REMA itewe impungenge n’ingaruka z’imikorere mibi y’ubucukuzi n’inganda ku bidukikije

Ubucukuzi mu karere ka Rubavu ni kimwe mu bigararira amaso bibangamiye ibidukikije mu Rwanda (ifoto REMA

Raporo ya kane y’ikigo cy’igihugu gishinzwe kurengera ibiudukikije mu Rwanda (REMA) yo kuri kuri uyu wa 03 Kamena 2016 igaragaza imiterere y’ibidukikije mu Rwanda yerekanye impungenge zikomeye ku ngaruka ziterwa n’imikorere mibi y’inganda n’ubucukuzi bw’amabuye y’agaciro mu Rwanda, ikanaboneraho gusaba impinduka mu mikorere n’imikoreshereze y’umutungo kamere mu bikorwa by’inganda n’ubucukuzi.

Kuri uyu wa 03 Kamena 2016, nibwo mu Rwanda hizihizwajwe umunsi mpuzamahanga wahariwe kurengera ibidukikije ku Isi, ku nsanganyamatsiko yo guhangana n’ibitera ihindagurika ry’ikirere.

Kuri uyu munsi kandi, ikigo cy’igihugu gishinzwe kurengera ibidukikije mu Rwanda (REMA) cyashyize ahagaragara raporo igaragaza uko ibidukikije byubahirizwa n’abanyarwanda mu bikorwa byabo bya buri munsi nk’ubuhinzi, ubucukuzi, inganda, imiturire, n’ibindi.

Muri iyi raporo REMA yagaragaje ko itewe impungenge n’imikorere y’inganda n’ubucukuzi bitewe nuko imikorere n’ibikorwa by’abakora mu nganda n’ubucukuzi akenshi bitubahiriza ubusugire bw’ibidukikije dukesha ubuzima bwiza bwa buri munsi.

Mu ngero zigaragaza uburyo imikorere y’inganda mu Rwanda ikibangamiye ibidukikije, iyi raporo yerekanye harimo kuba hafi inganda zo mu Rwanda zose zigikoresha inkwi mu bikorwa bitandukanye bikabangamira amashyamba ari nabyo byerekeza ku isuri n’imyuzure imaze iminsi yibasira ibice bimwe na bimwe by’u Rwanda tutiyibagije n’ ingaruka zikomeye byagize k’ubuhinzi.


Ibice by’akarere ka Rurindo bikunze kwibasirwa n’imyuzure n’isuri ikomeye(ifoto REMA)

Ikindi gihangayikishije iki kigo ni uko inyinshi mu nganda zubatse muri Kigali usanga zubatse mu bibaya n’ibishanga nka Gikondo na Kimihurura kandi ngo nta buryo bwo kubika imyanda ituruka muri izo nganda buhari, ibi ngo byanduza amazi yo m’ubutaka n’ayo hejuru y’ubutaka bikazagira ingaruka kubayakoresha n’ibinyabuzima byo mu maza.


Uru ni uruhererekane rw’inganda zubatse mu gishanga cya Kimihurura (Ifoto REMA

Inganda zo mu Rwanda kandi ngo zubatse iruhande rw’ahantu hatuye abantu, ibi bishobora kugira ingaruka k’umwuka bahumeka n’amazi bavoma aba arimo uburozi bwaturutse mu nganda.

Iyi raporo yanagarutse k’ubucukuzi bw’amabuye y’agaciro n’akoreshwa m’ubwubatsi, Kuri iyi ngingo iyi raporo yerekanye ko ikibazo nyamukuru kikigaragara muri uru rwego ari ukudakurikiza amabwiriza n’amategeko agenga ubucukuzi mu Rwanda ndetse no gushakira umutekano abakozi bakora mu birombe.

Iyi raporo kandi yanagaragaje ko amasooko y’amazi nayo agenda yanduzwa n’ibikorwa by’ubucukuzi bikagira ingaruka k’uruhererekane rw’amazi.

Ubucukuzi mu mugezi wa Nyabarongo ni bumwe mu byavuzwe muri iyi raporo(Ifoto REMA)

Kudakurikiza amabwiriza y’ubucukuzi ntibigira ingaruka ku bidukikije gusa kuko nkuko byagiye bigaragara abantu bamaze iminsi bapfira mu birombe bitandukanye bazira kuba bacukura k’uburyo budatanga umutekano w’ubuzima bwabo harimo nko kutagira ibikoresho bigezweho hakiyongeraho n’abacukura k’uburyo bunyuranyije n’amategeko.

Yisangize Inshuti.

Ibitekerezo

Tanga Igitekerezo