Muhima: basenye indiri y’abamarine bazengereje abagenzi,banasibura ruhurura ihegereye

2

Kuri uyu wa 30 Nyakanga 2016 habaye umuganda rusange aho abaturage bo mu Murenge wa Muhima mu karere ka Nyarugenge bawukoranye n’abajyanama bo ku rwego rw’umujyi wa kigali bakaba batemye ibihuru byari indiri y’amabandi azwi nk’abamarine ndetse bakora ruhurura ijyana amazi mu gishanga cya Nyabugogo.

Umuganda rusange usoza ukwezi mu murenge wa Muhima wahuje utugari twa Tetero, Kabeza, na Nyabugogo aho bakoze mu gishanga cya Nyabugongo kizwiho kuba indiri y’amabandi yambura abantu akirukiramo ndetse hakorwa na ruhurura ijyana amazi mu gishanga cya Nyabugogo, yari imaze gusibama ku buryo amazi atari akigenda.

Umunyabanga Nshingwabikorwa w’Umurenge wa Muhima Ruzima John yongeye kwibutsa abaturage bo mu Murenge wa Muhima ko isuku n’umutekano ari ibyambere asaba kubyitaho cyane.

Ruzima John Kandi yongeye kugaya abaturage bo muri uyu murenge banga gutanga amafaranga y’isuku ahubwo bakamena ibishingwe muri ruhurura, abibitsa ko uzafatwa batazihanganirwa.

Yagize ati “biriya bicupa mwabonye muri ruhurura ntago byavuye i Nyamirambo ni abaturage ba Muhima babishyira mo banga gutanga amafaranga y’ibishingwe ariko nagira ngo mbabwire ko kutazihanganira umuntu wese ubangamira isuku y’umujyi wa Kigali.”

Yongeyeho umutekano nawo ari uwibanze ndetse ko abamarine bakomeje kwambura abantu ibyabo bakirukira mu gishanga cya Nyabugogo bagiye guhagurukirwa bafatanyije n’inzego z’umutekano bakabirukana burundu.

Abajyanama bo mu mujyi wa Kigali bahaye baganirije abaturage bo mu murenge wa Muhima kuri gahunda za leta zirimo umunsi w’umuganura uzaba tariki ya 05 Kanama 2016, gutanga ubwisungane ,mu kwivuza no gahunda yo gutora abarinzi b’igihango.


Abajyanama bo mu mujyi wa Kigali mu muganda ku Muhima

Ibihuru byari indiri y’abamarine byatemwe

ruhurura yari irimo umwanda mwinshi

Yisangize Inshuti.

Ibitekerezo 2

Tanga Igitekerezo