Polisi y’u Rwanda yungutse abapolisi bashya 1883

1

Kuwa kabiri tariki ya 2 Gicurasi, abapolisi bashya 1883 barimo ab’igitsinagore 222 binjijwe muri Polisi y’u Rwanda, nyuma yo kurangiza amasomo mu ishuri rya Polisi y’u Rwanda rya Gishari mu karere ka Rwamagana.

Aba bapolisi ni icyiciro cya 13 cy’abinjijwe muri Polisi y’u Rwanda, bari bamaze amezi 8 n’iminsi mike; bakaba barahawe amasomo anyuranye arimo; kumenya neza inshingano za Polisi y’u Rwanda, gukoresha intwaro hagamijwe kuzuza neza inshingano bashinzwe, kugira imyitwarire myiza, amategeko, kubungabunga ubutumwa bw’amahoro hirya no hino ku isi, imikoranire myiza ya Polisi n’abaturage ndetse n’izindi nzego, ubutabazi bw’ibanze ndetse banahawe n’ibiganiro byo gukunda igihugu; byose bikazabafasha gushyira mu bikorwa ibyo bashinzwe.

Minisitiri w’Ubutabera akaba n’Intumwa nkuru ya Leta Johnston Busingye, wari umushyitsi mukuru muri uwo muhango, ndetse wanasoje ku mugaragaro ayo mahugurwa yinjiza abapolisi bashya mu kazi; yagize ati:” amahugurwa bahawe agamije kubaka igipolisi cy’umwuga no kubumbatira umutekano muri rusange. Nta bunyamwuga bwagerwaho butanyuze mu nyigisho nk’izi. Muri iki gihe ibyaha byaragabanutse kubera gukora neza akazi n’ubunyamwuga buranga Polisi y’u Rwanda”.

Minisitiri w’Ubutabera yakomeje avuga ko uku gukora neza akazi bitagaragarira gusa imbere mu gihugu, kuko no mu mahanga abapolisi b’u Rwanda ari intangarugero mu bikorwa byo kubungabunga amahoro n’umutekano mu butumwa bw’umuryango w’Abibumbye mu bihugu bitandukanye.

Yakomeje avuga ko abapolisi bazakomeza guhabwa ubumenyi n’amahugurwa ndetse n’ibikoresho bigezweho, kugira ngo buzuze neza inshingano zabo. Minisitiri Busingye kandi yanavuze ku byaha bigenda bigaragara birimo ihohoterwa rishingiye ku gitsina n’irikorerwa abana, ruswa, iterabwoba, gukoresha ibiyobyabwenge, icuruzwa ry’abantu n’ibindi; maze avuga ko kubirwanya bisaba imikoranire myiza no gutanga amakuru, bityo asaba abaturage gufatanya na Polisi kubirwanya.

Ku bantu bafatirwa mu byaha bagahabwa ibihano ariko babirangiza bagakomeza kubyishoramo, Minisitiri w’ubutabera yabagiriye inama yo kubireka ngo kuko igitabo cy’amategeko ahana ibyaha kimwe n’andi mategeko birimo gusuzumwa neza hagamijwe kureba ko abanyabyaha batakomeza kubyijandikamo.

Umuyobozi w’Ishuri rya Polisi y’u Rwanda rya Gishari Commissioner of Police (CP) Vianney Nshimiyimana yashimiye abapolisi bashya umurava n’ubushake bagaragaje mu gihe bari bakiri mu masomo, akomeza avuga ko yizeye ko bazasohoza neza inshingano zabo.

Uyu muhango wo gusoza amahugurwa y’abapolisi bashya binjijwe mu kazi waranzwe kandi no guha ibihembo abanyeshuri batatu barushije abandi, ukaba kandi wanitabiriwe n’Umuyobozi mukuru wa Polisi y’u Rwanda IGP Emmanuel K Gasana, Guverineri w’Intara y’I Burasirazuba Madamu Judith Kazayire, Umuyobozi wa Polisi y’u Rwanda wungirije ushinzwe ubuyobozi n’abakozi DIGP Juvenal Marizamunda, abapolisi bakuru bayobora amashami n’imitwe inyuranye muri Polisi y’u Rwanda n’abandi bashyitsi batandukanye.

