Kwamamaza

POLITIKE Y’U RWANDA

Nubwo wavuga Ndakuramutsa Maliya 100 ntibyakwicaza kuri ’table d’honneur’ byonyine -Perezida Kagame

Yanditswe

kuya

na

Jean Paul Niyitanga
Nubwo wavuga Ndakuramutsa Maliya 100 ntibyakwicaza kuri ’table d’honneur’ byonyine -Perezida Kagame

Perezida wa Repubulika y’u Rwanda Paul Kagame yabwiye urubyiruko ruteraniye mu ihuriro ngaruka mwaka ry’urubyiruko ko kwicara ku meza y’icyubahiro bigomba guharanirwa abantu bakabikorera nta guteta kuko ngo n’iyo waba udasiba Misa, ugahora usenga ukavuga Ndakuramutsa Maliya 100 udakora cyane ntibyakwicaza ku meza y’icyubahiro.

Ibi Perezida Kagame yabibwiye urubyiruko rusaga 3,000 bari bateraniye muri sitade nto i Remera mu ihuriro ngarukamwaka rya gatandatu rihuza urubyiruo ryiswe Youth Connekt Convention.

Ihuriro ry’uyu mwaka ryahuje urubyiruko rwaturutse mu turere twose tw’igihugu no mu mahanga, ndetse n’urubyiruko rwitabiriye Itorero ’Urunana rw’Urungano’

Mu mpanuro umukuru w’igihugu Paul Kagame yagejeje ku rubyiruko rwitabiriye iri huriro, yavuze ko abantu bagomba kumenya ko ntawakemura ibibazo bye ari nyamwigendaho, ahubwo ngo ubufatanye ni bwo bukemura ibibazo byugarije Afurika n’Isi muri rusange.

Yabwiye urubyiruko ati: "ntimuzigere mutezuka ku muco wo gushaka kumenya, gushaka kwiga, kunengwa, no kunenga. Mugomba guhorana inyota yo kumenya, no gukora kuko nibyo bibubaka" Yavuze ko mu kunengana no gukosorana abantu bakuramo gutera imbere bose hamwe ntawe usigaye inyuma.

Yagarutse cyane ku bantu baturuka ikantarange bakaza kunenga u Rwanda berekana ibazo biri mu Rwanda gusa kandi nyamara n’iwabo babisizeyo. Ati: "abaza kudutonganya badutunga agatoki ngo dufite ibibazo tubibutsa ko n’iwabo bihari kandi ko batadukunda kurusha uko twikunda. Turababaza tuti ntanubwo wagiye gukemura ibyawe ariko urerekana ko ushaka gukemura ibyanjye? ubwo se urankunda kurusha uko nikunda? Ubwo se urankunda kurusha uko ukunda iby’iwanyu? Kuki ari ibyanjye wahisemo?"

Perezida Kagame yavuze ko akenshi abo baza mu Rwanda kwerekana ibitagenda neza gusa baba bitwaje ko hari inkunga baha u Rwanda.

Ati: " Hari n’abatinyuka bakakubwira ngo impamvu nkubwira ntya nuko hari igice kimwe ngutunzeho, ndagutunze, ndakugaburira. Ati singuha amafaranga se? nti nibyo rwose urayampa, nkanamushimira nti urakoze kuba umpa amafaranga, nti ariko nubwo uyampa nkayakira nkanagushimira njye nibaza impamvu unayampa, unkundira iki bigeze ahangaha ku buryo wahora uvana amafaranga mu baturage bawe yo kungemurira ntacyo dupfana, ntaho tuziranye? urwo rukundo rushingiye kuki?"

Ndarangiza nkamwereka nti ariko urabona ko wanabyangije, ntanubwo ubikorera urukundo kubera ko waje no kuncyurira! Nonese wowe wacyurira uwo ukunda?"

Perezida Kagame yavuze ko Ibyo byose bituruka ku busumbane bwagiye bubaho igihe kirekire mu mateka. Gusa ngo urubyiruko ntirukwiye guheranwa n’ayo mateka kuko ngo nta nubwo umuntu akwiye kwitwaza ayo mateka ngo ananirwe gukora ibyiza, ahubwo ngo abantu bakwiye kumenya ibibazo byabo no kubyikemurira badategereje abaterankunga.

