Min. Mushikiwabo yanenze icyemezo cya Komisiyo y’amatora cyo kugenzura imbuga nkoranyambaga

2

Minisitiri w’Ububanyi n’amahanga Louise Mushikiwabo yavuze ko adashyigikiye Komisiyo y’amatora ku cyemezo cyayo cyo kuzagenzura ubutumwa bw’abiyamamariza umwanya w’umukuru w’igihugu cyangwa gufunga imbuga nkoranyambaga, ngo kuko ari ukubuza abantu ubwisanzure bwo kugaragaza icyo batekereza.

Ibinyamakuru byo mu Rwanda na mpuzamahanga bimaze iminsi bitangaza ko Komisiyo y’amatora iteganya kujya igenzura ubutumwa abakandida baziyamamariza umwanya wa Perezida bazajya bashaka gutambutsa ku mbuga nkoranyambaga zabo mbere y’uko butambuka.Hari kandi n’amakuru y’uko imbuga nkoranyambaga zishobora gufungwa mu gihe cy’amatora.

Ibi ngo ni mu buryo bwo kurinda ko habaho gutangaza ibishobora guhembera urwango mu banyarwanda n’ibisa narwo.

Abicishije kuri Twitter mu ijoro ryo kuri uyu wa Kabiri, Minisitiri w’ububanyi n’amahanga w’u Rwanda yanenze icyo cyemezo avuga ko bihabanye n’ubwisanzure bwo gutanga ibtekerezo.

Yavuze ko yubaha Komisiyo y’amatora kandi adashyigikiye ubutumwa bushobora kuryanisha abanyarwanda, icyakora avuga ko byaba byiza baretse abanyarwanda bakagaragaza ibyo batekereza hagira uzana ibirimo amacakubiri akabihanirwa.

Yagize ati “Nubaha cyane Komisiyo y’Amatora, ariko sinemeranya nayo ko Abanyarwanda mu matora bagomba ikibari(uruhushya) cy’ubutumwa ku mbuga nkoranyambaga!!Gusangiza amakuru NEC mbere yo kuyatangaza biteye inkeke.Reka abanyarwanda bagaragaze ibitekerezo byabo, noneho amategeko akore akazi kayo niba hari aho bikenewe.”

Yakomeje avuga ko abanyarwanda benshi bakuze ku buryo byoroshye kumenya ikiza n’ikibi aho kubagenzura mbere yo gutanga ibitekerezo.Yavuze ko uzashaka kucamo ibice abanyarwanda amategeko aricyo abereyeho.

Gufunga imbuga nkoranyambaga mu gihe cy’amatora biheruka kugaragara muri Uganda mu matora yabaye mu mwaka ushize ndetse no muri Repubulika Iharanira Demokarasi ya Congo bijya bikorwa cyane cyane igihe cy’imyigaragambyo.

Imiryango irengera uburenganzira bwa muntu n’iharanira ubwisanzure bwo gutanga ibitekerezo nayo ikunze kunenga ubwo buryo bwo kugenzura no gufunga imbuga nkoranyambaga, ivuga ko ari ukubangamira ubwisanzure bwo gutanga ibitekerezo.

Kwiyamamaza kw’abakandida bahatanira umwanya wa Perezida mu Rwanda bizatangira tariki 14 Nyakanga birangire tariki 03 Kanama.

Ubutumwa Minisitiri Mushikiwabo yatangaje kuri Twitter

Yisangize Inshuti.

Ibitekerezo 2

  1. Kuva iki cyemezo cyatangazwa n iriya commission nta kintu abayobozi bigeze bakinengaho kuko cyafashwe na leta.Mushikiwabo akinenze kuko abonye ko isi yose yacyamaganye...

Tanga Igitekerezo