Perezida Kagame yasuye inzu ndangamurage ya FIFA anezezwa na yo, abasezeranya kuzasubirayo

Perezida wa Repubulika y’u Rwanda Paul Kagame yaraye asuye ikicaro cy’impuzamashyirahamwe y’umupira w’amaguru ku Isi (FIFA) atemberezwa mu nzu ndangamurage yayo anezezwa n’ibiyirimo ndetse n’impano yahawe ahiga ko azasubirayo kureba n’ibindi atabonye.

Kuri uyu wa 09 Kamena nibwo Perezida wa Repubulika y’u Rwanda Paul Kagame yageze i Zurich mu Busuwisi asura ikicaro cy’impuzamashyirahamwe y’umupira w’amaguru ku Isi FIFA.

Muru uru ruzinduko yabonanye na Perezida wa FIFA Gianni Infantino, ndetse asura n’inzu ndangamurage y’umupira w’amaguru ku Isi iri aha i Zürich.

Nyuma yo gutemberezwa muri iyi nzu ndangamurage yatangaje ko yishimiye ibyo yabonyemo.

Nyuma Infantino yahaye Perezida Kagame impano zitandukanye zirimo n’iy’umupira wambarwa wanditseho nimero icyenda n’izina ’Paul’.

Mu butumwa bwanditse yasize muri iyi nzu ndangamurage, Perezida Kagame yagize ati: "Ni amahirwe akomeye kuri njye gusura iyi nzu ndangamurage nziza, kandi murakoze ku mpano nziza, nzagaruka kunezezwa na yo no gusura nkanareba ibyo ntabonye, Nshimiye Perezida wa FIFA ku kazi gakomeye urimo gukora, n’abagabo n’abagore batunganya iyi nzu ndangamurage bigeze aha. Mbifurije ibyiza byose"

Iyi nzu ndangamurage yafunguwe ku wa 28 Gashyantare 2016, yubatswe ku buso bwa metero kare 3 500, ifite igice kirimo ibintu birenga 1000 byerekwa abayisuye (Exhibits) byiganjemo ibihe by’ingenzi by’ibikombe by’Isi by’abagabo n’abagore byabayeho byose, ibitabo n’inyandiko 4000 n’amafoto 1400.

Muri Gashyantare uyu mwaka, Prezida wa FIFA yasuye u Rwanda ahamara iminsi ibiri, atangiza imirimo yo kubaka Hotel nshya ya FERWAFA i Remera, ndetse anabonana na Perezida Paul Kagame bagirana ibiganiro.

Perezida Kagame ari ku mugabane w’u Burayi aho yitabiriye inama Mpuzamahanga y’u Burayi ku bufatanye mu iterambere (European Development Days conference - EDD 2017), yabereye i Bruxelles mu Bubiligi kuva ku itariki ya 7 kugeza ku ya 8 Kamena 2017.

Kuri uyu wa gatandatu azahura n’abanyarwanda baba mu Bubiligi n’ahandi hatandukanye bazitabira ‘Rwanda Day’ aganire na bo.



Perezida Kagame yahawe impano zirimo n’umupira wanditseho izina rye.

Ubutumwa Perezida Kagame yasize muri iyi nzu.

Yisangize Inshuti.

Ibitekerezo

Tanga Igitekerezo