Nta munyafurika wakwibagirwa ko Misiri yafashije mu bwigenge bwa Afurika-Kagame abwira Perezida wa Misiri

1

Ku mugoroba wo kuri uyu wa 15 Kanama, Perezida Paul Kagame n’abandi bayobozi bakuru b’igihugu bakiriye ku meza Perezida wa Misiri Abdel Fattah El Sisi n’abamuherekeje mu ruzinduko yagiriye mu Rwanda aho Perezida Kagame yamushimiye kuba Misiri ayoboye yaragize uruhare mu kubohora Afurika mu gihe gikenewe.

Perezida Abdel Fattah El Sisi yageze mu Rwanda mu gitondo cyo kuri uyu wa 15 Kanama, asanganirwa na Perezida Kagame n’abandi bayobozi bamwakira ku kibuga cy’indege mpuzamahanga cya Kanombe bamuha ikaze mu Rwanda.

Nyuma yo kwakirwa, Perezida Sissi yagiye gusura urwibutso rushyinguyemo imibiri y’abazize Jenoside yakorewe abatutsi ruri i Kigali ku Gisozi asobanurirwa amateka ya Jenoside yakorewe abatutsi aahava avuze ko jenoside idakwiye kuzongera kubaho ukundi.

Ku mugoroba wo kuri uyu wa 15 Kanama, ni bwo uyu muyobozi n’itsinda ry’abamuherekeje bakiriwe ku meza na Perezida Kagame n’abandi bayobozi bakuru mu Rwanda banagirana ibiganiro.

Perezida Kagame yavuze ko u Rwanda rwishimiye kwakira abakerarugendo n’abashoramari baturutse muri Misiri cyane cyane ko nta na Visa bakenera kwaka mu gihe baba baje mu Rwanda yongeraho ko Misiri n’u Rwanda bihuriye kuri byinshi.

Ati: "Misiri n’u Rwanda ntabwo bihuriye ku mupaka ariko bisangiye byinshi aribyo umubano wacu ushingiyeho. Nta munyafurika wakwibagirwa uburyo Misiri yafashije mu bwigenge bwa Afurika igihe byari bikenewe cyane. Abanya-Misiri ntibagikeneye kwaka viza zo gusura u Rwanda, twizeye ko ibi bizongera umubare w’abakerarugendo n’abacuruzi baturuka muri iki gihugu"

Perezida Kagame avuga ko kuba hari gushyirwa imbaraga mu mavugurura y’umuryango wa Afurika yunze ubumwe ari indi ntambwe mu kugera ku bwigenge busesuye kandi bwuzuye.

Ati: "Uyu munsi, turakataje mu kugeza abaturage bacu ku burumbuke n’ahazaza heza mu buryo burambye. Amavugurura y’ubumwe bwa Afurika turimo ni ugukomeza gushimangira ubwigenge no gushyira hamwe byacu nk’umugabane.”

Perezida Sissi na we yashimiye Kagame uburyo ashishikarira guteza imbere abaturage b’igihugu ayoboye ndetse avuga ko abanya-Misiri bamwubaha kandi bakamufatiraho urugero.

Yagize ati: “Nasanze Perezida Kagame ari umugabo ukoresha imbaraga ze zose mu guharanira iterambere ry’u Rwanda n’abanyarwanda. Mufite abavandimwe mu Misiri babubaha, babafataho urugero, kandi biteguye gufatanya namwe.”

Perezida Sissi yasuye u Rwanda avuye muri Tanzania, uruzinduko rwe akazarukomereza muri Tchad na Gabon.

Soma izindi nkuru zijyanye n’uruzinduko rwa Perezida Sissi:Perezida Kagame yakiriye mugenzi we wa Misiri uje mu ruzinduko rw’akazi mu Rwanda

Imirunga iziritse umubano w’u Rwanda na Misiri uruzinduko rwa Perezida Sissi ruje rusanga

Perezida wa Misiri yunamiye abazize Jenoside yakorewe abatutsi bashyinguye ku Gisozi

Yisangize Inshuti.

Ibitekerezo 1

Tanga Igitekerezo