Ishyaka rya PL ntiriremeza kuzahatana mu matora ya perezida wa repubulika muri 2017

Ishyaka riharanira ukwishyira ukizana kwa muntu (PL) riravuga ko ritari ryafata umwanzuro wo kuba ryatanga umukandida ku mwanya wa perezida wa Republika y’u Rwanda mu matora ateganyijwe kuba mu mwaka utaha wa 2017.

Mu mwaka wa 2017 nibwo biteganijwe ko hazaba amatora ya perezida wa repubulika y’u Rwanda nk’uko byateganywaga n’Itegeko Nshinga rya Repubulika y’u Rwanda ya 2003 ryavuguruwe muri 2015.

Amashyaka yose 11 yemewe n’amategeko mu Rwanda yemererwa no gutanga umukandida uyahagararira mu matora bitabujije n’abakandida bigenga kwiyamamaza.

Mu kiganiro n’abanyamakuru cyabaye kuri uyu wa 14 Nyakanga 2016 ishyaka rya PL ryavuze ko kugeza ubu ritari ryafata umwanzuro niba rizahatana mu matora ya perezida wa repubulika ateganyijwe umwaka utaha.

Visi perezida wa mbere PL Hon Mukabarisa Donatille yavuze ko kugeza ubu batakwemeza ko bazahatana mu matora ya perezida wa repubulika ateganyijwe mu mwaka wa 2017 kuko ibyo ari ibi ibintu byigwaho n’ihuriro ry’ishyaka ku rwego rw’igihugu.

Yagize ati “izo ni inshingano za congre y’igihugu y’ishyaka, buriya igihe nikigera izaterana yemeze ko dutanga umukandida mu matora ya perezida wa repubulika ,nitwemeza y’uko dutanga umukandida tunarebe umukandida koko twumva yahagarara agatorwa n’abanyarwanda bamwizeye.”

N’ubwo ishyaka rya PL rivuga ko nta mwanzuro rirafata ku mukandida uzarihagararira mu matora ya perezida wa repubulika muri 2017, mu matora yo mu 2003 na 2010 ryatanze umukandida n’ubwo ritigeze ritsinda.

Kugeza ubu nta shyaka riratangaza ko rizitabira amatora ya Perezida wa Repubulika, gusa Perezida Kagame ashobora kongera guhagararira ishyaka rya FPR Inkotanyi nk’uko yabyemereye abanyarwanda ubwo bari bamaze kuvugurura itegeko nshinga ryamuzitiraga kwiyamamariza manda ya gatatu.

Yisangize Inshuti.

Ibitekerezo

Tanga Igitekerezo