Ntabwo ishyaka rivutse ryose rivamo Perezida, ni nk’uko umwana uvutse agenda aba afite ibibazo-Hon Mukama Abbas

1

Depite Mukama Abbas akaba na Visi Perezida w’ishyaka Ntangarugero muri Demokarasi (PDI) yavuze ko ishyaka ryose rivutse ridakwiye kumva ko rizubaka igihugu binyuze mu kubona umwanya wa Perezida, ngo kuko si buri wese ugira impano n’ubushobozi byo kuyobora igihugu.

Yabitangaje kuri uyu wa Gatandatu mu kiganiro cyavugaga ku ruhare rw’amashyaka ya politiki mu guhuza demokarasi n kuba aigihugu cyaciye kuri Televiziyo na Radiyo Rwanda.

Hari abanenga gahunda yo kwishyira hamwe kw’amashyaka ya politiki mu Rwanda muri forumu y’imitwe ya politiki yemewe hagamijwe kungurana ibitekerezo ku ngingo zigamije iterambere ndetse na gahunda yo gusangira imyanya ku mashyaka yose yagize amajwi asabwa mu matora.

Hari abanenga kandi amashyaka ashingwa aho gushyiraho gahunda zayo no kwiyamamariza imyanya ikomeye nk’uwa Perezida wa Repubulika ngo ahangane n’asanzwe ayobora, bagahitamo gushyigikira amashyaka akomeye.

Mukama Abbas visi Perezida wa PDI, rimwe mu mashyaka akunze kwifatanya na FPR Inkotanyi mu gihe cy’amatora, yavuze ko abumva ko bashinga ishyaka uyu munsi bagahita bashaka kuba ba Perezida bafite ikibazo.

Yagize ati “..abantu bose ntabwo banganya ubushobozi, hari umuntu uba ufite ubushobozi bwo kuyobora igihugu, hari umuntu ufite impano Imana ayamuhaye yo kuyobora igihugu...Ishyaka rivutse hari gahunda n’umurongo riba rigomba kubanza gutegura…umwana uvutse agenda, aba afite ibibazo, no muri politiki niko bimera.”

Yakomeje agira ati “nshobora kuba nafasha mu bindi, ariko wenda numva ntaraba tayari yo kuyobora abanyarwanda miliyoni 10 uko mbazi, ariko igihe nikigera, namaze kumva ko ntangiye guhumeka politiki yanjye, nzamutanga (umukandida).Icyo gihe iyo udashoboye kwiyamamariza uwo mwanya, ushobora gusaba abayoboke bawe ko bashyigikira ubishoboye.”

Mukama avuga ko uramutse wanze gushyigikira ubushiboye kandi ubizi neza ko hari ibyo undi mukandida akurusha, ngo ntabwo waba ukora politiki igamije ineza ya abenshi ahubwo uba wireba ku giti cyawe.

Ati “niba ubona ko akurusha ubushobozi, afite gahunda ya politiki abanyarwanda bashaka, nawe uvuga ko ari gahunda nziza uramushyigikira kuko ibyo akora byose ni ku nyungu z’u Rwanda.”

Mukama yavuze ko u Rwanda rudakeneye politiki aho abantu birirwa mu mihanda bigaragambya cyangwa abadepite barwanira mu Nteko Ishinga Amategeko kandi hari ubundi buryo bwo kuganira ku bibazo bigakemuka mu mahoro.

Ishyaka PDI kuva muri 2010 ni rimwe mu basabye ku ikubitiro ko Itegeko Nshinga ry’u Rwanda ryo mu 2003 rivugururwa, Perezida uriho akongera kwiyamamariza indi manda.Ryatangaje kandi ko rizanamushyigikira naramuka yiyamamaje mu matora azaba muri Kanama uyu mwaka.

Yisangize Inshuti.

Ibitekerezo 1

  1. Ndashimira Hon Mukama Abbas kunama ntagereranywa yatanze kandi nkeka ko haricyo izahindura kumitekereze yamwe mumashya ashaka kuziyamamariyta umwanya wa President wa Repeburika kandi wenda aribwo agishingwa ataranamenya uko yazakomeza guteza imbere imibereho myiza Urwanda rumaze kugeraho! murakoze kandi na PDI ni abo gushimirwa rwose!

Tanga Igitekerezo