Imirimo itegereje Nyirasafari Esperance, Minisitiri mushya w’Umuryango

5

Nyirasafari Esperance wagizwe Minisitiri muri MIGEPROF

Kuri uyu wa Kabiri Perezida wa Repubulika y’u Rwanda Paul Kagame ku bubasha ahabwa n’amategeko yavuguruye Guverinoma anashyiraho abayobozi bashya mu nzego zitandukanye z’imiyoborere y’igihugu.

Minisitiri wa MIGEPROF Nyirasafari Esperance ni umwe mu bayobozi bashya bagiye guhangana n’ibibazo bikirangwa muri iyi Minisiteri.

N’ubwo muri iyi Minisiteri hakozwe byinshi bigamije guteza imbere uburinganire n’iterambere ry’umuryango, ntibibuza kuba hakiri akazi kanini kagomba gukorwa ku buryo butajenjetse.

Nyirasafari asanze akazi katoroshye muri iyi Minisiteri

Nyuma y’uko hagaragaye umubare munini w’abana bo ku mihanda, kuri ubu iki kibazo ntikitarabonerwa umuti ku buryo burambye. Ni ihurizo ritoroshye kuri Minisitiri mushya ndetse na Perezida wa Repubulika y’u Rwanda Paul Kagame yagiye asaba abayobozi b’iyi Minisiteri kugikemura ariko gisa n’icyabaye agatereranzamba.

MIGEPROF yemeza ko hakiri abana mu mihanda aho nibura amaseta ya Nyabugogo, Gisimeti,Sonatubes, Kabeza, Gakinjiro, Batsinda na Matheus habarirwa abana bagera kuri 300 n’ubwo hari abavuga ko iyi mibare yaba irenga.

Iyi Minisiteri yari yatangije gahunda yo gukorana n’inzego z’ibanze mu rwego rwo kurandura iki kibazo ndetse no gushyiraho abantu bise "Inshuti z’umuryango" bazajya bafasha gutanga amakuru mu gihe umwana yaba yabuze, yahohotewe cyangwa yarwaye akabura ubufasha, gusa n’ubu urugendo ruracyari rurerure.

Minisiteri kandi yari yatangaje ko igihangayikishijwe n’abana bavanwa mu mihanda nyuma bakayisubiramo bitewe n’ibyo basanze muri iyo miryango bahawe bisa n’ibyo baba barabonye.

MIGEPROF kandi iracyafite akazi katoroshye ko guhangana n’ihohoterwa rigikorerwa mu miryango, ubwicanyi buvugwa umunsi ku munsi n’ibindi.

Haracyagaragara n’ikibazo cy’abagabo bahohoterwa

Mu kiganiro cyihariye uwari Minisitiri w’ uburinganire n’ iterambere ry’ umuryango Dr Gashumba Diane yagiranye na Makuruki.rw, yavuze ko ikibazo cy’ abagabo bahohoterwa bakizi. Gusa avuga ko n’ubwo abagabo bahohoterwa ari bake, bataterera agati mu ryinyo kuko nta muntu n’ umwe ukwiye guhohoterwa.

N’ubwo hashyizweho gahunda zitandukanye zishyigikira uburinganire aho twavuga nka gahunda yashyizweho ku rwego rw’ isi yo gushyigikira no guteza imbere ihame ry’ uburinganire bw’ abagabo n’ abagore (He for She) u Rwanda ruri ku mwanya mwiza ntibibuza kuba iki kibazo kigihari kandi kigomba gushakirwa umuti.

Ubushakashatsi buheruka gukorwa bwagaragazaga ko abagore bahohoterwa bari hagati ya 85 na 90 % mu gihe abagabo bahohoterwa bari hagati ya 10 na 15%.

Dr Diane Gashumba avuye muri iyi Minisiteri ibi bibazo bitarakemuka,nubwo nta wamuveba kuko yari amazemo igihe gito dore ko yashyizweho muri Werurwe uyu mwaka.

D.r Diane Gashumba yahawe izindi nshingano zo kuyobora Minisiteri y’Ubuzima yahoze iyobowe na D.r Agnes Binagwaho.

Nyirasafari washyizwe muri MIGEPROF yavutse kuwa 13 Nyakanga 1972. Ni umugore w’abana batatu, abahungu babiri n’umukobwa umwe.Yari umudepite mu Nteko Ishinga Amategeko.

Yisangize Inshuti.

Ibitekerezo 5

  1. Hello!Iyi ni inshingano itoroshye, ariko abayimuhaye nuko bamubonyemo ubushobozi. Reka twese dufatanye twiyubakire Urwatubyaye. Thanks!

  2. Hello!Iyi ni inshingano itoroshye, ariko abayimuhaye nuko bamubonyemo ubushobozi. Reka twese dufatanye twiyubakire Urwatubyaye. Thanks!

  3. Hamwe na Jesus imirimo wahawe uzayikora neza,kandi ndakwizeye,kuberako uri umunyabwenge ntuhubuka ahasigaye imigisha gusa gusa Uwiteka azagufashe gukora imirimo ushinzwe neza .

Tanga Igitekerezo