Nitutivugira amateka yacu, ntitukababazwe n’uwatuvuze uko tudashaka-Min Busingye

Minisitiri w’Ubutabera mu Rwanda akaba n’Intumwa Nkuru ya Leta, Busingye Johnston, yavuze ko u Rwanda n’Afurika bikunda kuvugwa nabi n’itangazamakuru ryo hanze, ariko bikaba ari inshingano zo kwivuga neza kuko iyo utivuzeho ukuri udakwiye kubabazwa n’uwakuvuze nabi.

Ibi Minisitiri Busingye yabitangaje kuri uyu wa 07 Ugushyingo 2016, ubwo yafunguraga ibiganiro byo kwizihiza Umunsi Nyafurika w’Itangazamakuru uri bunatangarizwemo uko urwego rw’itangazamakuru mu Rwanda ruhagaze( Rwanda Media Barometer).

Busingye yavuze ko Afurika ikunda kumvikana mu binyamakuru mpuzamahanga mu makuru y’incamugogo agaragaza ko Afurika icyennye cyane, irangwa n’amakimbirane, ubuswa no kureba hafi , ruswa, iterambere ryadindiye inyuma n’ibindi bigaragaza ko uyu mugabane uri mu manga.

Yagize ati “Ibyiza by’uyu mugabane ntibitangazwa, bitangazwa nabi, cyangwa ukuri kurirengagizwa. Gusa ntitudatangaza amateka yacu, sintekereza ko dukwiye kuzigera tubabazwa nuko undi muntu yayanditse uko tudashaka.Ni inshingano zacu kugaragaza amateka yacu kurusha undi wese.”

Minisitiri Busingye kandi yakomoje ku itangazamakuru ryo mu myaka yashize aho ryagize uruhare mu ivanguramoko no gushyigikira umugambi wa Jenoside kugeza ushyizwe mu bikorwa.

Yavuze ko ari naryo ryafashije ubutegetsi kumvikanisha ko u Rwanda ari nk’ikirahure cyuzuye ndetse abo cyibarutse batagikwirwamo ariko kuri ubu kikaba kiyobowe n’ibitekerezo kurusha ubunini bwacyo.

Ati “Byaravuzwe ko u Rwanda ari igihugu gito, gituwe cyane kidashobora guturamo gukwirwamo abaturage bacyo bose.Benshi mu bayobozi b’ibinyamakuru muri icyo gihe bashyigikiye Jenoside yakorewe abatutsi muri Mata 1994.Uyu munsi uko igihugu kingana bigaragarira mu bitekerezo by’abagituye ntabwo ari imiterere yacyo, Abaturage bose bakwira muri iki gihugu.”

Kuri ubu ngo abo cyabyaye bagikwirwamo ndetse kikongeraho n’abandi.Aha yagize ati “Ntabwo tukirangwa n’ibihe by’icuraburindi u Rwanda rwanyuzemo, ahubwo ari ukureba kure kwimirijwe imbere muri iki gihe no mu gihe kizaza.”

Busingye yavuze ko Leta y’u Rwanda ishima uruhare rw’itangazamakuru mu guteza imbere imiyoborere, gukorera mu mucyo, iyubahirizwa ry’amategeko ndetse no gutanga Serivisi nziza aho itangazamakuru ari igikoresho cyafashije Leta kugera kuri byinshi u Rwanda rushimirwa.

Umuyobozi wa RGB, Prof Shyaka Anastase nawe yagarutse ku byagezweho mu guteza imbere itangazamakuru aho abishingira ku bwiyongere bw’Ibinyamakuru, Amaradio, za Televiziyo n’ibindi.

Aha yavuze ko mu myaka 22 habaye ubwiyongere bw’intangazamakuru bukomeye aho mu mwaka wa 1994, Radio hari ebyiri nazo zagize uruhare muri Jenoside yakorewe Abatutsi,ubu zikaba ari 36, mu myaka ine ishize kandi hari Televisiyo imwe nayo ya Leta(TVR) ariko ubu hakaba hari 12 z’abikorere ku giti cyabo.

Yavuze kandi ko hashyizweho itegeko rigamije gutuma abaturage n’abanyamakuru babona amakuru yo mu nzego za Leta no mu nzego zimwe z’abikorera.

Iri tegeko rishyiraho kandi inzira n’uburyo biteza imbere itangazwa n’ikwirakwizwa ry’amakuru.Kandi ngo hashyizweho Urwego rw’Abanyamakuru bigenzura (RMC).

@Eric Birori

Yisangize Inshuti.

Ibitekerezo

Tanga Igitekerezo