Perezida Kagame yasobanuye impamvu abiciwe basabwa gutera intambwe bagatanga imbabazi

Perezida wa Repubulika Paul Kagame, yavuze ko Abacitse ku icumu basabwa gutanga imbabazi mu buryo bubagoye kuko aribo bifitemo ubutwari bwo kubabarira. Gusa avuga ko biba bitoroshye ugereranyije n’ibyo abantu banyuzemo.

Ibi Perezida Kagame yabitangaje ubwo yifatanyaga n’abagize umuryango “Unity Club” mu kwizihiza isabukuru y’imyaka 20 ishize ubayeho, kuri uyu wa Gatanu tariki ya 04 Ugushyingo 2016.

Mu ijambo rye, Perezida Kagame yakomoje ku buhamya butandukanye bwagiye buvugirwa aho, yavuze ko akenshi iyo yumvise ibyo abantu baciyemo yishyira mu mwanya wabo akumva hari ibyo atari gushobora kwihanganira ibyo aba muri uwo mwanya barimo.

Aha Perezida Kagame yagarutse ku buhamya bw’abakobwa batambukije aho hari umwe wavuze uburyo bwamwiciye mukuru we areba.Aha niyo yahereye avuga ko bijya bigorana gusaba umuntu gukora ibikomeye we utatekereza ko yabasha no kubikora harimo kwihangana no kubabarira. Gusa ngo nta wundi wabisabwa kuko aribo bifitemo ubutwari bwo kubabarira.

Yagize ati “Turabibasaba buri gihe buri munsi turabibasaba, ariko ntabwo tubimusabira ko byoroshye, ni naho mvugira ngo njyewe iyo mbibasabye ni inshingano, ariko mba mvuga nti njyewe iyo mba muri uyu mwanya biba byarangoye no kubivamo uko yabivuyemo.Ariko ni inshingano dufite zijyanye n’uburemere bw’uko tugomba kubaho, kubaka igihugu cyacu,ndetse bw’uko bamwe na bamwe dufite n’izo nshingano zo kuyobora abantu ngo tubanyuze muri ibyo ngibyo”.

Umukuru w’Igihugu kandi yavuze ko kubwira umuntu nk’uwo kubabarira bitoroshye ari nayo mpamvu iyo abitekereje asanga ari ubutwari bukomeye.

Ati “Turatinyuka tukabisaba abantu ngo mwihangane, mubyihanganire turebe imbere, mbisaba umuntu nziko njye byangora kubyihanganira byarambayeho gutyo. Nabo mwitirira ubutwari bw’ibintu byinshi byakozwe, iyo bigeze aho tuba turi abantu nk’abandi iby’ubutwari biragora”

Mu ijambo rye akaba yagarutse ku muntu umwe wacitse ku icumu wigeze kumubaza mu ruhame ati “Kuki udusaba kuba aritwe twikorera ibibazo by’ibyaha n’ibyago byabaye ku Rwanda ? Twe abacitse ku icumu mudusaba kwikorera umugogoro w’ibi byose”

Perezida yahise amuha igisubizo kigira kiti “ Ariko se ntagisabye wowe nagisaba nde,ntasabye wowe The victim(Wiciwe) ngo nkusabe kwihangana no kuba wanababarira, n’ibindi bigoranye ngo mbigusabe urashaka ko mbisaba nde, mbisabe uwishe se? mbisabe wa wundi wiciye mukuru w’umwana hejuru ye amutwikiriye, musabe iki? Kugira gute? Keretse musabye ngo ntuzongere.Ibi wakoze ubutaha utubabarire ntuzabisubire….uwo byabayeho niwe ufite icyo atanga, imbabazi uburyo ngo nibura duhere aha twubake, ntabwo wabisaba uwishe abantu urubozo, we ntacyo afite wamusaba”.

Gusa asanga ibi bikwiye kumvisha abantu ko ibintu bitoroshye nkuko babyibwira, ndetse abantu bakwiye kumenya ko nubwo hari intambwe imaze guterwa,bakwiye no gutekereza ko hari ibindi bikwiye kwitonderwa mu buzima bwa buri munsi kuko ibyabaye byagaruka batitonze.

Ati “Amateka nkaya yasubira cyangwa se iyo ‘provocation’ y’ushobora kuba ari ho avuga ngo ibi nanjye nubwo ntari muri aba nanjye ibyambayeho buriya se? reka dusubize ibintu mu buryo bwabyo ibyabaye, duhangane nabyo tubishakire umuti ariko noneho imbere tujya tugende bundi bushya. Biturutse ku masomo twigishijwe n’ayo mateka ”.

Yongeyeho ko Abanyarwanda bakwiye gufatanya kuguma mu murongo mwiza kugirango bamenyekane ku byiza bagezeho aho kumenyekana ku mateka mabi.


Amafoto:Perezidansi

@Eric Birori

Yisangize Inshuti.

Ibitekerezo

Tanga Igitekerezo