Bimwe mu byo Jean de Dieu Mucyo azibukirwaho mu butabera bw’u Rwanda

Senateri Mucyo Jean de Dieu aherutse gupfa azize urupfu rutunguranye rwabaye kuri uyu wa 3 Ukwakira 2016, gusa akaba asize amateka atazibagirana ku butabera bw’u Rwanda aho twavuga ari mubateye imbuto yabwo.

Jean De Dieu Mucyo yabaye Minisitiri w’Ubutabera kuva 1999 kugeza 2003. Yabaye umushinjacyaha mukuru wa Repubulika kuva 2003 kugeza mu 2006, yayoboye Komisiyo Mucyo yari ifite inshingano zo gushakisha uruhare rw’u Bufaransa muri Jenoside yakorewe Abatutsi, nyuma aza guhabwa kuyobora komisiyo y’igihugu yo kurwanya Jenoside CNLG kugeza 2015 aho yavuye ajya muri Sena y’u Rwanda.

Nkuko yigeze kubibwira izubarirashe ngo yatangiye kuyobora iyi Minisiteri mu bihe bitoroshye.

Ati “Nta hantu nari mfite ho gutangirira. Kandi hari imbogamizi ikomeye, hari ibibazo by’abantu benshi bari bafunze kandi badafite amadosiye! Ikindi abantu ntabwo banyakiriye neza kuko hari abavugaga ko uwacitse ku icumu adashobora kuyobora ubutabera kuko yakwihorera”.

Nyuma ya Jenoside mu Rwanda hari ibibazo bikomeye cyane aho Guverinoma yakoze ibishoboka byose ngo isane kandi ihe ingufu urwego rw’ubutabera inashyiraho amategeko arebana no gukurikirana no gucira imanza abagize uruhare muri Jenoside n’ibindi byaha byibasiye inyokomuntu.

Hagati ya 1998 kugeza muri 1999 nibwo habaga ibiganiro muri Village Urugwiro byigaga ku bibazo bitandukanye byiga ku cyakorwa ngo abantu bari mu magereza bacirwe imanza n’abahemukiwe babone ubutabera, maze inararibonye n’abavuga rikijyana bari bahari bemeza ko hakwiye kwitabazwa Inkiko Gacaca.

Nyuma ya Jenoside, abantu barenga 120.000 barafashwe bafungwa by’agateganyo bashinjwa icyaha cya Jenoside n’ibindi byaha byibasiye inyokomuntu ku buryo imanza zagombaga gucibwa zari gufata imyaka isaga 110 iyo zicibwa n’inkiko zisanzwe.

Inkiko Gacaca zifite imizi mu mu mateka y’u Rwanda, aho mu bihe bishyize kera abakurambere bahurizaga mu gacaca , abafite ibibazo bakabacira imanza ariko ahanini hagamijwe kubunga. Ni muri urwo rwego Itegeko Ngenga ryo ku wa 26/01/2001 ryashyizeho “Inkiko GACACA” kandi rikagena imicungire y’ikurikirana ry’ibyaha bigize icyaha cya Jenoside n’ibindi byaha byibasiye inyoko-muntu byakozwe hagati y’itariki ya 01/10/1990 n’iya 31/12/1994.

Inkiko Gacaca zashoje imirimo yazo muri Kamena 2012 ziciye imanza zigera kuri 1,958,634. Imanza 1,320,554 ni zo zaciwe ku bijyanye n’imitungo, muri zo 1,266,632 ni iz ’abahamwe n’icyaha bakaba ba rategetswe kwishyura imitungo bangije. Kugeza muri 2015, imanza zari zararangijwe ni 1,245,542 zingana na 98.3 % naho izitararangizwa zari 21,090 zingana na 1.7 %. Ibibazo bisigaye bizarangizwa hifashishijwe Itegeko Ngenga ryakuyeho Inkiko Gacaca mu mwaka wa 2012

Raporo yiswe Mucyo

Iyi Raporo yerekanye ko u Bufaransa bwagize uruhare mu buryo butaziguye muri jenoside yakorewe abatutsi mu mwaka w’i 1994.

Iyo raporo igabanije mu bice 5 by’ingenzi. Igice cya mbere cyerekana ko u Bufaransa bwari buzi ko hari jenoside iri gutegurwa. Igice cya kabiri cyerekana uruhare rw’u Bufaransa mu bikorwa by’ingenzi byo gutegura jenoside. Igice cya gatatu cyerekana uruhare rw’u Bufaransa mu ishyirwa mu bikorwa ry’umugambi wa jenoside. Igice cya kane kivuga k’uburyozwe bw’ingabo z’u Bufaransa mu gukomeza ibikorwa bya jenoside mu gace kiswe ak’ubutabazi bubinyujije mu cyiswe operation Turquoise. Igice ya 5 cyerekana abayobozi bo mu nzego za politiki n’iza gisirikare z’u Bufaransa bagize uruhare rugaragara muri jenoside.

