MIDIMAR irashinja abakozi ba UNHCR kwangisha abanyarwanda igihugu cyabo

Minisiteri ishinzwe gucyura impunzi no gucunga ibiza (MIDIMAR) iratunga agatoki bamwe mu bakozi b’ishami ry’umuryango w’abibumbye rishinzwe gucyura impunzi (UNHCR) kubuza abanyarwanda bahungiye mu bihugu bitandukanye gutahuka, kugira ngo bakomeze babarireho.

Kuri uyu wa 19 Nyakanga 2016 habaye inama nyunguranabitekerezo yahuje abagize Inteko ishinga amategeko na Minisiteri ishinzwe gucyura impunzi no gukumira ibiza ku bijyanye n’irangizwa ry’ubuhunzi ku banyarwanda.

Ministiri wa MIDIMAR Seraphine Mukantabana yavuze ko tariki ya 31 Ukuboza aribwo abanyarwanda baba mu buhungiro mu mahanga bazakurirwaho sitati y’ubuhunzi rusange abashaka bagataha, abashaka bakaguma muri ibyo bihugu ariko bafite ibyangombwa by’u Rwanda cyangwa se bagafata ubwenegihugu bw’ibihugu byabakiriye, kuko icyateraga ubuhunzi ubu cyavuyeho.

Minisitiri Mukantabana Seraphine yagaragaje ko hari abanyarwanda benshi bamaze gutahuka nanone agaragaza ko mu bagisigaye mu buhungiro harimo ababuzwa n’abakozi ba UNHCR bakomeza kubwirwa amakuru asebya u Rwanda kugira ngo badatakaza akazi ko kwita ku mpunzi.

Yagize ati “Hari abanyarwanda baba bashaka gutaha ariko abakozi ba UNHCR bakababuza gutaha bababwira ibyo bihuha bisebya u Rwanda, bababwira ko nibataha bazabica, ariko baba bashaka ko batagenda bakabura akazi, bakabura ku mugati.”

MIDIMAR igaragaza ko mu bindi bikomeje kubuza abanyarwanda bari mu buhungiro gutahuka harimo kudashyira mu bikorwa umugambi w’umuryango w’abibumbye wo kurandura umutwe wa FDLR urimo abanyarwanda basize bakoze Jenoside mu 1994, ndetse ikaba yarafashe bugwate abashaka gutaha.

Kuba hari abanyarwanda bavuga ko batavuga rumwe n’ubutegetsi bw’u Rwanda bagenda bakwirakwiza ibihuha bavuga ko bari hafi gufata ubutegetsi ndetse bagahohotera abagerageje kwerekana ubushake bwo gutaha, ibi ni ibintu bituma abasigaye babura aho baca bajya gusaba ko bataha, gusa kuri iki MIDIMAR ikaba yarashyize ho uburyo bwo gusaba gutahuka hakoreshejwe ikoranabuhanga.

N’ubwo UNHCR ifasha abanyarwanda bifuza gutahuka, MIDIMAR yagaragaje ikibazo cyo kutagira ingengo y’imari yihariye mu gucyura abanyarwanda no kubatuza nka kimwe gikomeje kubazitira kuko bacungira ku mfashanyo z’abanyamahanga.

Gahunda zo gufasha abanyarwanda batahuka bava mu buhungiro zigera mu turere 13 kuri 30 tugize u Rwanda ndetse hagafatwa imirenge 2 muri buri karere.

Depite Nikuze Nura yavuze ko icyo kibazo cy’ingengo y’imari yihariye yo gucyura ndetse no gutuza abanyarwanda bavuye mu buhungiro gikwiye kwitabwaho ndetse kikaba cyanashyizwe mu myanzuro yafatiwe muri iyi nama.

Abanyarwanda leta y’u Rwanda ivuga ko ari impunzi kandi bakwiye gutaha kuko icyo bahunze cyavuyeho ni abatangiye guhunga mu 1959, 1960, 1963, 1973, 1994 na 1998.

Kugeza ubu hamaze gutahuka impunzi zirenga miliyoni 3 aho mu myaka ya 1994 na 1996 ari ho hatashye abanyarwanda benshi cyane bagera kuri miliyoni 2, MIDIMAR ikaba ivuga ko ubu yakira impunzi 2200.

UNHCR igaragaza ko abanyarwanda basigaye mu buhungiro basaga ibihumbi 200, bakaba bari mu bihugu bya Afurika bitadukanye cyane iy’uburengerazuba ndetse no mu Burayi, n’ubwo Repubulika iharanira demukarasi ya Congo ivuga ko icumbikiye impunzi ziruta izo HCR ivuga ko ziri mu bihugu byose.

Icyemezo cyo gukuraho sitati y’ubuhunzi ku banyarwanda cyagiye kivugwa inshuro nyinshi ariko ntibyashyirwa mu bikorwa, gusa ubu MIDIMAR ivuga ko abazinangira bazakomeza kuba muri ibyo bihugu ariko nta byangombwa bafite, ibihugu batuyemo byashaka bikabirukana.

Yisangize Inshuti.

Ibitekerezo

Tanga Igitekerezo