bagendeye ku bibafitiye inyungu, ubuzima bwiza bafite ntabwo ari ibintu bishushanyije ngo bikoreshwe ahantu hose”.

Perezida wa Benin yavuze ko iki gitekerezo yakigize agitewe nuko yashakaga guhindura ibyakoreshwaga kuva cyera ndetse abona ko byagirira akamaro ahazaza ha Benin , kuko iyo biba ngombwa yari kuvuga imyaka 15, 20 cyangwa 30.

Mu gusubiza iki kibazo Perezida Kagame nawe yunze murya mugenzi we, ko mbere na mbere abantu bareba ikibafitiye akamaro ubundi.

Perezida Kagame yavuze ko nubwo ibinyamakuru by’i Burayi biba byirengagiza ukuri kw’itandukaniro ry’ibihugu n’ibindi ariko bazi ko n’I Burayi ubwaho babikora bitewe n’igifitiye akamaro igihugu.

Ati“ Iyaba biyumvishaga ibyo tunyuramo buri munsi, uko abaturage bacu babayeho…Iyaba biyumvishaga ibyo, batwigiraho amasomo maze bakaduha akaruhuko.

Yakomeje agira ati “ Twebwe Abanyarwanda, turashaka kwiyobora ubwacu mu buryo butubereye. Si ibintu duhabwa nk’impano iturutse hanze cyane ko naho bafite ibibazo bikomeye by’imiyoborere”.

Perezida Kagame yavuze ko ibihugu bikomeye kuri ubu biri mu bibazo bishingiye ku miyoborere mibi nubwo babirengaho bakaza gutanga amabwiriza muri Afurika.

Uruzinduko rwavuyemo amasezerano

Perezida Kagame na Perezida wa Benin bavuze ko muri uru ruzinduko hasinywe amasezerano mu rwego rwo gukomeza umubano hagati y’ ibihugu byombi n’Afurika muri rusange.

Perezida Patrice Talon, yasobanuye ibyagezweho muri aya masezerano yasinywe hagati y’ibihugu byombi ati “ Ubuhahirane hagati y’Ibihugu byombi bushingiye ku bucuruzi, guteza imbere ishoramari, guteza imbere ubukerarugendo, inganda zikora imyenda n’ibindi."

Twabibutsa ko Ipamba muri Benin ryihariye 40% by’amafaranga yinjira mu gihugu avuye mu byoherezwa hanze na 12% by’umutungo mbumbe w’igihugu ndetse 60% by’inganda mu gihugu ziritunganya.

Talon yavuze ko mu masezerano bagiranye n’u Rwanda harimo n’ubucuruzi bw’indodo bizafasha u Rwanda ruteza imbere gahunda zarwo z’ibikorerwa mu Rwanda.

Uyu mugabo mu ruzinduko rwe yasuye ikigo cy’Igihugu gishinzwe Iterambere, RDB, agace kahariwe inganda kazwi nka Special Economic Zone ndetse agirana ibiganiro byihariye na mugenzi we Perezida Kagame, aho mbere yo gusoza uruzinduko bagiranye ikiganiro n’itangazamakuru.

Yisangize Inshuti.

Ibitekerezo

Tanga Igitekerezo