Abahagarariye amashami ya Loni ashinzwe kubungabunga amahoro bari mu mwiherero i Kigali
Kuwa kabiri tariki ya 2 Gicurasi, ku cyicaro gikuru cya Polisi y’u Rwanda ku Kacyiru, hateraniye umwiherero w’iminsi itatu uhuje abahagarariye amashami atatu y’Umuryango w’Abibumbye ashinzwe kubungabunga amahoro akorera muri Sudani y’Epfo (United Nations Mission in South Sudan -UNMISS), mu ntara ya Darfur muri Sudani (United Nations Missions in Darfur-UNAMID), no mu ntara ya Abyei (United Nations Interim Security Force for Abyei-UNISFA), bigira hamwe ibibazo byugarije umutekano n’amahoro muri ibyo bihugu.

Atangiza uyu mwiherero, umuyobozi mukuru wa Polisi y’u Rwanda (IGP) Emmanuel K. Gasana, yashimiye abawitabiriye ubwitange, umurava no kwiyemeza biranga abo bayobora baharanira kugarura amahoro n’umutekano ku Isi.

IGP Gasana yavuze ati:”Amahoro ni ingenzi mu buzima bwa muntu. U Rwanda rwo ruzi akamaro k’amahoro kuko rwagize iminsi y’umwijima muri Jenoside yakorewe abatutsi mu mwaka w’1994.”

Yakomeje avuga ati:”Twabuze miliyoni irenga y’Abanyarwanda. Kuva mu bikomere bya Jenoside tugana mu kwiyubaka ngo tugere aho tugeze ubu, byasabaga ko tugira umuyobozi ufite icyerekezo.”

Yongeyeho kandi ko mu myaka 23 ishize, u Rwanda rwahereye ku busa, ubu rukaba rugeze ahashimishije mu iterambere, haba muri Politiki no mu bukungu byose bigamije iterambere rirambye.

Kuri iyi ngingo yavuze ati:”Uyu munsi igihangayikishije cyane ni ukugarura amahoro aho atari ku Isi yose.”

Yabakanguriye guhuriza hamwe imbaraga, amahugurwa, ubunararibonye no gufatira hamwe ingamba, kugirango bakumire kandi barwanye ibyaha bivuka muri ibi bihe tugezemo.

IGP Gasana yanagarutse ku kibazo cy’ubuhezanguni gihangayikishije Isi, ibyaha bikorwa hifashishijwe ikoranabuhanga, ihohoterwa rishingiye ku gitsina ndetse n’udutsiko tw’iterabwoba, nk’ibibazo inzego z’umutekno zigomba guhangana nabyo, ndetse bigasangwa no mu bihangayikishije umuryango w’abibumbye, ibi bikaba bisaba kongerera ubushobozi inzego zishinzwe guhangana nabyo kugirango zibikumire.

Umujyanama wungirije mu bya gipolisi mu muryango w’abibumbye Shaowen Yang, yavuze ko ibiganiro byabo bizibanda ku ngamba zatuma barushaho gukora neza, ndetse no ku ngorane bakunda guhura nazo mu butumwa boherejwemo.

Yavuze ati:”Tuzibanda ku kwigira hamwe uko twagira imikoranire myiza mu butumwa bw’amahoro turimo mu bihugu bitandukanye, duhanahana amakuru, ku ngamba zatuma turushaho kurangiza inshingano zacu neza, uko twakora ngo duhanahane ubunararibonye n’ubumenyi butandukanye.”

Yashimiye Polisi y’u Rwanda ku nkunga ikomeye yabateye yakira uyu mwiherero, yongeraho ati:”Turi kureba uko twakorana na Polisi y’u Rwanda ikaduha ku bunararibonye bwayo, kandi tukanayisaba ko yakomeza gutera inkunga mu bikorwa bitandukanye by’umuryango w’abibumbye byo kugarura no kubungabunga amahoro ku Isi.”

Kugeza ubu u Rwanda rufite abapolisi bari mu butumwa bwo kubungabunga amahoro bw’umuryango w’abibumbye bagera ku 1200, muri bo 484 bakaba bari muri Sudani y’Epfo, Darfur no mu ntara ya Abyei.

Umuyobozi wa Polisi ya Loni muri Sudani y’Epfo (UNMISS) Commissioner of Police (CP) Bruce Munyambo, nawe akaba ari umunyarwanda.

Yisangize Inshuti.

Ibitekerezo 1

  1. Bravo kuri polisi yacu mukongera ingufu murwego rwo kurushaho gucunga umutekano. aba bapolisi bashya nibaze bafatanye nabagenzi babo, turabishimiye.

Tanga Igitekerezo