Komisiyo y’amatora yamaganye abanyarwanda batoresha amaguru n’ibirenge

Komisiyo y’igihugu y’amatora mu Rwanda (NEC) irasaba abanyarwanda ubushishozi mu gutora Perezida wa Repubulika mu matora ateganyijwe muri Kanama uyu mwaka bagatora bakoresheje umutima nama aho gupfa gutora gusa.

Tariki 3 na 4 Kanama 2017, mu Rwanda hateganyjwe amatora ya Perezida wa Repubulika. Kuri ubu hirya no hino mu gihugu hari kubera gahunda nyinshi zitegura iki gikorwa cy’amatora.

Ubwo yaganiraga n’abanyamakuru ku ruhare rwabo mu migendekere myiza y’amatora kuri uyu wa 16 Gicurasi 2017, umuyobozi wa Komisiyo y’igihugu y’amatora mu Rwanda Charles Munyaneza yasabye abanyamakuru kwigisha abaturage gutora neza babanje gushishoza kuko byagaragaye ko hari abajya gutora batazi uwo bagiye gutora n’impamvu ari we bari butore.

Uku kujya gutora umuntu atazi uwo agiye guhitamo mu bandi bakandida ni byo Munyaneza yise gutoresha ibirenge cyangwa gutoresha amaguru.

Yagize ati: “Ushobora gutora utoresheje umutwe cyangwa ugatoresha ibirenge, gutora utoresheje ibirenge birashoboka cyangwa amaguru ni kwa kundi umuntu azinduka cyane saa kumi n’ebyiri, saa kumi n’imwe akajya ku biro by’itora bakaguha urupapuro rw’itora ugatera igikumwe utanatekereje icyo urimo gukora, niba abakandida ari nka bane cyangwa batanu uwo utungukiyeho ukaba ari we utora warangiza ukitahira, burya uba utoresheje ibirenge, uba utoresheje amaguru.”

Yakomeje agira ati: “Ariko turashaka ko abantu batoresha imitwe yabo n’umutima nama wabo, agatora azi uburemere bw’ibyo atora, agatora azi agaciro k’icyo gikumwe cye, Perezida ugiye kuyobora imyaka irindwi ni ikintu gikomeye, imyaka irindwi mu buzima bw’igihugu ni ikintu gikomeye. Umuturage agomba gutora abisobanukiwe na ho ubundi nta kintu byaba bimaze.”

Igihe gahunda zo kwiyamamaza zizaba zitangiye abanyarwanda cyane cyane urubyiruko barasabwa kwitabira gahunda zo kwiyamamaza kw’abakandida kugirango bazabashe kwitorera uwo bazi kandi bazi n’icyo azabagezaho.

Munyaneza ati: “Nk’ubu ejo bundi igihe cyo kwiyamamaza nikigera buri mukandida, buri shyaka rizazana imigabo n’imigambi yabo kugirango bazatorwe, hari abaturage rero bashobora kujya gutora batari banumva iyo migabo n’imigambi…”

Hari imbogamizi mu matora ya Perezida wa Repubulika

Munyaneza yavuze ko imwe mu mbogamizi bafite ari imyumvire ya bamwe mu banyarwanda bacyitiranya kamarampaka yatowe muri 2015 n’amatora ya Perezida wa Repubulika.

Ati: “Twakoze Referandumu, hari abaturage bari bazi ko bamaze gutora Perezida wa Repubulika muri 2015, hari n’abazaga bavuga ngo baje gutora umuntu runaka bibwira ko baje gutora Perezida, wababwira ko baje gutora referandumu bakakubwira ko uwo muntu witwa referandumu batamuzi.”

Yavuze ko iyi myumvire igihari kuko kuri ubu hari n’abavuga ngo gukoresha amafaranga asaga Miliyari 5 y’u Rwanda mu matora ari ukuyapfusha ubusa kuko bumva atari ngombwa gukora amatora ya Peerezida.

Kuba hari amatora agenda aba hirya no hino mu isi bishobora kugira ingaruka ku migendekere y’amatora yo mu Rwanda. Yatanze urugero rwuko hari uburyo bwo kunoza lisiti y’itora hakoreshejwe ikoranabuhanga rya mudasobwa babaye bahagaritse kubera abantu bashatse kwinjirira imikorere yabyo, ibintu byagiye bigaragara no mu matora ya Leta zunze ubumwe za Amerika n’ayo mu Bufaransa.

Indi mbogamizi ni uko abanyarwanda baba mu mahanga bakigorwa no gukora ingendo ndende bajya gutora bitewe nuko bategereye za ambasade. Ibi ngo birimo gushakirwa igisubizo hatekerezwa ku buryo bwo gukoresha ikoranabuhanga mu matora bakabasha gutorera aho bari.


Abanyamakuru bahuguwe gukora inkuru zitabogamye mu matora


Charles Munyaneza Umunyamabanga Mukuru wa NEC (hagati) Peace Maker Mbungiramihigo uyobora inama nkuru y’itangazamakuru, (Iburyo) na Mugisha Emmannuel uyobora RMC ibumoso

Yisangize Inshuti.

Ibitekerezo

Tanga Igitekerezo