Abanyarwanda bakwiye gutekereza k’uzasimbura Kagame waba nka we-Mugesera

Senateri Antoine Mugesera yasabye abantu bize mu Rwanda gutekereza uburyo politike y’u Rwanda yaramba ntishingire ku muntu umwe gusa.

Ibi Senateri yabivuze mu mu kiganiro aherutse guha abakozi b’ibigo bya Leta birimo ikigo cy’imisoro, komisiyo y’amatora ndetse n’ab’urwego rw’umugenzuzi w’imari ya leta.

Senateri Antoine Mugesera yabwiye abari bitabiriye iki kiganiro ko bakwiye gutekereza ku cyatuma politike u Rwanda ruri kubaka iramba ntigendere ku muntu umwe.

Ati :”Icyo nshaka kubabaza ibi bintu byo kubaka politike y’ubumwe turimo dukora, byaramba bite? Dushaka ibintu biramba, twakubaka gute ibigo biramba. Ejo tukumva ngo umuyobozi w’ikigo runaka avuyeho hakajyaho undi ejo , undi akavaho hakajyaho undi nicyo nshaka, byaramba bite ? .”

Mugesera avuga ko Perezida w’u Rwanda areba kure ariko kandi ko uzamusimbura na we akwiye kuzaza adasubiza ibintu inyuma.

Ati :”Tukubaka politike ikomeye, tugira Perezida ufite icyerekezo kandi ureba kure twifuza ko ejo nasaza agatanga ikivi hakajyaho undi umusimbura na we azamera nkawe.”

Mugesera avuga ko abantu nka Perezida Kagame batabara ibihugu byari biri mu mage bagiye babaho nko mu Bufaransa na Amerika, kandi ko bubatse politike ziramba n’ababasimbuye bagakomerezaho.

Yavuze ko no mu Rwanda iyi politike yo kubaka ibintu biramba bitagendera ku muntu umwe ikenewe.

Ati :”Nicyo dushaka. Ibigo byaramba gute? ntibiterwe n’umuntu umwe ibigo byanyu bigakomera ntibiterwe n’uko hari Pierre cyangwa hari n’undi. Imyaka n’imyaka bwa bukungu bwacu bukaramba kandi twese tukabwibonamo. Ubwigenge bwacu bukaramba ijabo ryacu rikaramba ntibiterwe n’uko hari umuntu umwe”

Mugesera avuga ko ibi aribyo byonyine byatuma icyerekezo cy’u Rwanda kiramba abanyarwanda bakagira icyizere cy’ejo hazaza.

Yisangize Inshuti.

Ibitekerezo

Tanga Igitekerezo