Min Kaboneka asanga u Rwanda rukwiye kwamamara mu miyoborere nkuko bimeze mu bagore

Minisitiri w’Ubutegetsi bw’igihugu, Francis Kaboneka yabwiye abadepite ko hari gukorwa impinduka zitandukanye ku buryo u Rwanda ruba icyamamare mu miyoborere nkuko bimeze mu bijyanye n’uburinganire bw’umugore n’umugabo.

Ibi yabitangaje kuri uyu wa Mbere tariki ya 14 Ugushyingo 2016, ubwo Inteko Ishinga Amategeko umutwe w’abadepite yasuzumaga ishingiro ry’Umushinga w’itegeko rishyiraho Urwego rw’Igihugu rw’Imiyoborere (RGB) rikagena inshingano, imiterere n’imikorere yarwo.

Minisitiri yavuze ko izi mpinduka Guverinoma yifuje ziri mu rwego rwo kugirango ubushakashatsi u Rwanda rukora bwizerwe byatuma rugaba icyamamare mu miyoborere myiza nkuko ruzwiho mu guteza imbere abagore.

Yagize ati “ Reka mbivuge bisobanuke. Nkuko uyu munsi mu rwego rwa Gender( uburinganire) tumaze kuba ibyamamare, tuzagere naho tuba ibyamamare mu miyoborere myiza, ni iyo spirit buri inyuma y’iri vugurura”.

Mu gutanga ibisobanuro kandi, Kaboneka yavuze ko Guverinoma ishaka ko ,RGB yahabwa ubwisanzure n’ubwigenge bityo ikabasha gukora ubushakashatsi bwagirirwa icyzere kuko itaba ibogamiye ku rundi rwego nkuko kuri ubu ireberwa na Minisiteri y’Ubutegetsi bw’igihugu.

Yagize ati “Guverinoma yasanze igihe kigeze ngo iki kigo noneho kigire ububasha ku bushakashatsi ku buryo bizajya byumvikana ko bwakozwe n’ikigo kigenga, gifite ubwisanzure kidafite urwego rukireberera”.

Iki kigo cyifuzwa kikaba cyaba gifite ubuyobozi bukuru ndetse n’ubunyamabanga bukuru ndetse mu nshingano zacyo kikaba cyahabwa kwandika n’imiryango itari iya leta mvamahanga kuko ubu ubwo bushobozi ntabwo cyari gifite.

Umuyobozi w’iki kigo (CEO) azajya agira manda y’imyaka itanu ndetse mu gutangira inshingano akazajya arahirira imbere y’umukuru w’igihugu.Ibi byose ngo bizatuma urwego rw’imiyoborere ruzamuka ndetse ngo n’ubushobozi bwarwo rugirirwe icyizere ku rwego mpuzamahanga.

Kuri ubu u Rwanda ni ikirangirire mu guteza imbere uburinganire kuko kugeza ubu mu Nteko Ishinga Amategeko abagore bihariye 64 %, mu gihe muri Guverinoma bari kuri 39%.

Ba Guverineri uyu munsi bagize 60% .Muri 2015 ba Meya bari ku 10%, ababungirije bashinzwe ubukungu bari 17%, abashinzwe imibereho myiza ari 84%, ba gitifu b’uturere ni 7%, abagize njyanama z’uturere bari kuri 43% mu gihe abari mu mirimo ya leta muri rusange abagore ari 45%.

Raporo y’umuryango Mo Ibrahim igaragaza uko ibihugu bya Afrika bihagaze mu bijyanye n’imiyoborere yashyize u Rwanda ku mwanya wa 9 mu bihugu 54 bya Afrika biyobowe neza ku manota 62. 3%, rukaba urwa mbere mu rwego rurebana n’uburinganire bw’umugore n’umugabo, aho rufite amanonta 90.3%.

@Eric Birori

Yisangize Inshuti.

Ibitekerezo

Tanga Igitekerezo