Kigali: Madamu Dlamini Zuma yasabye abagore gucika ku muco wo gusabiriza

Umunyambanga w’umuryango wa Afurika yunze ubumwe madamu Nkosazana Dlamini Zuma yahamagariye abagore bose bo muri Afurika guhagurukira kwigira aho guhora bateze amaboko basabiriza abagabo babo.

Ibi madamu Dlamini Zuma yabivugiye mu nama ya gatutu y’abagore bagize ibihugu by’umuryango bya Afurika yunze ubumwe yateraniye I Kigali kuri uyu wa 08 Nyakanga 2016, ikaba ari inama ibanziriza Inama y’umuryango w’ubwumwe bwa Afurika izabera mu Rwanda guhera tariki 10 Nyakanga 2016.

Umunyamabanga wa Afurika yunze ubwumwe Madamu Nkosazana Dlamini Zuma yavuze ko muri Afurika abagore bataragera ku rwego rushimishije mu kujya mu nzego zifata ibyemezo ndetse anatanga urugero ku muryango wa Afurika yunze ubumwe nayo abagore bawukoramo bakiri bake n’ubwo hari intambwe bateye.

Yagize ati “no muri AU hari abagore b’abayobozi b’abanyamwuga,turacyari kuri 15% bikukubye inshuro 2 uko byari bimeze mu myaka 4 ishize ariko na none ntibihagije.”

Madamu Dlamini Zuma yongeyeho ko abagore bakwiye guharanira uburenganzira bwabo nk’uko ari ubwabo , atari ubw’abagabo gusa bakirengagiza bamwe bajya bavuga ko abagore bari kwambura abagabo babo uburenganzira.

Yagize ati “ uburenganzira ni ubwacu twese, ntawe dutwarira ibye uburenganzira ni ubwacu twese.”

Madamu Zuma yasabye abagore ba Afurika bose ko igihe kigeze ngo bacike ku ngeso isa n’iyabokamye yo gusabiriza, bakishyira hamwe bakegeranya ubushobozi ndetse n’abashaka kubafasha bagahera ku byo bigejejeho.

Hon Donatille Mukabarisa ibumoso, Dlamini Zuma hagati na Min Diane Gashumba i buryo

Yagize ati “ nk’ubu twaje muri iyi nama tugomba kubanza gusaba amafaranga , kuki dukomeje kwishyira kuri ibi bintu? ubu koko ntago dushoboye ubwacu nk’abagore bose bo muri Afurika?. Nahoze mvuga nti umugore umwe muri Afurika atanze idorali rimwe ku kwezi mu mpera z’ukwezi twaba dufite miliyoni y’amadorali. Kuki tuvuga ngo duhaze gusabiriza? Abagore ba Afurika mureke twishimire uko turi, dushyire hamwe idorari ubundi dusabe abafasha nyuma.”

Minisitiri w’uburinganire n’iterambere ry’umuryango Dr Diane Gashumba yavuze ko ibyo umunyamabanga wa Afurika yunze ubumwe Dlamini Zuma yavuze ari byo ndetse ko ku ruhande rw’u Rwanda byatangiye gushyirwa mu bikorwa muri gahunda zitandukanye nk’ibimina, gahunda y’igiceri program n’izindi.

Yagize ati “ nibyo koko harageze ko abagore ba Afurika bigira, nka twe mu Rwanda twarabitangiye, hari gahunda ya One Dollar Campaign yo kubakira impfubyi za jenoside yatangijwe n’abagore baba hanze y’u Rwanda, hari gahunda z’ibimina, gahunda yatangijwe n’abagore bo mu murenge wa nduba aho batanga igiceri cy’ijana ubu bakaba bamaze kugera ku ntambwe ishimishije.”

Minisitiri Diane Gashumba yavuze ko n’ubwo hari ibyo u Rwanda rwagezeho ibindi bihugu bikwiye kurwigiraho. Abagore bo mu Rwanda baracyakeneye guhabwa ingufu mu rwego rwo kugerwaho na gahunda zibateza imbere.

Madamu Nkosazana Dlamini Zuma yanahawe igihembo cy’ishimwe nk’umugore waharaniye iterambere ry’abandi bagore muri Afurika.

Iyi nama yitabiriwe n’abantu basaga 400 barimo abaminisitiri bashinzwe uburinganire mu bihugu 13, ikaba yari ifite intego yo kureba uruhare rw’amasezerano ya Maputo ku kubahiriza uburenganzira bw’abagore mu kugera ku buringanire muri Afurika.


Ibihugu bitandukAnye byitabiriye iyi nama

Inama yitabiriwe n’abantu benshi

Yisangize Inshuti.

Ibitekerezo

Tanga Igitekerezo