Nyarugenge: Akarere ntikemeranya n’abayobozi b’imidugudu ku kibabuza kuzuza inshingano zabo

Aba ni abayobozi b’imidugudu mu mahugurwa agamije kubibutsa inshingano zabo

Bamwe mu bayobozi b’inzego zibanze by’umwihariko abayobozi b’imidugudu mu karere ka Nyarugenge, umujyi wa Kigali baravuga ko kuba bakorera mucyo bise ikirere ngo biri mubituma batuzuza neza inshingano zabo, bitewe no kuba ibyo bashinzwe ntaho byanditse nkuko mu zindi servisi bigenda bagasaba inzego zibakuriye gushyira mu nyandiko izo nshingano kugira ngo bave muri icyo gihirahiro.

Aba bakuru b’imidugudu bavuga ko kenshi babwirwa ko atari ngombwa ko buri muyobozi ku rwego rw’umudugudu agira inshingano zanditse, kuko ngo bahura na zo kenshi. Ngo ubuyobozi bubabwira ko iyo biyamamaza bazibwirwa, bagahura na zo mu mahugurwa atandukanye arimo ayo bahabwa mbere yo gutangira imirimo, ndetse ko bahura na zo mu mikorere yabo ya buri munsi.

Kuruhande rwabo bakuru b’imudugudu bavuga ko nubwo bahabwa ayo mahugurwa abibutsa inshingano zabo, ngo hari igihe bahura n’ikibazo cyo gucyocyorana n’abo bashinzwe kuyobora, bitewe nuko ngo hari igihe bajya gukemura ikibazo, ugasanga abaturage barabasuzuguye bababwira ko izo nshingano atari izabo.

Umwe muri bo uyobora umudugudu ubarizwa mu muremge wa Nyarugenge udashaka kugaragara mu itangazamakuru yagize ati:” Nkubu hari igihe baduha inshingano zo gufatanya n’ababishinzwe kwishyuza abaturage amafaranga y’umutekano, ay’isuku,…… ibi ntaho byanditse mu mategeko atugenga, nta nubwo biri munshingano zacu ariko tugasabwa kubikora. Bikwiriye gusobanuka n’abaturage bakamenya ibyo dushinzwe kugira ngo bidufashe.”

Undi witwa Mugenzi Makuruki.rw yasanze ku biro by’umurenge wa Rwezamenyo ho mu karere ka Nyarugenge, na we yaduhamirije aya makuru, avuga ko kenshi usanga bacyocyorana n’abo bashinzwe kuyobora kandi bitari bikwiriye.

Yagize ati:” Uwakubwiye ibyo rwose ntabwo yakubeshye. Iki ni ikibazo gikomeye nubwo bagifata nk’icyoroshye. Ese ubundi iyo umukozi usanzwe agiye mu kazi ntahabwa inshingano mu buryo bw’inyandiko kugira ngo hubahirizwe amategeko? Twe harabura iki? Ibi ni byo bituma dusuzugurwa rwose nibabitekerezeho kuko birakabije.”

Ku ruhande rw’ubuyobozi bw’akarere ka Nyarugenge, madamu Jessica Mbabazi ushinzwe imiyoborere myiza muri aka karere avuga ko uburyo abakuru b’imidugudu bajya mu kazi ngo bitandukanye n’uburyo abandi bakozi bajyaho, bityo akaba asanga nta mpamvu yo gusaba ko inshingano zabo zashyirwa mu nyandiko.

Yagize ati: ” Bariya bantu ni abakorerabushake ntabwo bagomba kwigereranya n’abandi bakozi kuko bo bafite sitati ibashyiraho. Inshingano zabo barazizi kuko bazibwirwa mbere yo gutangira akazi, ibyo bavuga ni urwitwazo rwo gutuma batuzuza ibyo bashinzwe.”

Uyu muyobozi akomeza avuga ko niba kudahabwa inshingano munyandiko ari ikibazo kibababangamiye, ngo hazarebwa niba bishoboka ko byakorwa, kurundi ruhande akanenga abavuga ibyo kuko ngo hari abandi bayobozi b’imidugudu bakora akazi kabo neza ngo ni ubwambere yakumva abasaba izo nshingano mu buryo bwanditse.

Nubwo ubuyobozi bw’akarere ka Nyarugenge bubibona uko, ba mudugudu (nkuko bakunze kwitwa) bo bavuga ko gukora utazi inshingano zawe neza bishobora gutuma umuntu agendera mu kigare bikaba byatera bamwe kugwa mu mutego nk’uwo gusinya n’ibyo batazi. Ikindi ngo ni uko hari za raporo zimwe zidakorwa cyangwa zigatinda kuko hari ubwo habaho kwitana bamwana ku bagomba kuzitanga.

Abakuru b’imidugudu na bo bemera ko iyo bari kwiyamamaza imbere y’abaturage, babasomera inshingano zabo, ariko ngo ntibashobora kuzibuka zose kuko nta nyandiko bahabwa ngo zikomeze kubibutsa izo nshingano.

Umwe yagize ati: ”urabyumva nawe uko umuntu aba ameze iyo yiyamamaza ntiyafata ibyo bamusomera byose, ni yo mpamvu nsanga Leta igomba gutanga inshingano ku buryo bw’inyandiko kugira ngo abatowe babe bafite uburyo bwo kuba bakwisuzuma barebeye nyine kuri izo nshingano zanditse bafite. Erega amagambo gusa ageraho akibagirana!”

Itegeko Nº 87/2013 ryo ku wa 11/09/2013 rigena imitunganyirize n’imikorere y’inzego z’imitegekere y’Igihugu zegerejwe abaturage,mu ngingo yaryo ya 217, rivuga ko Umudugudu ari urwego shingiro ry’ubukangurambaga n’ubusabane bw’abaturage ukaba n’ urwego abaturage bagiramo uruhare mu buryo butaziguye mu iterambere ryabo.

Nyamara bamwe mu baturage basanga akajagari, uguhangana, no kutamamenya inshingano birangwa mu mikorere ya komite nyobozi z’imidugudu imwe n’imwe bitatuma ibivugwa muri iyi ngingo bigerwaho.

Muneza Ferdinand

MAKURUKI.RW

Yisangize Inshuti.

Ibitekerezo

Tanga Igitekerezo