Leta yashimye agatambwe katewe na Kiliziya ku ruhare muri Jenoside, inenga abanze gusoma itangazo risaba imbabazi

2

Musenyeri Phillipe Rukamba, Umuvugizi wa Kiliziya Gatolika

Leta y’u Rwanda yatangaje ko yashimye agatambwe gato katewe na Kiliziya Gatolika mu Rwanda yemera gusaba imbabazi ku kwijandika muri Jenoside kwa bamwe mu bana bayo, ariko inenga bamwe mu bapadiri batasomeye abakirisitu bayo ubwo butumwa.

Kuri iki cyumweru tariki 20 Ugushyingo ubwo Kiliziya gatolika yasozaga umwaka w’impuhwe z’Imana washyizweho na Papa Francis, mu maparuwasi n’amadiyosezi ya Kiliziya Gatolika mu Rwanda hasomwe itangazo risabira imbabazi bamwe mu bana bayo bagize uruhare muri Jenoside yakorewe Abatutsi muri Mata 1994.

Icyakora nibwo ubwo butumwa bwatanzwe, hari amaparuwasi amwe n’amwe cyane cyane mu mujyi wa Kigali, abakirisitu bumvikanye bavuga ko iryo tangazo ritasomwe.

Mu itangazo ryasohowe na Guverinoma y’u Rwanda kuri uyu wa Gatatu rigashyirwa ku rubuga rwa interineti rwa Minisiteri y’Ubutegetsi bw’Igihugu, Kiliziya gatolika yashimiwe icyo cyemezo yafashe ariko yibutswa ko bidahagije.

Iryo tangazo rya guverinoma rigira riti “Iyi ntamwe ni nziza kuko yerekana kwicuza ariko ntihagije rwose gusa iragaragaza kure kiliziya gatolika ikiri mu kwerekana inshingano zayo zuzuye.”

Guverinoma kandi yanenze abasenyeri batangaje iryo tangazo, kuba barasabye imbabazi ariko ntivuge mu buryo bweruye abo bazisabiye, ngo bigaragaza ko ari uburyo bwo gukingira ikibaba Kiliziya gatolika ngo itagaragaza uruhare rwayo mu byaha byakozwe.

Itangazo rya Kiliziya gatolika ntiryasomwe mu maparuwasi yose . Guverinoma yavuze ko “bibababaje kuba hari abapadiri banze gusomera abayoboke babo ubutumwa bw’abasenyeri nkuko byari byitezwe bitandukanya n’uku kwicuza.”

Mu minsi mike ishize Musenyeri Filipo Rukamba, Umushumba wa diyosezi ya Butare akaba n’umuvugizi wa Kiliziya gatolika, yabwiye itangazamakuru ko kuba ubutumwa butarasomwe mu maparuwasi yose atabizi, gusa ngo n’aho byaba byarabaye buzasomwa.

Yagarutse ku maparuwasi yo mu mujyi wa Kigali, avuga ko umushumba wa diyosezi ya Kigali Thadee Ntihinyurwa ari mu butumwa mu mahanga ariko na we yasinye ku itangazo.

Guverinoma kandi yasabye ko Kiliziya gatolika ku isi isaba imbabazi by’umwihariko, ngo kuko hari n’ibindi byaha ijya isabira imbabazi kandi byoroshye kurusha Jenoside.

Yisangize Inshuti.

Ibitekerezo 2

  1. Ariko mwabaye mute? MWaretse kwikorera Kiliziya Gatolika kugeza ako kageni.Ese iyi Kiliziya niyo yariri mu Rwanda yonyine? Ese andi matorero yo mu Rwanda nta ba kristu bayo bakoze amakosa? Ese usibye abatoboke ba Kiliziya Gatolika ,abana wabyaye ukabarera ntibakunanira kandi baronse ibere rimwe? Ubwo se abakritu ibihumbi ni ibihumbi nibo mubona ko bari kubakurikirana bakabashobora?
    Buri muntu azibarizwa ibye.
    Simpakana ko amakosa atabaye ariko mwiyagereka kuri kiliziya. Ntiyigeze ikoresha mitingi,ntatangazo yasohoye rihamagarira abakristu gukora amahano. Mwishakira impamvu aho zitari. Inzara irabarya mukajya gushakira udufraranga ahantuhose? Uko ni ukwanduranya.
    Jye mbona abayobozi ba Kiliziya Gatolika ibyo bakoze ari ukuri. Mwigumya kubashyiraho iterabwoba dore ko mwamenyereye guhimba no kwemeza abantu ibyaha batakoze ku ngufu. Nimwicare mwisuzume

  2. Ariko mwabaye mute? MWaretse kwikorera Kiliziya Gatolika kugeza ako kageni.Ese iyi Kiliziya niyo yariri mu Rwanda yonyine? Ese andi matorero yo mu Rwanda nta ba kristu bayo bakoze amakosa? Ese usibye abatoboke ba Kiliziya Gatolika ,abana wabyaye ukabarera ntibakunanira kandi baronse ibere rimwe? Ubwo se abakritu ibihumbi ni ibihumbi nibo mubona ko bari kubakurikirana bakabashobora?
    Buri muntu azibarizwa ibye.
    Simpakana ko amakosa atabaye ariko mwiyagereka kuri kiliziya. Ntiyigeze ikoresha mitingi,ntatangazo yasohoye rihamagarira abakristu gukora amahano. Mwishakira impamvu aho zitari. Inzara irabarya mukajya gushakira udufraranga ahantuhose? Uko ni ukwanduranya.
    Jye mbona abayobozi ba Kiliziya Gatolika ibyo bakoze ari ukuri. Mwigumya kubashyiraho iterabwoba dore ko mwamenyereye guhimba no kwemeza abantu ibyaha batakoze ku ngufu. Nimwicare mwisuzume

Tanga Igitekerezo