Minisitiri Murekezi yavuze ko isoko ry’Imari n’Imigabane ari indi nzira yo kwibohora

Minisitiri w’Intebe, Anastase Murekezi, yavuze ko isoko ry’Imari n’imigabane ari uburyo bushya bwo kwibohora kuko buzafasha Afurika kugira ijambo mu bukungu ku ruhando mpuzamahanga ndetse no kudategereza ak’imuhana.

Ibi Minisitiri Murekezi yabitangarije ubwo yafunguraga ku mugaragaro inama ya 20 y’Ihuriro ry’Ibigo by’Imari n’Imigabane muri Afurika (African Securities Exchanges Association -ASEA) kuri uyu wa Mbere tariki 28 Ugushyingo 2016.

Minisitiri Murekezi yagize ati “Turi gutangiza ikindi gika cy’amateka mu rugamba rwo kwibohora… Iyi ni inzira nziza izatugeza aho twifuza ndetse n’umugabane w’Afurika ukabasha kugira ijambo mu bukungu bw’isi”.

Minisitiri yavuze ko intego ihuriweho n’ibihugu by’umugabane w’Afurika ari ukwiteza imbere ku buryo isatira indi migabane cyane ko hari igihe cyageze igasa n’iyasigaye inyuma.

Yavuze ko byose bizaturuka ku buryo za Leta zikorana n’abikorera ndetse zigakorera hamwe kuko nta gihugu gishobora kuba Nyamwigendaho ngo gihaze isoko ryacyo n’iry’umugabane kabone niyo cyaba gikize cyane.

Yakomeje agira ati “Turashaka kwigira kandi isoko ry’imari n’imigabane rikaba imbarutso mu kuzamura ubukungu bw’umugabane w’Afurika. Tugomba gukora cyane kandi tugakorera hamwe mu rwego rwo kwihaza mu bukungu bw’imbere no ku isoko mpuzamahanga”.

Yavuze ko hirya no hino iri soko ryatangiye kugira uruhare rugaragara mu guteza imbere umugabane ariko asaba ko rikwiye guhuzwa n’ikoranabuhanga ngo rirusheho kugira ingufu kuko isi isigaye yarabaye umudugudu.

Umuyobozi w’Isoko ry’isoko ry‟imari n‟imigabane mu Rwanda;Celestin Rwabukumba yavuze ko isoko ry’u Rwanda rihagaze neza usibye kuba ubukungu bw’isi muri rusange budahagaze neza, ndetse byinshi mu bihugu birushaho kugenda byikunda cyane.

Aha yagarutse nko ku kuba u Bwongereza buherutse gufata umwanzuro wo gusohoka mu muryango w’Uburayi byiswe “Brexit”.

Ngo umusaruro mbumbe w’isoko ry’u Rwanda ufite agaciro miliyari 3,6, mu gihe ubukungu bw’u Rwanda bufite umusaruro mbumbe wa Miliyari 7,8 hafi 50%, aha akavuga ko bishimishije kuko isoko ryihariye hafi kimwe cya kabiri.

Benshi bagiye bafata ijambo muri iyi nama bagarutse ku kuvuga ko Afurika idakennye ahubwo ari uko amafaranga yayo acunzwe nabi aho kuri ubu habarurwa Miliyari 500 z’amadolari y’Amerika abitse hanze, mu gihe usanga nta n’imishinga iyayingayinga iri kuri uyu mugabane.

Benshi bagiye bavuga ko ariko iterambere ry’umugabane w’Africa rigenda ryigaragaza muri ibi bihe kurusha ahenshi mu nguni zose z’isi.

Iyi nama ihuje abarenga 300 baturutse mu muri Afurika no ku yindi migabane, barimo impuguke ndetse n’abafatanyabikorwa b’Isoko ry’Imari n’Imigabane, abanyamategeko, abakozi b’amasoko y’imari n’imigabane, abahagarariye guverinoma zitandukanye, abashoramari mpuzamahanga, ibiko by’ikoranabuhanga n’abandi.

@Eric Birori

Yisangize Inshuti.

Ibitekerezo

Tanga Igitekerezo