RGB ntitewe ikibazo no kuba inzego z’ibanze zitizerwa n’abo ziyobora

1

Prof Shyaka Anastase uyobora RGB

Umuyobozi w’Ikigo cy’igihugu gishinzwe Imiyoborere Prof Shyaka Anastase avuga ko kuba abaturage benshi bo mu Rwanda bagaragaza ko bafitiye icyizere cyinshi abayobozi bo ku rwego rwo hejuru kuruta inzego z’ibanze nta kibazo kirimo ngo byakabaye ikibazo abayobozi bakuru ari bo batizewe n’abaturage.

Ubushakashatsi bushya bwashyizwe ahagaragara na Sena y’u Rwanda muri 2014 ku cyizere abaturage bafitiye inzego z’ubuyobozi, bwagaragaje ko abaturage bizera cyane Perezida Paul Kagame ku kigero cya 99%, Igisirikare ku kigero cya 96% na Polisi ku kigero cya 86%, amashyaka yo akaza kuri 61,3%, Abayobozi b’uturere bizerwa ku kigero cya 84,4% naho abo mu Nama Njyanama zo mu Midugudu icyizere kiri kuri 79%.

Mu kiganiro RGB yagiranye n’abanyamakuru kuri uyu wa kabiri tariki 9 Kanama 2016, cyavugaga ku munsi mukuru mpuzamahanga wo kwegereza abaturage ubuyobozi uzizihizwa kuri uyu wa 10 Kanama 2016 ukabera mu karere ka Gakenke, Prof Shyaka Anastase uyobora RGB yagarutse ku cyizere gike gifitiwe abayobozi b’inzego z’ibanze avuga ko nta kibazo kirimo.

Yagize ati “ Kuba hari inzego mu nzego z’ibanze zikididadiga bifite ibisobanuro dushobora gushakira ibisubizo. Gusa icya mbere ni uko utavuga ngo byahumiye ku mirari kubera ko za nzego nkuru abanyarwanda kandi bazi impamvu, bazi ko n’ibyo bikirimo imbogamizi ko ari bo bazafasha kubishyira ku murongo, navuga ngo abanyarwanda bagira amahirwe ntabwo ari ikibazo.”

Prof Shayaka Anastase yagarutse ku mpamvu asanga zituma abanyarwanda batizera inzego z’ibanze zirimo ubushake buke bwo gukorera abaturage, kuba babana bya hafi n’abaturage ndetse n’ubushobozi buke haba mu myumvire n’ibindi.

Yagize ati “Hariya hasi harimo igitotsi, icyo gitotsi gishobora kuba giterwa n’impamvu zikurikira: iya mbere ni uko ya ntumbero, bwa bushake, bwa bushobozi bwo gukorera abaturage cyane bugenda busa n’ubujya hasi, indi ni uko bariya bayobozi bo hasi birirwana n’abaturage n’umuturage ukoze ikosa iyo umukozeho na byo bihinduka…uko tugenda tumanuka ni ko ubushobozi bugenda bumanuka haba mu myumvire ari ubushobozi mu kureba kure…”

Uruhare rw’abaturage mu bibakorerwa ruracyari hasi cyane.

Kuva mu mwaka wa 2001 kugeza muri 2016 habayeho ibyiciro bitatu byo kwegereza abaturage ubuyobozi birimo ivugurura ry’inzego, kubaka no kongerera ubushobozi inzego ndetse ibi bikaba byarongewo ingufu mu cyiciro cya gatatu.

N’ubwo abaturage begerejwe ubuyobozi ngo bagire uruhare mu bibakorerwa, haracyagaragara imibare iri hasi cyane yerekana uburyo abaturage bagira uruhare mu igenimigambi ry’aho batuye nk’uko Prof Shyaka Anastase uyobora RGB abigarukaho.

Yagize ati “Uruhare rw’abaturage mu bibakorerwa kiri kuri 51%, ariko iyo ugiye muri bya bindi byo hasi cyane, mu mihigo, muri za ngengo z’imari biri hasi kurushaho. Mbahaye nk’ishusho mu turere 25 kuri 30 uburyo abanyarwanda bavuga ko bagira uruhare mu mihigo biri hasi ya 50%, iyo ugeze muri bya bindi byitwa ko ari techinic byo kuvuga ngo abaturage bagize uruhare mu igena migambo ry’akarere byo biri hasi ya 50%.”

Prof Shyaka avuga ko ibyo kuba hari abaturage batagiramo uruhare bishobora kuba biterwa n’ubumenyi buke abaturage baba babifiteho.

Yagize ati “Hari abantu bavuga bati ibintu by’amafaranga, kubabaza ingengo y’imari ko ari ibintu bisaba ubutekinisiye (technicien) n’ubuzobere ubundi aba baturage barabizi? Bikaba byasobanura impamvu icyo gipimo kikiri hasi.”

Uruhare rw’abaturage mu gufata ibitekerezo bya politiki biri ku kigero cya 90% mu gihe uruhare rwabo mu kwishakamo ibisubizo biri ku kigero cya 80%, bikaba bigaragarira muri gahunda zitandukanye nk’abakangurambaga mu matora, inkiko Gacaca, inzego z’abunzi, kwiyubakira amashuri n’ibindi.


Uhereye i bumoso Justus Kangwagye Ushinzwe kwegereza abaturage ubuyobozi na Fatuma Ndangiza umuyobozi wungrije wa RGB

Yisangize Inshuti.

Ibitekerezo 1

Tanga Igitekerezo