Kwamamaza

POLITIKE Y’U RWANDA

Imyanzuro y’Umwiherero: Ibigo bimwe bya Leta bishobora kwimurwa mu mujyi wa Kigali

Yanditswe

kuya

na

Ferdinand Maniraguha
Imyanzuro y’Umwiherero: Ibigo bimwe bya Leta bishobora kwimurwa mu mujyi wa Kigali

Bimwe mu bigo bya Leta bishobora gutangira kwimurwa mu mujyi wa Kigali, bikajyanwa mu yindi mijyi yunganira Kigali, nkuko bigaragara mu myanzuro y’Umwiherero uherutse kuba ku nshuro ya 14.

Umwanzuro wa wa 10 muri 26 yafatiwe mu mwiherero, uragaruka ku “Guteza imbere ibikorwa bizamura Imijyi yunganira Umujyi wa Kigali kandi aho bishoboka hagashyirwa ibyicaro by’Inzego n’Ibigo bya Leta"

Ibi ni muri gahunda zo guteza imbere iyo mijyi, igamije gusaranganya ubukungu no kugabanya umubare w’abantu benshi bava mu byaro baje gushaka amaramuko mu mujyi wa Kigali.

Imijyi yunganira Kigali ishobora kujyanwamo bimwe mu bigo bya Leta ni Musanze, Nyagatare, Rubavu, Muhanga, Rusizi na Huye.

Ibigo nka Kaminuza Nkuru y’u Rwanda, IKigo cyahoze ari icy’ubushakashatsi (IRST) ndetse n’icyahoze ari ikigo cy’igihugu cy’ubushakashatsi mu buhinzi n’ubworozi (ISAR) byose byabarizwaga mu I Huye, nyamara nyuma byimuriwe I Kigali.

Ubuyobozi bw’Akarere ka Huye mu minsi ishize bwasabaga ko bimwe muri ibyo bigo bisubizwayo, ngo kuko nyuma yo kuhavanwa iterambere ryasubiye inyuma muri ako gace.

Imyanzuro yose y’Umwiherero wa 14:

Nyuma yo kungurana ibitekerezo hafashwe imyanzuro ikurikira:

1. Gufata ingamba zo gushyira mu bikorwa ibitaragerwaho mu cyerekezo 2020, bigashyirwa mu mihigo ya buri Rwego bireba kandi hagashyirwaho uburyo bwo kubikurikirana buhuriweho n’inzego bireba umunsi ku wundi (regular joint monitoring);

2. Kunoza ihuzabikorwa, imikoranire no guhanahana amakuru hagati y’Inzego zose z’Ubutegetsi Bwite bwa Leta n’Inzego z’Ibanze hagamijwe kunoza no kwihutisha ishyirwa mu bikorwa rya Gahunda za Leta zose;

3. Kunoza imitegurire n’imicungire y’amasezerano Leta igirana na ba rwiyemezamirimo, guhana abagize uruhare mu guteza Leta igihombo, kurangiza igaruzwa ry’imitungo yanyerejwe ku bahamwe n’ibyaha no gukurikirana abatarashyikirizwa inkiko;

4. Gushyiraho ingamba zo gukoresha umuriro ugenda wiyongera no kuwukwirakwiza hirya no hino mu Gihugu, hibandwa ku nganda, mu mashuri, mu mavuriro n’ahandi haba ibikorwa bihuza abantu benshi;

5. Gushishikariza Abanyarwanda gushyiraho ingamba zinoze ziborohereza gutekesha Gaz n’ubundi buryo bugezweho butabangamira ibidukikije, ibyo bigakorwa mu ngo, mu mashuri, mu magereza n’ahandi haba abantu benshi;

6. Gukomeza guteza imbere inganda zikorera mu Rwanda hagamijwe kugabanya ibituruka hanze no kongera ibyoherezwa mu mahanga no guteza imbere ibikorerwa iwacu (Made in Rwanda) kandi bikoroherezwa mu bijyanye n’itangwa ry’amasoko (procurement process);

7. Gutegura no gushyira mu bikorwa ingamba zihariye zigamije kurushaho kongera umusaruro harimo uburyo bwo kubona imbuto zo gutera zihagije kandi nziza ku gihe no kongera ibyoherezwa mu mahanga bituruka ku buhinzi n’ubworozi;

8. Kwihutisha ishyirwa mu bikorwa rya gahunda yo kuzigama no kwiteganyiriza mu buryo burambye no kubaka amacumbi aciriritse;

9. Kwihutisha ishyirwa mu bikorwa rya gahunda yo kunoza uburyo bwo gutunganya imyanda (waste management) mu Mujyi wa Kigali no mu Mijyi 6 yunganira Umujyi wa Kigali;

10. Guteza imbere ibikorwa bizamura Imijyi yunganira Umujyi wa Kigali kandi aho bishoboka hagashyirwa ibyicaro by’Inzego n’Ibigo bya Leta;

