N’undi muyobozi abaturage bazasabira kongezwa manda bizakorwa-Senateri Tito

Senateri Tito Rutaremara yavuze ko n’undi muyobozi uzayobora u Rwanda agakora neza abaturage bakabyishimira, ngo bafite uburenganzira bwo kuzamusabira kongezwa manda kandi bigakorwa.

Yabitangaje kuri uyu wa Mbere mu kiganiro nyunguranabitekerezo Komisiyo ya politiki muri sena yagiranye n’Itangazamakuru, ku mahame remezo agize Itegeko Nshinga u Rwanda rugenderaho ari nayo atanga umurongo mugari wa politiki zishingirwaho mu miyoborere n’iterambere ry’igihugu.

Muri icyo kiganiro, hari uwabajije ku ihame ry’uburinganire bw’abaturage imbere y’amategeko, nyamara Perezida uriho akaba yaremerewe indi manda mu Itegeko Nshinga ryavuguruwe muri 2015, hibazwa niba hagize undi utorwa we yahabwa iyo manda y’imyaka irindwi.

Ingingo ya 101 yateganyaga manda ebyiri kuri Perezida, abaturage basabye ko ivugururwa Perezida Paul Kagame uriho akabasha kwiyamamariza indi manda.

Senateri Tito yavuze ko Itegeko Nshinga riha buri wese uzatorwa mu matora ya Perezida ataha uburenganzira bwo kuyobora manda y’imyaka irindwi, yaba Perezida uriho cyangwa undi.

Yakomeje avuga ko kuba abaturage barasabye ko Itegeko Nshinga rivugururwa Perezida uriho akongera kwiyamamaza bizakorwa no ku wundi wese uzayobora u Rwanda abaturage bakamukunda mu mugihe kizaza.

Yagize ati “Nihabaho n’undi muyobozi agakora neza abaturage bagasaba ko yongererwe manda, bizakorwa.Abaturage nibaza bakabisaba byubahirije amategeko bizakorwa ariko nibatabikora ntabwo bizakorwa. Ni uburenganzira bwabo.”

Senateri Tito kandi yasobanuye kuri gahunda yo gusaranganya ubutegetsi mu mashyaka ya politiki yemewe mu Rwanda, cyane cyane mu Nteko Ishinga amategeko.

Hari abakunze kuvuga ko ari ikinamico ry’ishyaka ririho ndetse bikaba byanatuma uguhangana kw’ibitekerezo byubaka igihugu kugabanyuka, mu gihe ishyaka runaka riba ryizeye ko uko byagenda kose rizahabwa imyanya mu Nteko.

Tito yavuze ko gusaranganya ubutegetsi mu Rwanda atari ikinamico, ko n’ahandi bikorwa kandi bigatanga umusasruro, dore ko ngo bijya kujyaho byaganiriweho.

Ati “Mu biganiro twabanje kugira mbere mbere y’Itegeko Nshinga ryo mu 2003 , abanyarwanda batubwiraga ko nidusangira ubutegetsi bizabaha amahoro..ntabwo ari ikinamico rero kuba Perezida w’Umutwe w’abadepite ava mu ishyaka ritandukanye n’irya Perezida kuko ishyaka ryatsinze kubera ko rifite ubwiganze mu Nteko, rishobora kuza rifite ibyo ryaganiriye, bakemeza ibyo bishakiye ariko baza babwira Perezida w’Inteko bati dutore ibi akabyanga, ati mubanze mubiganireho ndetse akaba yasaba ko bijyanwa no muri Komisiyo.

Senateri Tito yakomeje avuga ko uburyo bwo gusaranganya ubutegetsi hari n’ahandi ku isi bukoreshwa nko uri Suwede, Finland, Norvege, na Denmark.

Icyakora ngo u Rwanda mu myaka iri imbere igihe byazagaragara ko ubwo buryo butagikenewe, ngo bashobora kubyigaho bugahinduka.

Yisangize Inshuti.

Ibitekerezo

Tanga Igitekerezo