Mu mpunzi ibihumbi icumi zizataha mu Rwanda muri 2016, hamaze gutaha ibihumbi bine

Ishami ry’umuryango w’Abibumbye ryita ku mpunzi rikorera mu Rwanda ryihaye intego yo gucyura impunzi 10,000 mu mwaka wa 2016. Kugeza ubu hamaze gutahuka impunzi 4,100 kuva muri Mutarama.

Imibare uyu muryango washyize ahagaragara irerekana ko muri Nzeli 2016, mu Rwanda hatahutse impunzi zigera kuri 516, naho umubare w’impunzi zimaze gutahuka muri 2016 zikaba ari 4,100 mu gihe uyu muryango wari ufite intego yo gucyura impunzi 10,000 muri uyu mwaka.

Abantu 516 batahutse bose baturutse muri Congo uretse umuntu umwe waturutse muri Zambia. Congo kandi ni nacyo gihugu cyaturutsemo impunzi nyinshi zatahutse muri kuva muri 2009 kugera 2016 kuko haturutseyo abantu 60,965 mu gihe Uganda ikurikiraho haturutse abantu 6,540 naho mu bindi bihugu byose impunzi zaturutseyo ziri munsi y’abantu 250 kuva muri 2009.

Mu bantu bakiriwe muri Nzeli, 437 banyuze ku mupaka wa Gisenyi, 78 banyura ku mupaka wa Cyangugu n’undi umwe 1 wakiriwe i Kigali. umubare w’abatahutse muri Nzeli wiyongereyeho 4% ugereranyije n’abatahutse muri Kanama.

Uturere dutatu tuza mu myanya ya mbere mu kwakira impunzi zatahutse muri Nzeli ni Rubavu (20%), Musanze (19%) na Nyabihu (17%) muri aba 60% bakaba ari abo mu ntara y’Uburengerazuba.

Kuva muri 2009 hamaze gutahuka impunzi 68,277 naho kuva 1994 hamaze gutahuka abantu 3,433,220.

Umuntu akurikije iyi raporo, yavuga ko hari intambwe nini yatewe mu gucyura impunzi z’abanyarwanda baba mu mahanga ariko na none biragaragara ko bigoye ko muri 2016 UNHCR izagera ku ntego yari yihaye yo gucyura impunzi 10,000.

Biragaragara ko hamaze gutahuka abantu 4,100 bangana na 41% by’abo bari biyemeje gucyura kandi umwaka wa 2016 usigaje amezi atageze kuri atatu ngo urangire.

Ibi biragaragaza ko hagikenewe izindi mbaraga mu gucyura abanyarwanda b’impunzi mu bihugu bitandukanye aho nko muri Zambia habarurwa abanyarwanda benshi ariko kuva muri 2009 hamaze gutahuka abantu 70 gusa.

Biteganyijwe ko umwaka wa 2017 uzarangirana na sitati y’ubuhunzi ku banyarwanda bahunze hagati ya 1959 na 1998.

Yisangize Inshuti.

Ibitekerezo

Tanga Igitekerezo