11. Gushyiraho gahunda yihutirwa yo kubyaza umusaruro ikibanza Leta y’u Rwanda yahawe na Leta ya Djibouti;

12. Kwihutisha ishyirwa mu bikorwa rya gahunda yo kwishyurana no guhererekanya amafaranga hakoreshejwe ikoranabuhanga (cashless payment) by’umwihariko mu Nzego za Leta;

13. Kunoza imitangire ya serivisi mu Nzego za Leta hitawe ku bipimo bigaragazwa n’inzego zibishinzwe no kongera umubare wa serivisi zitangwa hakoreshejwe ikoranabuhanga (Rwanda online services);

14. Gushyiraho ingamba zo kongerera ubushobozi gahunda ya mituweli (mutuelle de santé) ku buryo burambye;

15. Gushyiraho ingamba zigamije gutuma abakora mu rwego rw’ubuvuzi mu mavuriro ya Leta baguma muri ako kazi;

16. Kunoza imitangire ya serivisi mu mavuriro ya Leta, amavuriro y’abikorera n’ibigo by’ubwishingizi bw’indwara;

17. Gukoresha inzobere z’abaganga bakorera mu bitaro bya Kaminuza kwigisha abaganga n’abandi bakora umwuga w’ubuvuzi hagamijwe kongera ubumenyi n’umubare w’inzobere mu buvuzi;

18. Kunoza ireme ry’uburezi, hashyirwa ingufu cyane cyane mu kubona abarimu babyigiye kandi babishoboye, kongera ibikorwa remezo n’ibikoresho, gukora igenzura ngarukagihe no guteza imbere inyigisho z’Ubumenyi, Ikoranabuhanga n’Imibare (STEM);

19. Ikigo cy’Igihugu gishinzwe guteza imbere Amakoperative kirasabwa gukurikirana no gukemura ibibazo biri mu makoperative no gufata izindi ngamba za ngombwa zo kuyateza imbere;

20. Ikigo cyo Kwigisha no Guteza Imbere Amategeko (ILPD) na za Kaminuza zigisha amategeko birasabwa kongera imbaraga mu kwigisha amasomo yihariye atuma Igihugu kirushaho kugira inzobere mu mategeko atandukanye (different domains);

21. Inzego zose za Leta zirasabwa gukorana na IOS company kugira ngo ibe ariyo ibafasha gukemura ibibazo byose bijyanye no gutanga serivisi hifashishijwe ikoranabuhanga;

22. Gushyiraho ingamba zishimangira uburere bwiza mu muryango, n’izigamije gukumira no kurwanya ihohoterwa rishingiye ku gitsina no guca burundu ihohoterwa rikorerwa abana;

23. Kwihutisha kugeza mu gihugu hose imiyoboro y’itumanaho (communication network) no kuyibyaza umusaruro;

24. Gushyiraho sitati yihariye igenga Abakozi ba Minisiteri y’Ububanyi n’Amahanga n’Ubutwererane;

25. Gushyiraho ingamba zigamije guhindura imyumvire kugira ngo abantu barusheho kwiteza imbere aho gusaba gushyirwa mu cyiciro cy’ubudehe cy’abatishoboye;

26. Kongera ishoramari mu bikorwa bitandukanye by’ubukerarugendo cyane cyane ahakurura ba mukerarugendo benshi kurusha ahandi kandi bafite ubushobozi (ubukerarugendo bushingiye ku ngagi) no gusubiramo ibiciro by’ubukerarugendo.

IBITEKEREZO

  • Emmy Yanditse:

    ku mwanzuro wa 25, gahunda za vup zikorere mu mudugudu.yongererweho kujya ihingira abasaza,amasambu yabo azera kurusha uko hakoreshwaga intègre nke.

  • Hagenimana Emmanuel Yanditse:

    ibyo ni byo dushak niko kwegereza ubuyobozi abaturage.

  • theo Yanditse:

    Huye yacu yongere itere imbere, turabyishimiye.

  • theo Yanditse:

    Huye yacu yongere itere imbere, turabyishimiye.

Tanga igitekerezo


Kwamamaza Car Free Day/ 18/02/2018
Kwamamaza
Perezida KAGAME avuga ku manyanga mu Iyubakwa rya Hotel ya FERWAFA n’ikibazo cy’abana bo ku mihanda
KAGAME avuga kuri za Mission z’abayobozi zidasobanutse
IBYO ABANYAMAKURU BAVUGA KU IYEGURA RYA Fred MUVUNYI ku buyobozi bwa RMC
Uwari V/Perezida w’Urukiko rw’Urukiko rurinda Itegeko Nshinga/ Burundi
RUNIGA avuga uko bazinjira Congo
Ubutumwa bw’Umuturage kuri Perezida KAGAME
Kwamamaza