Nta munyarwanda uzahanirwa kutajya kumva abakandida biyamamaza: NEC

Komisiyo y’igihugu y’amatora (NEC) yatangaje ko umunyarwanda utazajya kumva imigabo n’imigambi y’abakandida bifuza kuyobora igihugu atazabihanirwa.

Guhera kuwa Gatanu 14 Nyakanga 2017 abakandida bahatanira kuyobora u Rwanda baratangira kuzenguruka igihugu biyamamaza. Aba bakandida bazasanga abaturage babatangarize ibyo bazabagezaho nibaramuka batowe.

Abaturage bahurira ahantu hamwe umukandida akahabasanga akagezaho imigabo n’imigambi ye. Hari abibaza niba abaturage bategetswe kuza kumva abo bakandida cyangwa bakwiye kuza kubera ubushake bwabo.

Umunyamabanga wa komisiyo y’igihugu y’amatora Munyaneza Charles yavuze ko amatora ataje guhagarika ubuzima bw’igihugu.

Ati " Amatora ntabwo aje guhagarika ubuzima bw’igihugu, azaba n’abakora imirimo yabo bakomeze bakore. No kujya kwamamaza rero ntibizahagarika imirimo y’abantu .”

Munyaneza yavuze ko kujya kumva imigabo n’imigambi y’abakandida atari itegeko ndetse ko nta n’Umunyarwanda uzahanirwa kutajyayo.

Ati "Niba umukandida aje ukaba utamushaka nta tegeko rihana utagiye aho umukandida ari kwiyamamariza n’ubwo ari byiza kujyayo. Twe icyo dushishikariza abantu ni ukujya gutega amatwi abakandida babo ariko si itegeko kujyayo.”

Hari kandi n’impungege zifitwe na bamwe mu baturage ko mu gihe cyo kwamamaza abakandida hashobora kubaho ubujura.

Minisitiri w’ubutabera Busingye Johnston yavuze ko iki kibazo bagifatiye ingamba kuko uko abajura bari kwiga imigambi yo kwiba ngo na leta iri kujya imigambi yo kubafata.

Ati "abajura bari mu myiteguro mu batubwirire ko mu myiteguro natwe turimo harimo ibashinzwe. Hari abazabona abandi bagiye kwamamaza bakirara mu ngo zabo no mu mirima yabo.. mu babwire ngo tubarusha gucunga neza no kwitegura neza, dufite amategeko adushyigikiye kandi bo nta mategeko bafite abashyigikiye.”

Icyakora Busingye yavuze ko abaturage nabo bakwiye gushyira mu gaciro, bakirinda kwandarika imitungo yabo kandi bazi ko badahari.

Ati "..Ariko gusiga ibyawe ku karubanda ngo ni uko polisi yagusezeranyije kubigucungira harimo uburangare. Ntekereza ko hakwiye kubamo gushyira mu gaciro, ugasiga ukinze ibintu byawe ubishyize ku murongo.”

Umuyobozi wa polisi y’igihugu IGP Gasana Emmanuel nawe yavuze polisi y’igihugu n’izindi nzego z’umutekano biteguye kurinda umutekano mu gihugu hose by’umwihariko muri iki gihe cy’amatora.

Yisangize Inshuti.

Ibitekerezo

Tanga Igitekerezo