Minisitiri Mushikiwabo yifurije amahirwe Etiyopiya yatorewe guhagararira Afurika mu kanama k’amahoro ku isi

Minisitiri w’Ububanyi n’amahanga w’u Rwanda Louise Mushikiwabo yifurije amahirwe igihugu cya Etiopiya cyatorewe kuba umunyamuryango udahoraho mu kanama gashinzwe amahoro ku isi.

Uyu mwanya Ethiopia yawegukanye mu nama ya 70 y’Inteko rusange y’umuryango w’abibumbye yabereye ku cyicaro gikuru cy’uyu muryango kiri I New York muri Leta zunze ubumwe za Amerika, kuri uyu wa 28 Kamena 2016.

Abinyujije ku rukuta rwe rwa Twitter, Minisitiri w’Ububanyi n’amahanga w’u Rwanda yifurije amahirwe igihugu cya Etiyopiya cyatorewe kuba umunyamuryango udahoraho mu kanama gashinzwe amahoro ku isi.

Yagize ati “Twifurije amahirwe Etiyopiya, umukandida wa Afurika watorewe uyu munsi kuba umunyamuryango udahoraho w’akanama gashinzwe amahoro ku isi”.

Iyi ni inshuro ya gatatu iki gihugu gitorerwa kuba umunyamuryango w’aka kanama kuko cyari cyaramubaye mu mwaka wa 1967 – 1968 cyongera muri 1989 – 1990.

U Rwanda narwo rwabaye umunyamuryango udahoraho muri aka kanama inshuro ebyiri, mu mwaka wa 1994-1995 rwongera kumuba mu 2013-2014.

Biteganyijwe ko Ethiopia izahagararira Afurika muri aka kanama mu gihe cy’imyaka ibiri izatangira kuva tariki ya 1 Mutarama 2017.

Ethiopia kandi iri kumwe muri aka kanama n’ibihugu nka Sweden, Bolivia, Egypt, Japan, Senegal, Ukraine na Uruguay nk’abanyamuryango badahoraho ndetse n’Ubwongereza, Ubufaransa, Ubushinwa, Uburusiya na Leta zunze ubumwe za Amerika nk’abanyamuryango b’aka kanama bahoraho.

Ethiopia yegukanye uyu mwanya ahanini bishingiye ku bunararibonye ifite mu bikorwa byo kubungabunga amahoro hirya no hino, kuko iri mu bihugu biza imbere mu kugira ingabo zibungabunga umutekano mu bihugu bitandukanye.

Ubundi aka kanama niko kaba gashinzwe by’umwihariko gukurikirana ibibazo by’umutekano ku isi mu buryo buhoraho kandi bwa buri munsi ndetse kagafata n’ibyemezo bikomeye mu kubungabunga amahoro ku isi yose.

Donat Niyitanga

Makuruki.rw

Yisangize Inshuti.

Ibitekerezo

Tanga Igitekerezo