“Tugomba kumenya ko imisoro ituma tugira ijambo rikomeye mu bihugu by’amahanga” Minisitiri Murekezi

Minisitiri w’Intebe w’u Rwanda Anastase Murekezi yavuze ko abanyarwanda nibakomeza guteza imbere umuco wo kwibwiriza gusora u Rwanda ruzagera ku iterambere ryihuse kandi rirambye kuko ngo n’ibihugu tuvuga ko byateye imbere na byo bibikesha gutanga imisoro n’amahoro ndetse ngo n’ijambo u Rwanda rumaze kugira mu ruhando mpuzamahanga rurikesha imisoro n’amahoro.

Ibi Minisitiri w’intebe Anastase Murekezi yabigarutseho kuri uyu wa 22 Kanama mu ijambo yagejeje ku bitabiriye umuhango wo kwizihiza umunsi wahariwe abasora.

Minisitiri Murekezi yibukije abanyarwanda bose ko nta gihugu na kimwe gishobora gutera imbere kitifashishije imisoro kuko ngo n’ibihugu byose bivugwa ko byakungahaye cyane byo mu burengerazuba bw’Isi ndetse n’ibihugu bimaze kugera ku bukungu byo muri Asiya, byose ngo bibikesha imisoro, Nta rindi banga

Yavuze ko ibikorwa remezo abanyarwanda bamaze kugeraho ari urugero bw’ibyo abanyarwanda bakesha gutanga imisoro n’amahoro bityo ngo abanyarwanda nibakomeza kumva neza agaciro k’imisoro ntibazatinda kugera ku kwigira nyako.

Yagize ati: “Turisimira rero ko natwe abanyarwanya tumaze kumva iri hame ryo kwigira dukesha imisoro n’amahoro, urugero rwiza nuko imisoro yacu isigaye igira uruhare mu ngengo y’imari ikoreshwa mu gihugu cyacu buri mwaka[….] uruhare rw’imisoro mu Rwanda ruragenda rwigaragaza mu mutungo rusange w’igihugu, ibintu byinsi biragenda bikorwa biturutse mu misoro, ibi nibyo byitwa kwishakamo ibisubizo nyakuri ku bibazo ibyo ari byo byose ”

Icyakora Minisitiri w’inetebe Murekezi yavuze ko hakiri urugendo rukomeye mu kwishakamo ubushobozi kuko hakiri umubare munini w’amafaranga ashyirwa mu ngengo y’imari aturutse ku nkunga z’ibihugu by’amahanga. Yavuze ko abanyarwanda nibakomeza kwibwiriza gusora izo nkunga u Rwanda rushobora kuzisezerera burundu kuko nubundi ngo abarutera inkunga baba bafite izindi nyunguu bashaka.

Ati: “Birumvikana ko kugirango ufate amafaranga yo mu misoro y’abaturage bawe uri igihugu runaka ujye gufasha ikindi gihugu uba ukurikiranye inyungu zikomeye cyane, buri gihugu rero, u Rwanda by’umwihariko tugomba kumenya ko imisoro ikomeye kuko ituma tugira ijambo rikomeye mu ruhando rw’ibindi bihugu kuko igihugu gikomeza gufashwa kigasubira inyuma, kikongera kigafashwa agaciro k’ijambo ry’icyo gihugu kagenda kagabanuka, turasabwa gukora cyane kugirango intego twihaye yo kwihaza mu ngengo y’imari tuzayigereho kandi ku buryo bwihuta. Kwihaza mu ngengo y’imari nibyo bizatuma twigenera uko tugomba kubaho”

Muri uyu munsi w’abasora, ikigo cy’igihugu gishinzwe kwinjiza imisoro n’amahoro (RRA) cyahembye bamwe mu basora bitwaye neza mu byiciro bitandukanye birimo abasoze neza, abafatanyabikorwa, abakoresheje neza EBM, n’abandi.



Hahembwe abitwaye neza mu gusora


Minisitiri W’imari n’igenamigambi Gatete Claver na Minisitiri w’intebe Murekezi (ibumoso bw’ifoto) baraganira ku kamaro k’misoro


Komiseri mukuru wa RRA yashimiye abasora bose kuba basigaye bibwiriza gusoma


Minisitiri w’intebe Anastase Murekezi yasabye abanyarwanda bose kwibwiriza gusora


Abakozi ba RRA bari babukereye


Minisitiri w’intebe na komiseri wa RRA mu ifoto y’urwibutso


Itorero ryasusurukije abitabiriye uyu munsi

Yisangize Inshuti.

Ibitekerezo

Tanga Igitekerezo