Kagame yasobanuye impamvu mu Rwanda hatahise haba amatora ya Perezida mu 1995

2

Perezida Paul Kagame yavuze ko mu mwaka wa 1995, amahanga yasabye u Rwanda gutegura no gukoresha amatora ya Perezida akabasubiza ko bitashoboka kuko ingaruka za Jenoside zari zikiri nyinshi, igice kinini cy’Abanyarwanda kiri hanze ndetse imbere mu gihugu ubuzima ari ingume.

Umukuru w’Igihugu yabivuze mu kiganiro yahaye abanyeshuri bagera kuri 400 biga muri Kaminuza ya Yale muri Leta Zunze Ubumwe za Amerika, kuwa 20 Nzeli 2016. mu igikorwa ngarukamwaka kizwi nka ‘Coca-Cola World Fund Lecture’.

Jenoside yo mu 1994 yari imaze guhitana Abanyarwanda basaga miliyoni,abasaga miliyoni eshatu bari barahungiye mu bihugu bituranyi n’u Rwanda, umusaruro mbumbe w’Igihugu (GDP) warakubise amavi hasi, 80% by’abaturage bari abakene, imirima myinshi yarononwe n’amatungo menshi araribwa. Ibikorwa remezo byariho byari byarashenywe ndetse igihugu kimaze gutakaza abakozi b’ingeri zose abandi bafite ibikomere bya Jenoside bikiri bibisi.

Muri iki kiganiro cyabereye muri iyi Kaminuza imwe mu zikomeye ku isi,Perezida Kagame yabajijwe ibikunda kuvugwa ko mu Rwanda nta bwisanzure buhaba ndetse n’urubuga rwa Politiki rudafunguriye buri wese yaba umuturage cyangwa umunyapolitiki.

Mu gusobanura iki kibazo, Perezida Kagame yagarutse ku gisa n’ubushinyaguzi cyakozwe na bamwe mu banyamahanga muri 1995, ubwo igihugu cyari cyugarijwe n’Ingaruka za Jenoside.

.Aha yagarutse kuri bamwe mu Banyamahanga bahise basaba u Rwanda gukoresha amatora ngo babone kurutera inkunga.

Perezida Kagame yavuze ko urubuga rufunguye ndetse ari nabyo bituma hari n’Abanyamahanga bumva baza gufatira ibyemezo Abanyarwanda aho yavuze ko nta rubuga ruruta urwo.

Yasobanuye ko ibi biba hari izindi nyungu zibyihishe inyuma. Yagarutse ku basabye u Rwanda gukoresha amatora muri 1995, mu gihe u Rwanda rwari ruvuye mu icuraburindi ndetse nta rwego na rumwe rukora.

Yagize ati “Ndibuka mu 1995 nyuma gato ya Jenoside,bamwe mu Banyamahanga baraje batangira kutubaza niba twategura amatora, nahise ntekereza ingingo yibaza nti “Amatora yande, agamije kugirira akamaro nde? Kuko twari dufite abagera kuri miliyoni eshatu bari inyuma y’igihugu, ndetse abandi bavanywe mu byabo…imbere mu gihugu.”

Perezida Kagame yakomeje agira ati “ Twarababwiye tuti turashaka mbere na mbere gutuza aba bantu, dukeneye gucyura miliyoni eshatu z’impunzi ndetse turashaka kugarura umudendezo mu gihugu mbere yo gukurikizaho ikindi kintu icyo aricyo cyose”.

Umukuru w’igihugu yavuze ko abo banyamahanga bakomeje gutsimbarara bavuga ko niba u Rwanda rutaberetse umushinga w’amatora bazafunga inkunga bagombaga kurugenera.

Perezida Kagame yemeza ko hagiye hashakishwa impamvu nyinshi zo kuzamura ingingo zitandukanye zishinja u Rwanda gutsikamira ubwisanzure bw’abaturage mu bihe bitandukanye.

Yavuze ko uje mu Rwanda ukibariza abaturage uko babayeho nuko biyumva, baguha amakuru atandukanye yuko biyumva kubyo bakorerwa n’uruhare babigiramo.Yavuze ko atari ngombwa ko buri munyarwanda aba umunyapolitiki ngo bibe ariyo mpamvu ituma amenya ikimukwiriye.

Yongeyeho ati “ Ni gute undi muntu yamenya neza ibibereye Abanyarwanda kurusha bo ubwabo.Abanyarwanda bose ntibakeneye kuba Abanyapolitiki ngo bamenye ibyo bakeneye, ni abantu baba bazi ibyo bakeneye aho bari hose, n’umwe utazi kwandika izina rye azakubwira ibyo akeneye byose,bazakubwira ko bakeneye ibi n’ibi ku muyobozi wabo, ntidushaka ibi, bazakubwira ko bakeneye umutekano,kurya, ubuzima bwiza, uburezi. Ni uko inzego zo mu Rwanda zikorera abaturage.”

Nyuma y’ihagarikwa rya Jenoside muri Nyakanga 1994, Pasteur Bizimungu, niwe wahise ayobora u Rwanda afatanyije Maj Gen Paul Kagame aba Visi Perezida akaba ari nawe wari umugaba mukuru w’ingabo. Pasteur Bizimungu yayoboye u Rwanda mu gihe gikabakaba imyaka 6, kugeza ubwo yatangazaga ko yeguye ku bushake muri 2000, asimburwa na Kagame.

Perezida Kagame yongeye gutorwa mu matora muri 2003 muri manda ya mbere, na 2010 muri manda ya kabiri.

Yisangize Inshuti.

Ibitekerezo 2

  1. nyakubahwa president paul kagame ingoma yawe iragahoraho icyo nagusaba nuko utagomba kurebera urwanda gusa. ububasha, nubutwari, imana yaguhaye ugomba gushaka umuti wokwegeranya imitima yabamwe baturiye akarere muburasirazuba bwa congo nabo nabawe

  2. nyakubahwa president paul kagame ingoma yawe iragahoraho icyo nagusaba nuko utagomba kurebera urwanda gusa. ububasha, nubutwari, imana yaguhaye ugomba gushaka umuti wokwegeranya imitima yabamwe batuye muburasirazuba bwa congo nabo nabawe

Tanga Igitekerezo