Abakandida bigenga ni nk’ikigeragezo mu matora ya Perezida –Prof Mbanda

5

Perezida wa Komisiyo yigihugu y’amatora mu Rwanda Prof Kalisa Mbanda yavuze ko abashaka kuba abakandida bigenga mu matora ya Perezida wa Repubulika ari nk’ikigeragezo kuko akenshi baba bazi neza ko badashobora gutsinda ariko bakiyamamaza bagamije kuruhanya no kunenga imikorere ya Komisiyo y’amatora.

Ibi Prof Mbanda yabitangaje kuri uyu wa 22 Gicurasi mu nama yagiranye n’abayovozi mu nzego zitandukanye z’intara y’Amajyaruguru ku ngingo yo gutegura amatora ya Perezida wa Repubulika azaba muri Kanama uyu mwaka.

Yagarutse ku myitwarire y’abashaka kuba abakandida bigenga mu matora ya Perezida wa Repubulika aho yabanengaga kuba baza guhatana bavuga ko bashaka kuba Perezida nyamara hari ibindi bagamije cyane cyane ko baba bazi ko badashobora gutsinda aya matora maze bigatuma bitwara uko bashatse.

Uku kuza kwiyamamaza kandi bagamije kurushya komisiyo y’amatora bakarenga ku mategeko n’amabwiriza ya Komisiyo y’amatora ni byo Mbanda yise ikigeragezo bashyira kuri iyi komisiyo.

Yagize ati: “Iteka buri cyiciro kije cy’amatora haba harimo ikigeragezo, nta tora risa n’irindi, iteka haba harimo agashya kandi iteka haba harimo abantu bashya biyongeramo. Agashya dufite muri aya matora cyane cyane ni abashaka kuba abakandida bigenga, ubu ngubu tubafite ari batatu hashobora kuzaza n’undi wa kane. Hari Mpayimana Philippe waturutse i Burayi, hakaba umukobwa Rwigara Diane hakaba na Mwenedata Gilbert wigeze kwiyamamaza mu matora y’abadepite.”

Usanga rero bose ari abasore ugasanga bose barimo kugerageza, ni nk’ikigeragezo baba batuzaniye bati turebe uko u Rwanda rwifashe mu matora, bakaza bafite n’amaraso mashyashya, bagasoma vuba vuba amabwiriza tubaha bagasa n’abayanyura hejuru bagakurikiza ibitekerezo byabo uko babikora.”

Avuga ko baba barabahaye gahunda y’amatariki n’ibikorwa biyateganyijweho ariko bagatangira ibyo bikorwa amatariki ataragera kubera gushyuhaguzwa kw’amaraso ya gisore.

Yavuze kandi ko hari abatanguranwe bakajya gusinyisha abantu bakoresheje impapuro bishakiye kandi hari izo komisiyo y’igihugu y’amatora yari yarateganyije, yongeraho ko hari aho bavogera imikorere y’ubuyobozi bw’inzego z’ibanze.

Ati: “Ikindi gishya bazana ni ukwinjira mu ifasi y’ubuyobozi nk’uwinjira mu isoko, ugasanga ntabwo yagiye ku muyobozi w’umudugudu, ntagiye kuw’Akagari, ntajye k’uw’Umurenge ngo avuge ati ndi kanaka dore nabonanye na Komisiyo y’amatora nje gukora iki n’iki, akaza rwose nk’uwinjira mu isoko agatangira agakora.”

Ku bijyanye no gusinyisha ababashyigikiye, Mbanda yavuze ko hari ababanje kubikorera mu tubari, na resitora kandi nyamara komisiyo yarababwiye ko bagomba kubikorera ahantu hazwi habugenewe bemerewe n’ubuyobozi bw’akarere.

Ati: “Uwo mukobwa Dianne we atanga amafaranga, tukamubwira tuti ntabwo ugomba gutanga amafaranga! ati rwose abantu baransinyira nkabona ko bangiriye neza, kandi ndeba bakennye ngashaka kubafasha kubakura mu bukene nkabaha amafaranga.”

Yakomeje ati: “Mwenedata we akavuga ati nziko ntazatsinda ariko ndashaka kureba rwose ko mfite uburenganzira bwanjye! tuti ufite uburenganzira ariko n’abandi bafite ubwabo ntabwo ugomba gukandagira ubw’abandi."

Iyi myitwarire idahwitse y’abashaka kuba abakandida bigenga kandi yanagarutsweho na Guverineri w’intara y’Amajyaruguru Musabyimana Jean Claude avuga ko gahunda zo gusinyisha mu ntara ayoboye zigitangira zabanje kugaragaramo kudakurikiza amabwiriza no gutanga ruswa.

Ati: “Icyo gihe hari abazaga bakajya mu tubari, bagasanga abaturage mu kabari bakabasengerera, bagasinyisha abaturage batazi impamvu basinya, bababwiraga ngo hari imishinga, ngo barashaka kubafasha bati none nyinyira aha, bati nunsinyira nzaguha ibi n’ibi, ibyo ni byo twanze ariko ubu buri kugenda neza”

Ku bijyanye n’amashyaka, Mbanda yavuze ko ishyaka ryatanze umukandida ari Green Party gusa avuga ko ayandi akibitekerezaho.

Prof Mbanda yasabye abayobozi b’inzego z’ibanze gufasha aba bashaka kuba abakandida bigenga kuko baba bagifite amaraso ya gisore kugirango batazagongana n’ubuyobozi bw’ibanze.

Ati:“Mubyifatemo neza muborohereze abenshi baba ari abasore ari bo bazavamo abanyarwanda bameze neza mu minsi iri imbere.”

Yavuze ko bakoranye nabo inama mu cyumweru gishize bakababwira ko bagomba guhindura imyitwarire muri izi gahunda zabo zo guhatana mu matora ya Perezida.

Kugira ngo umuntu yemererwe kuba umukandida wigenga mu matora ya Perezida mu Rwanda asabwa kugira abantu 600 bamusinyiye bemeza ko bashyigikiye candidature ye kandi muri buri karere hagomba kubonekamo abantu batari munsi ya 12.

Gusinyisha aba bantu ushaka kuba umukandida ashobora kubikora ku giti cye cyangwa akagira abantu yamenyekanishije bamufasha ariko bakabikorera ahantu runaka hazwi. Ntibemerewe gusanga abantu aho bari ahubwo ababashyigikiye bagomba kubasanga aho biyemeje gukorera.

Yisangize Inshuti.

Ibitekerezo 5

  1. Arko c kuki batatsinda? Urwanda rwaremewe umuntu umwe gusa?nibahatane bashobora gutsinda kdi ubuyobozi subwumuntu umwe!

  2. Arko c kuki batatsinda? Urwanda rwaremewe umuntu umwe gusa?nibahatane bashobora gutsinda kdi ubuyobozi subwumuntu umwe!

  3. Mbega prof usekeje?? Wagirango professor at yarayitoraguye pe. ESE kuki mutaba impartial kandi mutari abapoliticiens?
    Injiji zize gusa

  4. Ariko se koko amafranga barayatanga koko? Cg ni ukubaharabika? Ubundi se buriya hari amahirwe barite yo gutsinda amatora ra? Byaca muzihe nzira? Biragoye ariko birashoboka?

  5. Ariko se koko amafranga barayatanga koko? Cg ni ukubaharabika? Ubundi se buriya hari amahirwe barite yo gutsinda amatora ra? Byaca muzihe nzira? Biragoye ariko birashoboka?

Tanga Igitekerezo