Ati: "Abo baterankunga bazaza cyangwa n’abandi dusanzwe dukorana bajye basanga twashyizeho akacu, basange tugenda, usindagiza undi na we aba atera intambwe, ntabwo wahagarara ngo wegame uhumirize ngo hanyuma abantu baze bagusunike bagusindagize, shyiraho akawe, uko ugenda wongera imbaraga mu gusindagira ni na ko wa wundi agabanya imbaraga yakoreshaga mu kugusindagiza, ndetse ukagera aho utagomba gusindagizwa!!."


Urubyiruko rwitabiriye iri huriro ngarukamwaka ry’urubyiruko ku nshuro ya 6 rwanyuzwe n’impanuro za Perezida Kagame

U Rwanda rukwiye guharanira guhora kuri ’table d’honneur’.

Perezida Kagame yavuze ko abanyarwanda bakwiye guhora baharanira kwicara ku meza y’icyubahiro( ’table d’honneur’.)

Ati: "Iteka aho uzajya ubona ’table d’honneur’ ujye wibaza uti ariko kuki njye ntari kuri table d’honneur? Buriya n’ibihugu iyo byahujwe n’ibiganiro, na ho habayo table d’honneur, iyo ubona ibihugu byacu bya Afurika duhurura tukajya mu nama wajya kubona ukabona twicaye nk’aha table d’honneur turayirebera kure iriho abandi,...Hari aho najye ntajya kuri table d’honneur, ariko aho ntayigiyeho mpava mvuga ngo ariko ubutaha ngomba kujya kuri table d’honneur, ntabwo mvuga njyewe izina ryanjye ndavuga u Rwanda. Kuko njyenda nibaza nti kuki abandi bajya kuri table d’honneur u Rwanda rugahora aho gusa?..."

Yavuze ko urubyiruko ari rwo ruzatuma u Rwanda rwicara kuri table d’honneur kuko ngo urubyiruko nirwo rugomba kumenya impamvu igihugu cyabo kitajya kuri ayo meza y’icyubahiro kandi rugaharanira ko ubutaha na cyo kizayajyaho.

Nubwo wavuga Ndakuramutsa Maliya 100 ntibyakugeza kuri table d’honneur byonyine!

Perezida Kagame yakomeje agira ati: "Uyu munsi si kucyumweru? n’iyo waba udasiba Misa, uhora ujya gusenga, ukavuga ndakuramutsa Maliya 100, ntabwo byakugeza kuri table d’honneur ubwabyo! Reka nkubwire, iyo nza gusanga bishoboka ubu mba njyayo buri gihe, ntabwo mba naje hano mba nagiye gusenga."

Yakomeje avuga ko nubwo gusenga bifasha, ngo gukora ni byo bituma ugera aho ushaka kugera. Ati: "Ibyo na byo wenda birafasha ariko si byo byabiguha, ibibiguha ni mu mumutwe hawe, ni mu mutwe hacu, ari ho duheraho tugashyira ibyo byose mu bikorwa, mu ngiro, mu mikorere. Iyo bibaye ngombwa abandi barara n’amajoro batekereza uko bagera ha handi bashaka, bakigomwa n’ikiruhuko ntibakijyemo."

Nta na rimwe rero ukwiriye kuba utekereza ko wowe n’undi mutandukanye, ukavuga ngo njyewe hariya ni ah’abandi njyewe ntabwo nahagera, uti ni ah’abanya-Burayi, ni ah’abandi ....oya! ni ahacu twese, ahubwo abahashaka barahakorera bakahagera, turahasangiye kandi uwahageze ntiyifuza gukurura abandi ngo ahabageze kuko ntashaka ababyiganira na we kuri table d’honneur .

Yasoje ababwira ko urubyiruko rugomba kwigira ku rubyiruko rwo mu bindi bihugu rugakora cyane "Nta guteta cyangwa gutakaza amahirwe" kugira ngo ruzageze ibihugu byarwo ku meza y’icyubahiro.

IBITEKEREZO

  • Martin Audrey Yanditse:

    do many deserve much ... thx for advise HE !!!

  • Martin Audrey Yanditse:

    do many deserve much ... thx for advise HE !!!

  • Jados Yanditse:

    Ibyo HE yavuze ni ukuri 100%

  • Jados Yanditse:

    Ibyo HE yavuze ni ukuri 100%

  • Jados Yanditse:

    Ibyo HE yavuze ni ukuri 100%

  • MANIRAGUHA JEAN DE DIEU. Yanditse:

    A good advise to youth.

Tanga igitekerezo


Kwamamaza Car Free Day/ 18/02/2018
INKURU ZAMAMAZA 10-08-2018

ITANGAZO RYA CYAMUNARA

Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza