Perezida Kagame yasabye ko ibikorwa biri mu bishanga bitarahagenewe byimurwa vuba

Perezida Paul Kagame yasabye ko abantu bafite ibikorwa mu bishanga bitandukanye bitarahagenewe babyimura vuba kugirango habungabungwe urusobe rw’ibinyabuzima.

Yabitangaje kuri uyu wa Gatandatu ubwo yitabiraga Umuganda usoza ukwezi wa Gatandatu wabereye mu gishanga cya Nyandungu mu mujyi wa Kigali.

Nyuma yo gukorana umuganda n’abaturage b’Akarere ka Gasabo na Kicukiro batera ibiti mu gishanga cya Nyandungu, Perezida Kagame yavuze ko gutunganya ibishanga ari ugushyigikira no kubungabunga urusobe rw’ibinyabuzima.

Yagarutse ku bantu baba bagifite ibikorwa mu bishanga bitandukanye kandi atari byo byahaganewe, asaba ko byimurwa mu gihe cya vuba.

Yagize ati "Gutunganya ibishanga tugomba kubyitaho kuko bijyana no kuzuzanya k’urusobe rw’ibinyabuzima. Abafite ibikorwa bitandukanye mu bishanga kandi atari ho byagenewe, bagomba kubyimura vuba ibishanga tukabibungabunga."

Perezida Kagame kandi yashimye ubufatanye buranga abaturage mu muganda, avuga ko ari ikimenyetso kigaragaza ko ubufatanye ntacyo butageraho.

Ati "Umuganda ni ikimenyetso cyo gukorera hamwe cyerekana ibyo twageraho byinshi byiza dukoreye hamwe.Umuganda werekana gufatanya mu gukora cyane ngo tugere kubyo twifuza kandi bitubereye."

Yasabye ko ubwo bufatanye bukomeza igihugu kikagira iterambere n’umutekano byifuzwa.

Perezida Kagame yifatanya n’abaturage mu gutera ibiti mu gishanga cya Nyandungu

Yisangize Inshuti.

Ibitekerezo

Tanga Igitekerezo