Itegeko Nshinga rya 2003 naryo ryatowe ari Minisitiri

Mu mwaka we wa nyuma muri Minisiteri y’Ubutabera nibwo Abanyarwanda bakoze amateka yo gutora Itegeko Nshinga rya Repubulika y’u Rwanda ryo ku wa 04 Kamena 2003.Hari hashize hafi imyaka 10 u Rwanda ruri mu nzibacyuho.

Ibindi byagezweho n’Ubutabera bw’u Rwanda

Igihano cy’imirimo Nsimburagifungo (TIG)

Urwego rw’ Imirimo Nsimburagifungo ifitiye Igihugu akamaro (TIG) rwashyizweho muri 2006 rushinzwe gukurikirana irangiza ry’imanza z’abakatiwe igihano cy’imirimo nsimburagifungo ifitiye Igihugu akamaro bari barireze bakemera icyaha bakanasaba imbabazi.

Irangizwa ry’icyo gihano bivugwa ko ryagaragaje umusaruro udashidikanywaho, aho abakoze icyo gihano biyunguye ubumenyi mu mirimo itandukanye bakora, ku buryo bibafasha mu gihe basubiye mu buzima bwabo busanzwe barangije igihano kandi ikorwa ryacyo riteza imbere ibikorwa nko kubaka imihanda, amashuri, amavuriro n’imidugudu y’abatishoboye harimo n’abarokotse Jenoside.

Minisitiri w’Intebe Murekezi Anastase, muri Mata 2015 yavuze ko ku birebana na TIG: abakiriwe muri iyo mirimo ni 53,366 , abarangije igihano ni 47, 721, naho abari bagikora TIG ni 3,143.

Ku gwero rw’ubutabera mpuzamahanga (ICTR)

Leta y ’u Rwanda yakomeje gukorana n’Urukiko Mpuzamahanga Mpanabyaha rwashyiriweho u Rwanda (ICTR) kugira ngo amadosiye y ’abafatiwe ibyemezo n ’uru rukiko , ariko bagishakishwa bakaba bataraboneka, azoherezwe mu Rwanda bityo nibaboneka bazaburanire mu Rwanda . Muri urwo rwego muri 2015 amadosiye 6 yari amaze gushyikirizwa Ubushinjacyaha Bukuru bw’u Rwanda.

Usibye imanza 3 (urwa KABUGA Félicien, urwa BIZIMANA Augustin n’urwa MPIRANYA Protais) ICTR nta rubanza yasigaranye itohereje ahandi.Ni kenshi Jean de Dieu Mucyo yagiye yumvikana mu itangazamakuru agaruka ku manza zaciwe n’uru rukiko ndetse akaba ataratinyaga kurunenga aho u Rwanda rutishimiye imyanzuro.

Kugaruza imitungo y’Abarokotse

Mu mwaka wa 2015 ku bibazo 1,283 byerekeye imitungo y’abana barokotse jenoside, hakemutse ibingana na 954 (74%). Ibindi 65 (5%) byari bigisuzumwa n ’inzego zinyuranye, naho ibibazo 76 ( 5,9 % ) byari bikiri mu nkiko. Hari n’ibindi bibazo 107 (8,3%) byari byaratanzwe n’abantu batazwi aho baherereye, uru narwo rukaba ari urugamba rugikomeza rwagizwemo uruhare na Mucyo akiyobora CNLG.

Abandi ba Minisitiri b’ubutabera babanjirije MUCYO

Abandi babanjirije Mucyo ni Nkubito Alphonse Marie: 17 Nyakanga 1994-31 Kanama 1995.Uyu mugabo utaramenyekanye cyane mu Rwanda niwe wafunguye urugamba rw’ubutabera mu Rwanda nyuma y’igihe gito habaye Jenoside yakorewe Abatutsi.

Uyu mugabo yavukiye I Bugarama mu cyahoze ari Cyangugu kuwa 27 Gicurasi 1954 yitaba Imana kuwa 13 Gashyantare 1997 afite imyaka 43.

Mukamurenzi Marthe:31 Kanama 1995-24/10/1996

Nteziryayo Faustin: 24 Ukwakira 1996-08 Gashyantare 1999

Naho abasimbuye Mucyo muri iyi Minisiteri harimo Edda Mukabagwiza 24/10/2003-05/8/2006.

Karugarama Tarcisse(24 Gicurasi 2006-24-2013) Uyu mugabo ntakigaragara muri Politiki y’u Rwanda kuko yaje gusimburwa na Johnston Busingye uriho kugeza ubu.

@Eric Birori

Yisangize Inshuti.

Ibitekerezo

Tanga Igitekerezo